ދުނިޔޭގެ އެކި ކަންކޮޅުތަކުގައި ހަލުވި ކަމާއި އެކު ފެތުރެމުންދާ ނުރައްކާތެރި ކޮވިޑް-19 އާ ގުޅިގެން މާވަރުލު އެއަރޕޯޓްގެ ދަތުރުތައް ފަސްކޮށްފިއެވެ.
މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ބުނީ ދުނިޔޭގައި މިވަގުތު ކުރިމަތި ވެފައިވާ ކޮވިޑް-19 އިން ރައްކައުތެރިވުމުގެ ގޮތުން ކޮންމެހެން ކުރަންޖެހޭ ދަތުރުފަތުރު ނޫން ދަތުރެއް ނުކުރުމަކީ ސަރުކާރުން އިލްތިމާސް ކޮށްފައިވާ ކަމެއްކަމުގައިވާތީ އާއި އައިލެންޑް އޭވިއޭޝަންގެ ދަތުރުތައް ވެސް މިވަގުތު ވަރަށް ބޮޑު ތަނުން މަދުކުރެވިފައިވާތީ މާވަރުލު އެއަރޕޯޓް ފްލައިޓް އޮޕަރޭޝަންސް ފެށުން މިވަގުތު ވަނީ މަޑުޖައްސާލެވިފައިވާ ކަމަށެވެ.
އަދި ރާއްޖޭގެ ހާލަތަށް އަންނަ ހެޔޮ ބަދަލުތަކަށް ބަލައި މާވަރުލު އެއަރޕޯޓްގެ އޮޕަރޭޝަންސް ފެށުމަށް ކަނޑައަޅާ ތާރީޚެއް ކުރިއަށް އޮތް ދެ ހަފްތާ ތެރޭގައި އިއުލާން ކުރެވޭނެ ކަމަށެވެ.
ކޮވިޑް-19 އާ ގުޅިގެން ބުރާސްފަތި ދުވަހުގެ ރެއިން ފެށިގެން ރާއްޖެ އަށް ފަތުރުވެރިން އައުންވެސް މުއްދަތެއް ނެތް ގޮތަށް ވަނީ މަނާކުރެވިފައެވެ.
