ގެސްޓުން އެއަރޕޯޓަށް ފޮނުވުމުގެ ކުރިން ފްލައިޓް ކެންސަލް ނުވާކަން ކަށަވަރު ކުރުމަށް ގެސްޓް ހައުސް އެސޯސިއޭޝަން އިން ގޮވާލައްވައިފިއެވެ.

ގެސްޓް ހައުސް އެސޯސިއޭޝަން އިން ބުނީ މިހާރަކަށް އައިސް، ރާއްޖޭން ބޭރަށް ފުރުވާލުމަށް އެއަރޕޯޓަށް ގެންނަ ފަތުރުވެރިން، އެފަރާތްތަކުގެ ފްލައިޓް ގަޑިއަށްވުރެ ކުރިން އަދި ބައެއްފަހަރު އެއްދުވަސް ކުރިން ގެނެސް އެއަރޕޯޓުތެރެއަށް ދޫކޮށްލާކަން އެޖަމިއްޔާއަށް ފާހަގަ ކުރެވިފައިވާކަމަށެވެ.

ފްލައިޓް ގަޑިއަށްވުރެ އެތައް އިރެއްކުރިން ގެސްޓުން އެއަރޕޯޓުގައި ގެނެސް ބޭތިއްބުމަކީ އެފަތުރުވެރިންނަށް ނުހަނު ގިނަ ތަކުލީފުތަކެއް އުފުލަން ޖެހޭނެ ކަމެކެވެ.

އެ އެސޯސިއޭޝަން އިން ބުނީ މިދުވަސްކޮޅަކީ ވަރަށް ގިނަ އިންޓަނޭޝަނަލް ފްލައިޓްތަކެއްގެ ދަތުރުތައް ކެންސަލް ކުރަމުން އަންނަ ދުވަސްކޮޅަކަށް ވުމާއެކު، ގެސްޓުން އެއަރޕޯޓަށް ފޮނުވުމުގެ ކުރިން އެފަރާތްތަށް ދަތުރުކުރުމަށް ޓިކެޓްގައި ކަނޑައެޅިފައިވާ ފްލައިޓް ކެންސަލް ނުވާކަން ކަށަވަރު ކުރެއްވުމަށްފަހު ފޮނުއްވުމަކީ މުހިންމުކަމެއް ކަމަށެވެ.

ގެސްޓް ހައުސް އެސޯސިއޭޝަން އިން ބުނީ ރާއްޖޭގެ ފަތުރުވެރިކަން ދުނިޔެއަށް މަޝްހޫރުވެފައިވާ އެއް ސަބަބަކީ ދިވެހިންގެ ފަރާތުން ރާއްޖެ އަންނަ ޓޫރިސްޓުންނަށް ދޭ ފުރިހަމަ މެހުމާންދާރީ ކަމަށެވެ. އަދި އެހެން ކަންހިނގާނަމަ އެއީ ރާއްޖޭގެ ފަތުރުވެރިކަމުގެ އިންޑަސްޓްރީއާ ދޭތެރޭ އެފަރާތްތަކުން ދެކޭގޮތް ބަދަލުވެދާނެފަދަ ކަމެެއް ކަމަށެވެ.

ގެސްޓް ހައުސް އެސޯސިއޭޝަން އިން ބުނީ މި ދަތި ދަނޑިވަޅުގައި ރާއްޖޭގެ މުއައްސަސާތަކުން އަންގާއެންގުންތަކަށް އިހްތިރާމު ކުރުމާއި އެކު ފްލައިޓް ގަޑިއަށް ގެސްޓުން އެއަރޕޯޓަށް ގެނައުމަކީ އެފަރާތްތަކަށް އެންމެ ރަނގަޅުގޮތް ކަމަށެވެ. އެހެންކަމުން ރާއްޖޭގެ ގެސްޓްހައުސްތަކުން ފަތުރުވެރިން ފުރަން ކަނޑައަޅާފައިވާ ގަޑިއާ ވީހާވެސް ގާތް ގަޑިއަކު އެއަރޕޯޓަށް ފަތުރުވެރިން ގެނެސްދިނުމަށް އެޖަމުޢިއްޔާއިން ވަނީ އިލްތިމާސްކޮށްފައެވެ.