ސަރުކާރުން އަމިއްލަ މެމްބަރުންނަށްވެސް އިތުބާރު ނުކުރާކަން ހާމަވެއްޖެ: ޤާސިމް

ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބަރު ނެތްކަމަށް ވޯޓު ނެގިގެންދިޔަ ގޮތުން އަމިއްލަ ޕާލިމެންޓްރީ ގުރޫޕުގެ މެމްބަރުންނަށްވެސް، ސަރުކާރުން އިތުބާރު ނުކުރާކަން ހާމަވެގެންގޮސްފައިވާކަމަށް ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ހާއްސަ މަޖިލީހުގެ ރައީސްކަން ކުރައްވާފައިވާ ޤާސިމް އިބްރާހިމް ވިދާޅުވެއްޖެ އެވެ.

ގުޅިފައިވާ ސިޔާސީ ޕާޓީތަކުން މ. ކުނޫޒުގައި ބޭއްވި ޖަލްސާގައި ވާހަކަދައްކަވަމުން ޤާސިމް އިބްރާހިމް ވިދާޅުވީ، ވަކިވަކި މެމްބަރުންނާ ސުވާލުކޮށްގެން ވޯޓަށް އަހަން ނިންމުމީ މަޖިލީހުގެ ގަވައިދާ ހިލާފަށް ކަމަށެވެ. އަދި ވިދާޅުވީ، 17 ވަނަ ރައްޔިތުންގެ މަޖިލީހުގައިވެސް، 18 ވަނަ ރައްޔިތުންގެ މަޖިލީހުގައިވެސް ރޯލް ކޯލް ވޯޓެއް ނަގާފައިނުވާނެކަމަށެވެ. އެކަން އެގޮތަށް އެ ދެ ދައުރުގައިވެސް މިހާތަނަށް ކޮށްފައިނުވަނީ މަޖިލީހުގައި ފުރިހަމަ، އިލެކްޓްރޯނިކް ވޯޓިންގގެ ނިޒާމެއް ޤާއުމްކުރެވިފައިވާތީ ކަމަށް ޤާސިމް ވިދާޅުވި އެވެ.

ޤާސިމް ވިދާޅުވީ، މަސީހުގެ އިތުބަރު ނެތްކަމަށް ވޯޓު ނެގުމުގެ ތެރޭގައި ވަރަށް ބޮޑު މަންޒަރެއް ފެނިގެންގޮސްފައިވާކަމަށެވެ. އެގޮތުން އޮޅުވާލުންތައް ގެންގުޅޭ މަންޒަރު ވަރަށް ސާފުކޮށް ފެނިގެން ހިނގައްޖެ ކަމަށް އޭނަ ވިދާޅުވި އެވެ. އަދި ވިދާޅުވީ، މިއީ ލިބުނު ބޮޑު ކާމިޔާބީ އަކާއި މޮޅެއް ކަމަށެވެ. އެގޮތުން މިއީ އެޅުން ރަނގަޅު ފެށުމެއްގެ ގޮތުގައި ޤާސިމް ސިފަކުރެއްވި އެވެ.

"އެކި އެކި މަޤާމުގައިތަކުގައި ތިބި މިނިސްޓަރުންނާއި، އޮޑިޓަރ ޖެނެރަލުންނާއި، އުއްތަމަ ފަނޑިޔާރާއި، ނައިބް ރައީސުން ފަދަ ބޭބޭފުޅުންގެވެސް ނޯ ކޮންފިޑެންސް ވޯޓް ނަގައިފި. އަބަދުވެސް އެއްކަލަ މެޝިން ބޭނުންކޮށްގެން ނަގަނީ އެނގޭތޯ. މިއަދު ކިހިނެއްތޯ ކުއްލިއަކަށް މިވީ؟ މިއަދު މި ވީގޮތް އަޅުގަނޑު ދިވެހި ރައްޔިތުންނަށް ބުނެނުދިނަސް އެނގިވަޑައިގަންނަވާނެ ވަރަށް ސާފުކޮށް، ވަރަށް ސާފުކޮށް. އާދެ ސަރުކަރުގެ ކޮންފިޑެންސް އަމިއްލަ މެމްބަރުންނާއިމެދު ނެތްކަން ސާބިތުވެގެންދިޔައީ" ޖުމްހޫރީ ޕާޓީގެ ލީޑަރުކަންވެސް ކުރައްވާ ޤާސިމް އިބްރާހިމް ވިދާޅުވި އެވެ.

ޤާސިމް ވިދާޅުވީ، ކުރައްވާ މަސައްކަތަކީ، ދިވެހި ޤައުމުގައި އަދުލުވެރިކަމާއި، އިންސާފު ޤާއިމްކުރުމުގެ މަސައްކަތް ކަމަށެވެ. އަދި ހަމަނުޖެހުންތައް ހައްލުކޮށް، އެއްވެސް މީހަކަށް އަނިޔާ ނުލިބޭނެކަން ކަށަވަރުކުރުމަށް ހަރުދަނާ ނިޒާމެއް ޤާއިމްކުރުމުގެ މަސައްކަތް ކަމަށެވެ. އޭނާ ވިދާޅުވީ އިންސާފު ނުލިބި ލަސްވާ ކޮންމެ ވަގުތަކީ ލިބޭ ބޮޑު ނިކަމެތިކަމެއް ކަމަށެވެ. އަދި އެކަމަށް އެއްވެސް މީހަކު މައާފު ނުކުރާނެކަމަށް ޤާސިމް ވިދާޅުވި އެވެ.