ކޮވިޑް-19: އިންޑިއާއަށް އެހެން ގައުމުތަކުން އަންނަ ފްލައިޓްތައް މެދުކަނޑާލައިފި

އިންޑިއާއަށް އެހެން ގައުމުތަކުން އަންނަ ފްލައިޓްތައް ވަގުތީގޮތުން މެދުކަނޑާލައިފި އެވެ.

ރިޕޯޓުތައް ބުނާގޮތުންނަމަ، އަންނަ އާދިއްތަ ދުވަހުން ފެށިގެން އެެއްހަފުތާގެ މުއްދަތަކައް، އިންޓަނޭޝަލް ފްލައިޓްތަކަށް އިންޑިއާއަށް ދަތުރުނުކުރެވޭނެއެވެ. މިއީ ކޮވިޑް-19 އިން ރައްކާތެރިވުމުގެ ގޮތުން އެޅި ފިޔަވަޅެއް ކަމަށް، އެޤައުމުގެ ދަތުރުފަތުރާއި ބެހޭ ވުޒާރާގެ އިސް މަސްއޫލުވެރިން ބުނެއެވެ.

އިންޑިއާގައި ހަލުހި މިނެއްގައި ކޮވިޑް-19 ފެތުރެމުންދާތީ އިންޑިއާގެ ބޮޑުވަޒީރު ނަރެންދްރަ މޯދީ ވަނީ މިދުވަސްވަރު ގޭގައި ތިބެގެން މަސައްކަތްތައް ކުރިއަށް ގެންދިއުމަށާއި، ޚާއްސަކޮށް 65 އަހަރަށްވުރެ މަތީ މީހުން ގޭގައި ތިބުމަށް އިލްތިމާސްކޮށްފައެވެ.

ކޮވިޑް-19 ގެ ޙާލަތައް ބެލުމަށްފަހު ކުރިއަށް އޮތްތަނުގައި އިތުރު ފިޔަވަޅުތައް އަޅަމުން ގެންދާނެ ކަމަށް އިންޑިއާ ސަރުކާރުން ވަނީ ހާމަކޮށްފައެވެ.

އެންމެފަހުގެ ތަފާސް ހިސާބުތައް ދައްކާ ގޮތުން މިހާތަނަށް އިންޑިއާއިން 197 މީހަކު ވަނީ ކޮވިޑް-19އަށް ޕޮޒިޓިވްވެފައެވެ. އަދި 08 މީހަކު ރަނގަޅުވެފައިވާއިރު، 4 މީހުން ވަނީ މިބަލީގައި މަރުވެފައެވެ.