ކޮވިޑް-19: ހޮލެންޑް އެމެރިކާގެ ކުރޫސް ލައިނާ "ޒާންޑެމް" އިން ކޮވިޑް-19 ގެ އަލާމާތްތައް ހުރި 77 މީހަކު ފެނިއްޖެ
ކުރޫސް ލައިނާ ބަނދަރުކުރާނެ ޕޯޓެއް ނެތުމުން އެހީގެ ސާމާނު ހިފައިގެން އިތުރު ބޯޓެއް ދަނީ ދަތުރުކުރަމުން
ހޮލެންޑް އެމެރިކާގެ ކުރޫސް ލައިނާ \"ޒާންޑެމް\"
ހޮލެންޑް އެމެރިކާގެ ކުރޫސް ލައިނާ "ޒާންޑެމް" އިން ކޮވިޑް-19 ގެ އަލާމާތްތައް ހުރި 77 މީހަކު ފެނިއްޖެއެވެ.
ކުރޫސް ލައިނާގެ ވެބްސައިޓުން އާންމުކޮށްފައިވާ ބަޔާނެއްގައި ބުނެފައިވަނީ މި 77 މީހުންގެ ތެރޭގައި ހިމެނެނީ 30 ފަސިންޖަރުންނާއި 47 ފަޅުވެރިން ކަމަށެވެ. ކުރޫސް ލައިނާއިން ބުނެފައިވަނި މިއީ ރޯގާ މޫސުން ކަމަށް ވެފައި، ކުރޫސް ލައިނާގައި ކޮވިޑް-19 އަށް ޓެސްޓް ކުރެވޭނެ އިންތިޒާމް ހަމަޖެހިފައި ނުވާތީ ސީދާ ބަލީގެ ގޮތެއް އެނގެން އުނދަގޫ ކަމަށެވެ.
ޒާންޑެމް އާޖެންޓީނާގެ ބުވެނޯސް އައިރެސް އިން ފުރީ މާޗް 7 ވަނަ ދުވަހުއެވެ. އަދި މިއީ އެ ކުރޫސް ލައިނާއިން ބައިނަލްއަގުވާމީ ދަތުރުތައް ހުއްޓާލާނެކަން އިއުލާން ކުރުމުގެ ކުރިން ފެށި ފަހު ދަތުރެވެ.
މި ދަތުރު ނިންމަން ހަމަޖެހިފައިވަނީ ހޮނިހިރު ދުވަހު ޗިލީގެ ސެން އެންތޯނިއޯއަށެވެ. އަދި މި މަހުގެ 14 ވަނަ ދުވަހުން ފެށިގެން އެއްޗެސް ފަތުރުވެރިއެއް ކުރޫސް ލައިނާއިން ފައިބާފައި ނުވާ ކަމަށެވެ. އަދި ޗިލީގެ ޕްޗެންޓާ އެރީނާއަށް ފަތުރުވެރިން ބޭލުމަށް ހަމަޖެހިފައިވީ ނަމަވެސް އެ ހުއްދަ ވެސް ލިބިފައި ނުވާކަމަށެވެ.
ޒާންޑެމް ދަތުރުކުރަމުންދާ ރޫޓްގައި ހިމެނޭ ހުރިހާ ބަނދަރެއް ވަނީ ކޮވިޑް-19 އާއި ގުޅިގެން ބަންދުކޮށްފައެވެ. އަދި މިކަމާއި ގުޅިގެން ހޮލެންޑް އެމެރިކާގެ އިތުރު ބޯޓެއް ދަނީ އެހީގެ ސާމާނު ހިފައިގެން ކުރޫސް ލައިނާއާ ދިމާލަށް ދަތުރުކުރަމުންނެވެ.
މީގެ ތެރޭގައި ސާމާނާއި، އިތުރު ސްޓާފުން އަދި ކޮވިޑް-19 ޓެސްޓް ކިޓް ހިމެނެއެވެ. އެހީ ހިފައިގެން ދަތުރުކުރަމުންދާ ބޯޓު މެކްސިކޯއިން ފުރީ އާދީއްތަ ދުވަހުއެވެ. އަދި ޒަންޑާމްއާ ހަމައަށް ދެވޭނެ ކަމަށް ލަފާ ކުރަނީ ބުރާސްފަތި ދުވަހުއެވެ.
