އަމިއްލަ މަސައްކަތްކުރާ ފަރާތަތަތަކަށްވެސް އެސްއެމްއީ ލޯނަށް ކުރިމަތިލެވޭނެކަމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.

މިކަން ހާމަކޮށް މިނިސްޓަރ ފައްޔާޒް ކުރެއްވި ޓުވީޓެއްގައި ވިދާޅުވީ، އަމިއްލަ މަސައްކަތް ކުރާ ފަރާތްތަކަށްވެސް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ)ގެ ފަރާތުން ދޫކުރާ ކުދި އަދި މެދުފަންތީގެ ވިޔަފާރިތަކަށް ދޫކުރާ ލޯންތަކަށް ކުރިމަތި ލެވޭނެކަމަށާއި އިކޮނޮމިކް މިނިސްޓްރީގެ ފަރާތުން އެ ފަރާތްތަކުގެ ހާލަތު ރިޕޯޓުކުރެވޭނެގޮތަށް ޖޮބް ސެންޓަރ ޕޯޓަލް އަށް ބަދަލުގެންނާނެކަމަށެވެ. މިނިސްޓަރ ވިދާޅުވީ، އެސްޑީއެފްސީން ދޫކުރާ އެއްވެސް ލޯނެއް އިންޓްރެސްޓް ނަގައި ފައިދާވާނެފަދަ ގޮތަކަށް ބައްޓަންކޮށްފައިނުވާނެކަމަށާއި ވީހާވެސް ގިނަ ފަރާތްތަކަށް ލޯންދެވޭތޯ މަސައްކަތްކުރާނެކަމަށެވެ.

އެސްޑީއެފްސީއަކީ ރާއްޖޭގައި ހަރަކާތްތެރިވާ މާލީ އިދާރާތަކުގެ ތެރެއިން މިފަދަ ނިންމުމެއް ނިންމި ފުރަތަމަ އިދާރާއެވެ. އެސްޑީއެފްސީއަކީ ދައުލަތުގެ 100 އިންސައްތަ ހިއްސާވާ ކުންފުންޏެކެވެ. އޭގެ ތެރޭގައި ފުވައްމުލަކު ސިޓީ، އައްޑޫ ސިޓީ އަދި މޭލ ސިޓީގެ 15 އިންސައްތަ (ކޮންމެ ސިޓީއަކަށް %5) ހިއްސާ ހިމެނެއެވެ.

މި ކޯޕަރޭޝަނަކީ ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީ އާއި ފަންނީ ލަފާދިނުމުގެ ގޮތުން މިދިޔަ އަހަރުގެ މާޗް މަހުގެ ތެރޭގައި ހުޅުވިގެން ދިޔަ ކުންފުންޏެކެވެ. މިހާތަނަށް އެސްޑީއެފްސީން 120 މިލިއަން ރުފިޔާ ލޯނުގެ ގޮތުގައި ދޫކޮށްފައިވާއިރު، މީގެ ތެރެއިން ގިނަ އަދަދެއްގެ ފައިސާ ދޫކޮށްފައިވަނީ ގެސްޓްހައުސް ތަކަށެވެ.

ކުދި އަދި މެދު ފަންތީގެ ވިޔަފާރިތަކަށް އެހީވުމުގެ ގޮތުން މި އަހަރުގެ ބަޖެޓުގައި ވެސް ވަނީ ގިނަ އަދަދަކަށް ފައިސާ ހިމަނާފައެވެ. އެގޮތުން 2020 ވަނަ އަހަރަށް ފާސްކުރި ބަޖެޓުގައި އެސްޑީއެފްސީއަށް 450 މިލިއަން ރުފިޔާ ކަނޑައަޅާފައިވެއެވެ.

ކޮވިޑް-19ގެ ސަބަބުން ވިޔަފާރިތަކަށް އެހީތެރިވެދިނުމުގެ މަގުސަދުގައި އެސްޑީއެފްސީއިން ލޯނު ދޫކޮށްފައިވާ ފަރާތްތަކުން ލޯނު އަނބުރާ ދެއްކުން ހަ މަސް ދުވަހަށް ފަސްކުރަން ސަރުކާރުން ވަނީ ނިންމައިފައެވެ.