ބޮޑީބިލްޑިންގ އެސޯސިއޭޝަންގެ ބައެއް ހަރަކާތްތައް ފަސްކޮށްފި

ރާއްޖޭގައި ފެތުރެމުންދާ ކޮރޯނާވައިރަސް (ކޮވިޑް-19) އާ ގުޅިގެން ބޮޑީބިލްޑިންގ އެސޯސިއޭޝަން އޮފް މޯލްޑިވްސްއިން ބައެއް ހަރަކާތްތައް ފަސްކޮށްފި އެވެ.

މިމަހުގެ 12 ވަނަ ދުވަހު ވަނީ ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ.

ބޮޑީބިލްޑިންގ އެސޯސިއޭޝަނުން ނެރުނު ބަޔާނެއްގައި ބުނެފައިވަނީ ކޮވިޑް-19ގެ ސަބަބުން ދުނިޔޭގައި އާއި ރާއްޖޭގައި އެޅިފައިވާ އެކިއެކި ފިޔަވަޅުތަކާއި، ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކުރެވިފައިވުމާއި ގުޅިގެން، އެ އެސޯސިއޭޝަނުގެ ބައެއް ހަރަކާތްތައް ވަގުތީ ގޮތުން މެދުކަނޑާލާފައިވާށ ކަމަށެވެ. އެގޮތުން އަންނަ އޭޕްރީލް މަހުގެ ތިންވަނަ ދުވަހު ބޭއްވުމަށް ހަމަޖެހިފައިއޮތް ގައުމީ ބޮޑީބިލްޑިގ ޓީމު އެކުލަވާލުމަށް ހަމަޖެހިފައިވާ ސިލެކްޝަން، މުއްދަތެއް ނެތް ގޮތަށް ފަސްކޮށްފައިވާ ކަމަށްވެސް ވަނީ ބުނެފައެވެ.

ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާއިރު، އެކި ކުޅިވަރު އެސޯސިއޭޝަންތަކުން އަންނަނީ އެ އެސޯސިއޭޝަންތަކުގެ ހަރަކާތްތައް ހުއްޓާލަމުންނެވެ. އެގޮތުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އާއި ބެޑްމިންޓަން އެސޯސިއޭޝަން އޮފް މޯލްޑިވްސް އާއި އެތުލެޓިކްސް އެސޯސިއޭޝަން އޮފް މޯލްޑިވްސް އާއި މޯލްޑިވްސް ޕޫލް ބިލިއާޑް އެސޯސިއޭޝަނާއި މޯލްޑިވްސް ސާފިންގ އެސޯސިއޭޝަނުން ވަނީ އެ އެސޯސިއޭޝަންތަކުގެ ހުރިހާ ހަރަކާތްތަކެއްވެސް ހުއްޓާލާފައެވެ.

ރާއްޖެއިން ކޮވިޑް-19އަށް ޕޮޒިޓިވްވި މީހުންގެ އަދަދު 13 އަށް އަރާފައިވާއިރު، މީގެ ތެރެއިން 5 މީހަކު މިހާރު ވަނީ ރަނގަޅުވެފައެވެ.