ޤަރާރަށް ވޯޓަށް އަހަން މިރޭ 8 ޖަހާއިރު މަޖިލީހުގެ ޖަލްސާއެއް ބާއްވަނީ
ޖަލްސާ ބާއްވަނީ ޤަރާރު ފާސް ކުރުމަށް
ސިފައިން މަޖިލިސް ހިސޯރު ކޮށްފައި
ސަރުކާރުން ހުށަހަޅާފައިވާ ކުއްލި ނުރައްކަލުގެ ޙާލަތު އިތުރު ކުރުމަށް ހުށަހަޅާފައިވާ ޤަރާރަށް ވޯޓަށް އެހުމަށްޓަކައި ކުއްލި ޖަލްސާއެއް މިރޭ 8 ޖަހާއިރު ބޭއްވުމަށް ހަމަޖެހިފައިވާ ކަމަށް ރާއްޖެ އެމްވީއަށް މައުލޫމާތު ލިބިއްޖެއެވެ.
މަޖިލީހުން އެކަން ރަސްމީކޮށް ނޭންގެވި ނަމަވެސް ސަރުކާރަށް ތާއީދު ކުރައްވާ ރައްޔިތުންގެ މަޖިލީހުގެ މެންބަރުންނާއި ގުޅިފައިވާ ޕާޓީތަކުގެ ރައްޔިތުންގެ މަޖިލީހުގެ މެންބަރުން ވެސް ވަނީ ޕްރެސް ކޮންފަރެންސް ތަކުގައި އެކަން ހާމަ ކުރައްވާފައެވެ.
ރައްޔިތުން އެމައްޗަށް ޢަމަލް ކުރަން ޖެހޭ ނިންމުންތައް ނިންމޭނެ ކަމަށް ޤާނޫން އަސާސީގައި ބުނަނީ އެފަދަ ކަމެއް ފާސްކުރެވޭނީ 43 މެންބަރުންގެ އަޣްލަބިއްޔަތުން ކަމަށެވެ. އެހެން ނަމަވެސް އެއަދަދު ސަރުކާރު ކޯލިޝަންއަކަށް ހަމައެއް ނުކުރެވެއެވެ. ސަރުކާރު ކޯލިޝަންގައި ތިއްބަވަނީ 41 މެންބަރުންނެވެ. ނަމަވެސް ޕީޕީއެމްއިން ބޭއްވި ޕްރެސް ކޮންފަރެންސެއްގައި ފޮނަދޫ ދާއިރާގެ މެންބަރު ޢަބްދުއް ރަހީމް ވިދާޅުވީ ޤަރާރު މަޖިލީހުން ފާސްވިއަސް ނުވިއަސް ކަންވެގެންދާނީ ރައީސް ޔާމީން ބޭނުންފުޅުވާ ގޮތަށް ކަމަށެވެ.
ޢަބްދުއްރަހީމް މިހެން ވިދާޅުވުމާ ގުޅިގެން ބައެއް ބޭފުޅުން ވިދާޅުވަނީ 43 މެންބަރުންގެ ވޯޓު ނުލިބުނަސް މަޖިލީހުން ނިންމައިފިނަމަ އެކަން ސައްޙަ ވެގެންދާނެ ކަމަށް ގާނޫނީގޮތުން ނިންމާނެ ކަމަށެވެ. އަދި ސުޕްރީމް ކޯޓަށް އެފަދަ މައްސަލައެއް ހުށަހަޅާފައިވާ ކަމުގެ އަޑުތަކެއް ދަނީ ފެތުރެމުންނެވެ.
