ގަތަރާއި ގުޅުން ކަނޑާލި ބައެއް ގައުމުތަކުން ނެރުނު އާ ބްލެކްލިސްޓަކީ "ހިތާމަވެރި ހައިރާންކަމެއް" ކަމަށް ގަތަރުން ސިފަކޮށްފި

ގަތަރާއި ޑިޕްލޮމެޓިކް ގުޅުން ކަނޑާލައިފައިވާ ބައެއް ގައުމުތަކުން، ޓެރަރިޒަމަށް ވާގިވެރިވާ ޖަމާއަތްތަކާއި ފަރުދުން ހިމެނޭ ލިސްޓެއް ކަމަށް ބުނެ ނެރެފައިވާ އާ ބްލެކްލިސްޓަކީ "ހިތާމަވެރި ހައިރާންކަމެއް" ކަމަށް ގަތަރުން ބުނެފިއެވެ.

ގަތަރުގެ ސަރުކާރުގެ ކޮމިއުނިކޭޝަންސް ޑައިރެކްޓާ ޝެއިޚް ސައިފް ބިން އަހްމަދު އަލް ސާނީ ބުދަ ދުވަހު ވިދާޅުވީ ގަތަރާއި ގުޅުން ކަނޑާލައިފައިވާ ހަތަރު ގައުމަކުން އެކުލަވާލި ބްލެކްލިސްޓަށް އިތުރު 18 ޖަމާއަތަކާއި ފަރުދުން އިތުރު ކުުރިއިރު އެ ލިސްޓަކީ އެއްވެސް އަސާސެއްގެ މައްޗަށް އެކުލެވިގެންވާ ލިސްޓެއް ނޫން ކަަމަށެވެ. އޭނާ އިތުރަށް ވިދާޅުވީ ގަތަރާއި ދެކޮޅަށް ބައެއް ގައުމުތަކުން ކުރާ ގޯސް ކެމްޕެއިން އަދިވެސް ކުރިއަށް ގެންދާތީ ނުހަނު ހައިރާންވާ ކަމަށެވެ.

ގަތަރާއި ގުޅުން ކަނޑާލި ބައެއް ގައުމުތަކުން ނިމިދިޔަ ޖޫން މަހު އެކުލަވާލި ލިސްޓުގައި ފުރަތަމަ ހިމެނުނީ 12 ޖަމާއަތަކާއި 59 މީހަކު ހިމެނެއެވެ. އެއަށް އަލުން އިތުރު ކުރި ލިސްޓުގައި ޔަމަނާއި އަދި ލީބިއާ އަށް ނިސްބަތްވާ ނުވަ ޖަމާއަތެއް ހިމެނެއެވެ.

ނިމިދިޔަ ޖޫން މަހު ސައުދީ، މިސްރު، ޔޫއޭއީ އަދި ބަހްރައިން އިން ޓެރަރިޒަމަށް ވާގިވެރިވާ ފަރުދުންނާއި އަދި ޖަމާއަތްތައް ކަމަށް ބުނެ އެކުލަވާލި ބްލެކްލިސްޓުގައި ހިމެނޭ ފަރާތްތަކަކީ ލިސްޓު އެކުލަވާލި ގައުމުތަކުން ބުނާ ގޮތުން ގަތަރާއި ގުޅުން އޮންނަ ފަރާތްތަކެވެ.

ގަތަރުން ޓެރަރިޒަމަށް ހިއްވަރު ދޭ ކަމަށް ބުނެ ގަތަރާއި އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ކަނޑާލީ ޖޫން މަހުގެ ތެރޭގައެވެ. ގަތަރާ ގުޅުން ކަނޑާލި އަރަބި ގައުމުތަކަކީ ސައުދީ އަރަބިއްޔާ، ޔޫއޭއީ، މިސްރު، ބަހްރައިން, ޔަމަން އަދި ލީބިޔާ އެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރެއެވެ. ޑިޕްލޮމެޓިކް ގުޅުން ކަނޑާލި ގައުމުތަކުން ދަނީ ގަތަރަށް އެކި ގޮތްގޮތުން ފިއްތުންތައް ކުރިމަތި ކުރަމުންނެވެ.