ސްރީލަންކާ އިން ސާކް އެމެޖެންސީ ފަންޑަށް ފަސް މިލިއަން ޑޮލަރު
23 މާރިޗު 2020 | ހޯމަ 09:57ރާއްޖެއިން ވަނީ ދެ ލައްކަ ޑޮލަރު ހަދިޔާކޮށްފައި
ލަންކާގެ ރައީސް ގޯޓާބެއާއި އިންޑިއާގެ ބޮޑު ވަޒީރު ނަރެންދްރަ މޯދީ
ސާރކްގެ ގައުމުތަކުން ކޮވިޑް-19 އާއި ދެކޮޅަށް މަސައްކަތް ކުރުމުގެ ގޮތުން ހުޅުވަން ނިންމި އެމަޖެންސީ ފަންޑަށް އަވަށްޓެރި ސްރީލަންކާ ފަސް މިލިއަން އެމެރިކާ ޑޮލަރު ހަދިޔާކޮށްފި އެވެ.
އެކަން ހާމަކޮށްފައިވަނީ އިންޑިއާ ސަރުކާރުގެ ގައުމީ ރޭޑިއޯ ސްޓޭޝަންގެ އޮފިޝަލް ޓްވިޓަރ އެކައުންޓުންނެވެ.
ސާކް އެމެޖެންސީ ފަންޑަށް ނޭޕާލާއި، އަފްގާނިސްތާނުން ވަނީ އެއް މިލިއަން ޑޮލަރު ހަދިޔާ ކޮށްފައެވެ. ދިވެހިރާއްޖެ އިން ސާކް އެމެޖެންސީ ފަންޑަށް ދެ ލައްކަ ޑޮލަރު އަދި ބޫޓާނުން ވަނީ އެއް ލައްކަ ޑޮލަރު ހަދިޔާކޮށްފަ އެވެ. ޕާކިސްތާނުން ފަންޑަށް ހަދިޔާކުރަނީ ކިހާ އަދަދެއްގެ ފައިސާއެއް ކަމެއް އަދި މިހާތަނަށް ހާމަކޮށްފައެއް ނުވެއެވެ.
ސާރކް އެމަޖެންސީ ރިލީފް ފަންޑެއް ގާއިމް ކުރެއްވުމަށް މޯދީ ހުށަހެޅުއްވީ މި މަހުގެ 15 ވަނަ ދުވަހު ސާރކްގެ ގައުމުތަކުގެ އިސްވެރިން ބޭއްވި ވީޑިއޯ ކޮންފަރެންސްގަ އެވެ. މޯދީ ވިދާޅުވީ ފަންޑު ފުރަތަމަ އެކުލަވާލައްވާ އިރު، އިންޑިއާ އިން 10 މިލިއަން ޑޮލަރު އެ ފަންޑަށް ޖަމާކުރައްވާނެ ކަމަށެވެ. މޯދީގެ މި ނިންމުމަށް ރައީސް އިބްރާހިމް މުހައްމަދު ސޯލިހާއި އަފްގާނިސްތާނާއި ބޫޓާނުން ވެސް ވަނީ ތާއިދުކޮށް މަރުހަބާ ދަންނަވާފައެވެ.
މި ފަންޑަކީ މެންބަރު ގައުމުތަކުން ވޮލެންޓިއަރކޮށް ކޮންޓްރިބިއުޓް ކުރާ ފަންޑަކަށް ހެދިދާނެ ކަމަށާއި، ފެށުމުގެ ގޮތުން އިންޑިއާއިން 10 މިލިއަން ޑޮލަރު ފަންޑަށް ޖަމާކުރައްވާނެ ކަމަށް މޯދީ ވިދާޅުވިއެވެ. މީގެ އިތުރުން ސަރަހައްދީ ގައުމުތަކަށް ބޭނުންވާ ސިއްހީ އަދި ތަކެތީގެ އެހީތެރިކަން ފޯރުކޮށްދެއްވާނެ ކަމަށެވެ.
