ކޮވިޑް-19: އިންޑިއާގެ ޑޮމެސްޓިކް ހުރިހާ ފްލައިޓްތައް މެދުކަނޑާލަނީ
23 މާރިޗު 2020 | ހޯމަ 14:10ބުދަ ދުވަހުން ފެށިގެން އިންޑިޔާގެ އެތެރޭގެ އުދުހުންތައް މެދުކަނޑާލާނެ
އިންޑިޔާގެ އެއަރޕޯޓެއްގެ ތެރެއިން
ކޮވިޑް-19 އިންޑިޔާގައި ހަލުވި މިނުގައި ފެތުރެމުންދާތީ އަޅަމުންދާ ފިޔަވަޅުތަކުގެ ތެރެއިން އިންޑިޔާގެ އެތޭރޭގައި ދުއްވާ ހުރިހާ ފްލައިޓުތަކެއް މެދުކަނޑާލުމަށް ނިންމައިފި އެވެ.
އިންޑިޔާގެ ސިވިލް އޭވިއޭޝަން މިނިސްޓްރީން ނެރެފައިވާ ޕްރެސް ރިލީސްގައި ބުނެފައިވަނީ ބުދަ ދުވަހުން ފެށިގެން އިންޑިއާގެ އެތެރޭގެ އުދުހުންތައް މެދުކަނޑާލާނެކަމަށެވެ. އެހެންކަމުން 24 މަރޗް ވާ އަންގާރަ ދުވަހުގެ ރޭގަނޑު 23:59 ވުމާހަމައަށް ހުރިހާ އެއަރލައިންތަކެއްގެ ފްލައިޓްތައް ދާންޖެހޭ މަންޒިލާހަމައަށް ދާންޖެހޭނެކަމަށެވެ. އެހެންނަމަވެސް ހުސް އެކަނި ކާގޯ އުފުލާ ފްލައިޓްތައް މީގެން އިސްތިސްނާވާކަމަށް މި ޕްރެސް ރިލީޒްގައި ބުނެފައިވެއެވެ.
އަނެއްކޮޅުން ކޮވިޑް-19 އިންޑިއާގައި ފެތުރެމުންދާތީ އެކަމުން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކުގެ ތެރެއިން އިންޑިޔާގެ މައި ސިޓީ ނިއުދިއްލި އާއި އިތުރު ސިޓީތަކެއް މާރޗް މަހުގެ 31 ވަނަ ދުވަހާ ހަމައަށް ވަނީ ލޮކްޑައުންކޮށްފަ އެވެ.
ލޮކްޑައުންކުރުމަށް ހަމަޖެހިފައިވާ ސިޓީތަކުގެ ތެރޭގައި ހިމެނެނީ މުމްބާއީ، ބެންގަލޯރު، ޕޫނޭ، ހައިދްރައާބާދު އަދި ކޮލްކަތާ އެވެ. މިނިންމުމާއެކު މިމަސް ނިމެންދެން އިންޑިޔާގެ ފައިނޭންޝަލް އަދި ޓެކްނޮލޮޖީގެ ދާއިރާގައި މަސައްކަތްކުރާ އެތައް މިލިއަން ބަޔަކު ދެން މަސައްކަތްކުރާނީ ގޭގައި ތިބެގެންނެވެ. އިންޑިއާ އިން ވަނީ ބޭރު ޤައުމުތަކުގެ މީހުން އެ ގައުމަށް އެތެރެވުން ވަގުތީ ގޮތުން މަނާ ކޮށްފައެވެ. އަދި އޮން އެރައިވަލް ވިސާ ދޫކުރުންވެސް ވަނީ ހުއްޓާލާފައެވެ.
މިހާތަނަށް އާއިރު އިންޑިޔާއިން ކޮވިޑް-19 އަށް ޕޮޒިޓިވްވި މީހުންގެ ޢަދަދު 433 އަށް ވަނީ އަރާފަ އެވެ.
