ކޮވިޑް-19: ގަޑިޔާތައް ވެސް ބަންދުކޮށްފި
ގާޑިޔާތައް ބަންދުކޮށްފައިވަނީ ހޮނިހިރު ދުވަހުގެ ރޭ 00:00 ޖެހިއިރު
ސިޓީ ކައުންސިލުން ގާޑިޔަލެއްގައި ހަރުކޮށްފައިވާ އިއުލާން
ކޮވިޑް-19 އާ ގުޅިގެން ގާޑިޔާތައް ވެސް ބަންދުކޮށްފިއެވެ.
މާލެސިޓީ ކައުންސިލުން ނެރުނު އިއުލާނެއްގައި ބުނެފައިވަނީ މާލެ ސަރަހައްދުގައި ކާބޯތަކެތީގެ ހިދުމަތް ދޭ ތަންތަން އާންމުންނަށް ބަންދުކުރުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެންގުމުން، އެކައުންސިލްގެ ބެލުމުގެ ދަށުން ހިންގާ ގާޑިޔާތައް ވެސް ބަންދުވާނެ ކަމަށެވެ. އެގޮތުން ގާޑިޔާތައް ބަންދުކޮށްފައިވަނީ ހޮނިހިރު ދުވަހުގެ ރޭ 00:00 ޖެހިއިރުއެވެ.
މިކަމާއި ގުޅިގެން އެޗްޕީއޭ އިން ނެރުނު ބަޔާނުގައި ބުނެފައިވަނީ މާލެ، ހުޅުމާލެ އަދި ވިލިމާލޭގައި ހިންގާ ކެފޭ، ހޮޓާ، ރެސްޓޯރެންޓް ފަދަ އާންމުންނަށް ކާބޯތަކެތީގެ ހިދުމަތްދޭ އެންމެހާ ތަންތަނުގައި ޓޭކްއަވޭ އާއި ޑެލިވަރީގެ ހިދުމަތް ފިޔަވާ އެހެނިހެން ހިދުމަތްތައް ދިނުން ހުއްޓާލުމަށް އަންގާ ކަމަށެވެ. އަދި އެ އެންގުމަށް ހުރިހާ ފަރާތްތަކުން ވެސް އަމަލު ކުރުމަށް ވެސް އެޗްޕީއޭ އިން ވަނީ އިލްތިމާސްކޮށްފައެވެ.
ކާބޯތަކެތީގެ ހިދުމަތްދޭ އެންމެހާ ތަންތަން މިހާރު އާންމުންނަށް ބަންދުކުރެވިފައިވާއިރު އެތަންތަން ބަންދުކުރުމަށް އަމުރުކޮށްފައިވަނީ ކިހާ މުއްދަތަކަށް ކަމެއް އެޗްޕީއޭ އިން ހާމައެއް ނުކުރެއެވެ.
ސަރުކާރުގެ ފަރާތުން އަންނަނީ ކޮވިޑް-19 މި ބަލިން ރައްކާތެރިވުމަށްޓަކައި އަޅަންޖެހޭ އެންމެހޭ ފިޔަވަޅުތައް އެޅުމުގެ މަސައްކަތް ކުރަމުންނެވެ. އަދި އެޗްޕީއޭ އިންނާއި ޑޮކްޓަރުން ވެސް ދަނީ އާންމުން ގިނަ ތަންތަނަށް އެއްވެ ނޫޅުމަށް ރައްޔިތުންނަށް އިލްތިމާސްކުރަމުންނެވެ.
