ބަލަމުންދާ މައްސަލަ އަކާހުރެ އިންޓާ އޮފީސް/ކޮމްޕެނީ ވޮލީބޯޅަ މުބާރަތުގެ ސެމީ ފައިނަލް މެޗެއް ފަސްކޮށްފި

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމް ކޮށްގެން ކުރިއަށް ގެންދާ، އިންޓާ އޮފީސް/ ކޮމްޕެނީ ވޮލީބޯޅަ މުބާރާތުގެ ސެމީފައިނަލް މެޗެއް ފަސްކޮށްފިއެވެ.

ހޯމަ ދުވަހަށް ފަސްކޮށްފައިވާ ސެމީފައިނަލް މެޗަކީ، އާދިއްތަ ދުވަހުގެ ރޭ 8:00 ގައި ކުޅެން ތާވަލު ކޮށްފައިވާ، މުބާރާތުގެ އަންހެން ބައިން ކަސްޓަމްސް އަދި މިނިސްޓްރީ އޮފް ޔޫތް އެންޑް ސްޕޯޓްސް (އެމްވައިއެސް) ބައްދަލުކުރާ ސެމީ ފައިނަލް މެޗެވެ.

މި މެޗް ފަސްކުރި ވަކި ސަބަބެއް ވީއޭއެމްއިން ހާމަކޮށްފައި ނުވި ނަމަވެސް، އިތުބާރުހުރި ގޮތަކަށް ރާއްޖެ އެމްވީއަށް މައުލޫމާތު ލިބިފައިވާ ގޮތުގައި، މި މެޗް ފަސްކޮށްފައިވަނީ ސެމީގައި އެއްކޮޅުން ވާދަކުރާ އެމްވައިއެސް ޓީމުގެ 3 ކުޅުންތެރިއެއްގެ މައްސަލަ ވީއޭއެމްއިން ބަލަމުން ދާތީއެވެ.

ރާއްޖެ އެމްވީއަށް މައުލޫމާތު ލިބިފައިވާ ގޮތުގައި، އެމްވައިއެސް ޓީމަށް ނިސްބަތް ވާ ތިން ކުޅުންތެރިއަކު އެޓީމަށް ކުޅެމުންދަނީ ގަވައިދާ ހިލަފަށް ކަމަށް ބުނެ، މުބާރާތުގައި ވާދަ ކުރާ 2 ޓީމަކުން ވަނީ މައްސަލައެއް ހުށައަޅާފައެވެ.

ކަސްޓަމްސް އާއި އޭވިއޭޝަން ސެކިއުރިޓީ ކޮމާންޑް ޓީމުން ވީއޭއެމްއަށް ހުށައަޅާފައިވާ މި މައްސަލާގައި އެ ދެ ޓީމުންވެސް ވަނީ ގަވާއިދާ ހިލާފަށް ކުޅޭ ކަމަށް ތުހުމަތު ކުރާ ތިން ކުޅުންތެރިންގެ ނަމާއި ޖާރސީ ނަމްބަރު ހާމަކޮށްފައެވެ. މީގެ އިތުރުން އެ ތިން ކުޅުންތެރިން ކުޅެނީ ގަވާއިދާ ހިލާފަށް ކަމަށް ތުހުމަތުކުރާ ސަބަބު ވެސް ހާމަކޮށްފައި ވާކަމަށް ރާއްޖެ އެމްވީއަށް ވަނީ މައުލޫމާތު ލިބިފައެވެ. ނަމަވެސް މިކަމާ ގުޅޭގޮތުން ކޮމެންޓެއް ހޯދުމަށްޓަކާ ރާއްޖެ އެމްވީއިން، ވީއޭއެމްގެ ފަރާތުން އަހުމަދު ޝާފީ އާއި ސުވާލުކުރުމުން ޝާފީ ވިދާޅުވީ، މެޗު ފަސް ކުރި ސީދާ ސަބަބެއް އަދި ފަސް ކުރި ވަގުތެއް މިވަގުތު ހާމަކުރެވެން ނެތް ކަމަށާއި، ނަމަވެސް މުބާރާތުގައި ވާދަކުރާ ޓީމެއްގެ މައްސަލައެއް ބަލަމުންދާ ކަމަށެވެ.

އެއީ ކޮން ޓީމަކާ ބެހޭ މައްސަލައެއްތޯ ސުވާލުކުރުމުން ޝާފީ ވިދާޅުވީ، މުބާރާތުގައި ވާދަކުރާ އެއްވެސް ދެޓީމެއް ދޭތެރޭގައި މައްސަލަ ޖެހި ހަމަނުޖެހުމެއް ހިނގަން އެފަރާތުން ބޭނުން ނުވާ ކަމަށާ، މިއީ ބަލަމުންދާ މައްސަލައަކަށް ވުމުން އިތުރު މައުލޫމާތު ހާމަކުރެވެން ނެތް ކަމަށެވެ. ނަމަވެސް މުބާރާތުގެ އެއްވެސް ޝަކުވާއެއް ވާނަމަ ކޮންމެ ޓީމަކުންވެސް ލިއުމަކުން އެ ޝަކުވާއެއް ހުށައެޅުމަށް އެދިފައި ވާނެ ކަމަށާއި، އެގޮތުގެ މަތިން ހުށައެޅިފައިވާ މައްސަލައެއް ބަލަމުންދާ ކަމަށް ޝާފީ ވިދާޅުވިއެވެ.

މެޗު ފަސްކޮށްފައިވަނީ ހޯމަ ދުވަހުގެ ކޮން ވަގުތަކަށް ކަމެއް ވީއޭއެމްއިން ހާމަ ނުކުރި ނަމަވެސް ބޮޑަށް ބެލެވޭ ގޮތުގައި މި މެޗް ކުޅެވޭނީ ހޯމަ ދުވަހުގެ ހަވީރުއެވެ.