ބްރޯޑްކޮމް ހުސްވެފައިވާ މަގާމުގެ ލިސްޓުގެ ކުރީގައި އަމީނާ އާއި ފަޒީން!
ލިސްޓުގެ ކުރީގައި ހިމެނެނީ އަނާ އަދި ފަޒީން
އަމީނާ އަދި ފަޒީން
މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ހުސްވެފައިވާ މަޤާމަށް ޢާއްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކުރުމަށް ފަހު ތަޅުމަށްފޮނުވާ ލިސްޓުގެ ކުރީގައި ވީޓީވެ ނޫސްވެރިޔާ އަމިނަތު އަމީނާ އަދި ރާއްޖެޓީވީގެ ނޫސްވެރިޔާ މުހައްމަދު ފަޒީން ހިމެނިއްޖެއެވެ.
ޤާނޫނު ނަންބަރު 16/2010 (ބްރޯޑްކާސްޓްކުރުމުގެ ޤާނޫނު) ގެ 3 ވަނަ މާއްދާގެ ދަށުން އުފައްދާފައިވާ މޯލްޑިވްސް ބްރޯޑްކާސްޓިންގ ކޮމިޝަނަށް 1 (އެކެއް) މެންބަރަކު ޢައްޔަނުކުރެއްވުމަށްޓަކައި، ރައީސުލްޖުމްހޫރިއްޔާ ނަންފުޅު ފޮނުއްވާފައިވާ ފަރާތްތަކާ ކޮމިޓީން އިންޓަރވިއު ކުރެއްވުމަށްފަހު، ރައްޔިތުންގެ މަޖިލީހުގެ ޤަވާއިދުގެ 201 ވަނަ މާއްދާގެ(ޅ) ގައިވާ ގޮތުގެމަތިން ރައްޔިތުންގެ މަޖިލީހުގެ ތަޅުމަށް ފޮނުއްވާނެ ނަންފުޅު ކަނޑައެޅުއްވުމަށްޓަކައި ކޮންމެ ނަންފުޅަކަށް ވަކިވަކިން ވޯޓަށް އަހާފައިވެއެވެ. އެގޮތުން ތިރީގައިވާ ނަންފުޅުތަކަކީ މޯލްޑިވްސް ބްރޯޑްކާސްޓިންގ ކޮމިޝަނުގެ މެންބަރުކަމަށް ޢައްޔަންކުރެއްވުމަށް ރުހުން ދިނުމަށް ފެންނަކަމަށް، މިނިވަން މުއައްސަސާތަކުގެ ކޮމިޓީގެ ބައްދަލުވުމަށް ހާޒިރުވެވަޑައިގެން ވޯޓު ދިން މެންބަރުންގެ 2/3 (ތިންބައިކުޅަ ދެބައި) އަޣުލަބިއްޔަތުން ފާސްވެފައިވާ ފަރާތްތަކެވެ.
ލިސްޓުގެ އެންމެ ކުރީގައި އޮތީ ވީޓީވީގެ ނޫސްވެރިޔަ އައިމިނަތު އަނާ އަދި ރާއްޖެޓީވީގެ ނޫސްވެރިޔާ މުހައްމަދު ފަޒީންއެވެ.
ކޮމިޓީން ފޮނުވާ ނަންތަކަށް މަޖިލީހުގެ ތަޅުމުގައި ވޯޓަށް އަހާނީ އެލިސްޓުގެ ތަރުތީބުންނެވެ. އޭގެތެރެއިން ފުރަތަމަ ނަމަށް ވޯޓަށް އަހާ އެ ނަން ތަޅުމުން ފާސްވެއްޖެނަމަ ދެން ހުރި ނަންތަކަކަށް ވޯޓަކަށް ނާހާނެއެވެ.
މި މަޤާމަކީ، އެ ކޮމިޝަނުގެ ނައިބު ރައީސްގެ މަޤާމުގައި ހުންނެވި ފާތިމަތު ޒައިނާ ވަކިކުރަން މަޖިލީހުން ފާސްކުރުމުން ހުސްވެފައިވާ މަޤާމެކެވެ. އެގޮތުން ފެބްރުއަރީ މަހުގެ 12 ވަނަ ދުވަހު ކޮމިޝަނަށް މެންބަރަކު ޢައްޔަނުކުރުމަށް ޢާންމުކޮށް ހުޅުވާލުމުން ކުރިމަތިލީ ފަރާތްތަކުގެ ތެރެއިން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙަށް ފެނިވަޑައިގެންނެވި 15 ނަމެއް ދިރާސާ ކުރުމަށް ވަނީ ކޮމިޓީއަށް ފޮނުވާފައެވެ.
