ކޮވިޑް-19: ކަރަންޓީން ފެސިލިޓީއަށް ނަގާ ރިސޯޓުތަކަށް ދައުލަތަކުން އެއްވެސް ހަރަދެއް ނުކުރޭ!
21 މާރިޗު 2020 | ހޮނިހިރު 10:09ދައުލަތުން ހަރަދެއް ނުކުރޭ
ކޮވިޑް-19 ޓާސްކް ފޯސްގެ ތަރުޖަމާނު މަބްރޫކް އަޒީޒް
ކަރަންޓީން ފެސިލިޓީއަށް ނަގާ ރިސޯޓުތަކަށް ދައުލަތުން އެއްވެސް ޚަރަދެއް ކުރަން ނުޖެހޭކަމަށް ކޮވިޑް-19 ގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ނެޝަނަލް އެމަރޖެންސީ އޮޕަރޭޝަންގައި ބޭއްވި ނޫސްވެރިންގެ ބައްދަލުވުމުގައި، މަބްރޫކް ވިދާޅުވީ އެއްވެސް ރިސޯޓަކަށް ދައުލަތުގެ ފަރާތުން ދައްކަން ޖެހޭ ކުއްޔެއް ނޯންނަ ކަމަށާއި، ކަރަންޓީން ފެސިލިޓީގެ ގޮތުގައި ރިސޯޓުތައް ހަދަނީ އެ ރިސޯޓުގެ މެނޭޖްމަންޓްގެ އިސްނެގުމުގެ މަތިންކަމަށެވެ. ދައުލަތުގެ ފަރާތުން ހަމައެކަނި ކުރާ ޚަރަދެއްގެ ގޮތުގައި މަބްރޫކް ވިދާޅުވީ ކަރަންޓީން ފެސިލީޓީގައި ތިބޭ ފަރާތްތަކަށް ކުރާ ކެއިންބުއިމުގެ ޚަރަދާއި ކަރަންޓާއި ފެނަށް ކުރާ ޚަރަދުކަމަށެވެ. އަދި މި ޚަރަދުތައް ބަލަހައްޓަނީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީންކަމަށް މަބްރޫކް ވަނީ ފާހަގަކުރައްވާފައެވެ.
ބޭރު ޤައުމުތަކުން ރާއްޖެ އައި މީހުންގެ ތެރެއިން ކަރަންޓީން އަދި އައިސޮލޭޝަންގައި ތިބި ފަރާތްތަކަށް އެފަރާތްތަކުގެ ޢާއިލާ ތަކުން ތަކެތި ފޮނުވުމުގެ އިންތިޒާމުވެސް ސަރުކާރުގެ ފަރާތުން މީގެކުރިން ވަނީ ހަމަޖައްސައިދީފައެވެ. މިހާތަނަށް ދިވެހިރާއްޖޭގެ 20 ރަށެއްގައި 641 ކަރަންޓީނު ފެސިލިޓީއެއް ގާއިމު ކުރެވިފައިވާ ކަމަށް ސަރުކާރުން ވަނީ ހާމަކޮށްފައެވެ. އިތުރު ކަރަންޓީން ފެސިލިޓީ ރިސޯޓުތަކުގައި ޤާއިމުކުރުމަށް ހެލްތު މިނިސްޓަރ ރިސޯޓުތަކާއި މަޝްވަރާ ކުރަމުންދާކަމަށް ތަރުޖަމާނު މަބްރޫކް އަޒީޒް ވަނީ ވިދާޅުވެފައެވެ.
