އައްޑޫގެ ވިޔަފާރިތައް އިރުއޮއްސި 6 ޖަހާއިރު ބަންދެއް ނުވާނެ: އައްޑޫސިޓީ ކައުންސިލް
28 މާރިޗު 2020 | ހޮނިހިރު 03:42ވިހާ ވެސް ގިނަ ވިޔަފާރީތައް ރޭގަނޑު ބަންދުކުރުމަށް ސޯދިގު އެދިވަޑައިގެންނެވި
ކައުންސިލް އިދާރާ
ކޮވިޑް-19 އިން ރައްކާތެރިވުމަށް އަޅާ ފިޔަވަޅެއްގެ ގޮތުން އައްޑޫ ސިޓީގެ ފިހާރަތަކާއި ކެފޭތައް އިރުއޮއްސި 6 ޖަހާއިރު ބަންދު ކުރުމަށް އައްޑޫ ސިޓީ ކައުންސިލް އިދާރާއިން ނިންމި ނަމަވެސް މިހާރު ވިޔަފާރީތައް ބަންދުން ނުވާނެ ކަމަށް އައްޑޫ ސިޓީ ކައުންސިލުން ބުނެފިއެވެ.
ރާއްޖެއެމްވީއަށް އައްޑޫ ސިޓީ ކައުންސިލް މޭޔަރ އަބްދުﷲ ސޯދިގު ވިދާޅުވީ ކުރިން އައްޑޫ ސިޓީގެ ފިހާރަތަކާއި ކެފޭތައް އިރުއޮއްސި 6 ޖަހާއިރު ބަންދުކުރަން ނިންމީ ހެލްތް ޕްރޮޑެކްޝަން އެޖެންސީ (އެޗްޕީއޭ) އާއި އައްޑޫސިޓީގެ ކޮވިޑް-19 ޓާސްކްފޯހާއި މަޝްވަރާ ކުރެއްވުމަށްފަހު ކަމަށެވެ. އެހެންނަމަވެސް އެޗްޕީއޭގެ ފަރާތުން ބުނެފައިވަނީ ބަންދުކުރަން ނިންމާފައިވަނީ މާލެސިޓީ ކައުންސިލްގެ ވިޔަފާރީތައް ކަމަށެވެ.
އާންމުން ގިނަ ތަންތަނަށް މީހުން އެއްވާތީ އެކަމުގެ ކަންބޮޑުވުން ފާޅުކުރައްވާ ސޯދިގު ވިދާޅުވީ މިގޮތަށް މަސައްކަތް ކުރަނީ ވެސް ރައްޔިތުންގެ ސަލާމަތާއި ރައްކާތެރިކަމާއި ކޮވިޑް-19 އިން ރައްކާތެރިވުމަށް އަޅާ ފިޔަވަޅެއްގެ ގޮތުން ކަމަށެވެ.
ސޯދިގު ވިދާޅުވީ ވިޔަފާރީތައް ރޭގަނޑު ބަންދުނުވިޔަސް އެދުމަކީ ގިނަ ވިޔަފާރީތަކުން ރޭގަނޑަށް ބަންދުކުރުން ކަމަށެވެ. އަދި ރައްޔިތުންނަށް ކުރައްވާނެ އިލްތިމާސް އަކީ ވެސް ގިނަ ވަގުތު ގެއިން ބޭރުގައި ނޫޅެ، ކަމާއި ގުޅޭ އިދާރާތަކުން ދޭ އިރުޝާދުތަކަށް ތަބާވުން ކަމަށެވެ.
