އިޓަލީގެ ޔުވެންޓަސްއަށް ކުޅެމުން އަންނަ ޑިފެންޑަރު ޑެނިއަލް ރުގާނީ އޭނާގެ ހާލު ރަނގަޅު ކަމަށް ބުނެފިއެވެ.

ރުގާނީ އަކީ އިޓާލިއަން ލީގުން ކޮރޯނާވައިރަސް (ކޮވިޑް-19) އަށް އެންމެ ފުރަތަމަ ޕޮޒިޓޮވްވި ކުޅުންތެރިޔާއެވެ. ރުގާނީ ބުނީ އޭނާގެ ހާލު ފެށުނީއްސުރެ ރަނގަޅުކަމަށާއި، ސީރިއަސް އަލާމާތެއް އޭނާގެ ފަރާތުން ނުފެންނަ ކަމަށެވެ.

އިޓާލިއަން ލީގުގައި ކުޅެމުން އަންނަ 12 ކުޅުންތެރިން ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައިވާއިރު، ރުގާނީ ބުނީ އޭނާ ޕޮޒިޓިވްވިކަން މީޑިއާތަކުން ރިޕޯޓުކުރުމާއިއެކު ވަރަށް ގިނަ ފަރާތްތަކުން އޭނާއަށް މެސެޖުކުރި ކަމަށާއި އެ ހުރިހާ އެންމެންއަށް ޝުކުރުއަދާކުރާ ކަމަށެވެ.

މީގެ އިތުރުން ރުގާނީ ބުނީ ކޮރޯނާވައިރަސް (ކޮވިޑް-19) އަށް މީހުން ހޭލުންތެރިވާން ޖެހޭ ކަމަށާއި ހާއްސަކޮށް މިކަމުގެ ސީރިއަސްކަން ނޭގި ތިބި މީހުން މިކަމުން އިބުރަތް ހާސިލްކުރަން ޖެހޭ ކަމަށެވެ. މިބަލި ހާލަތުން އަރައިގަންނާނެ ކަމަށް ބުނަމުން ރުގާނީ ބުނީ އޭނާ މިކަމުން އަރައިގަންނާނީ ކުރިޔަށްވުރެ ވަރުގަދަކޮށް ކަމަށާއި އަދި މިބަލި ޖެހިފައިތިބި ހުރިހާ ކުޅުންތެރިންވެސް މި ބަލިން އަރައިގަންނާނެ ކަމަށް އުންމީދުކުރާ ކަމަށެވެ.

ޔުވެންޓަސްގެ ޖޭ ހޮޓަލުގައި ކަރަންޓީނުކޮށް ފަރުވާ ހޯދަމުން އަންނަ ރުގާނީ ބުނީ އެކަނި އޮންނަން ޖެހުމުން އުނދަގޫވާ ކަމަށާއި އެންމެންނާއި ބައްދަލުވާން ކެތްމަދުވެފައިހުރި ކަމަށެވެ. މީގެ އިތުރުން ރުގާނީ ވަނީ އެކަނި އޮންނަން ޖެހުމުން ނެޓްފްލިކްސްގެ ހުރިހާ ސީރީސް އެއް ބެލިއްޖެ ކަމަށްވެސް ބުނެފައެވެ.

ރުގާނީގެ އިތުރުން ޔުވެންޓަސްގެ މިޑްފީލްޑަރު ބްލައިސް މަޓުއިޑީ ވެސް ވަނީ ކޮރޯނާވައިރަސް (ކޮވިޑް-19) އަށް ޕޮޒިޓިވްވެފައެވެ. އިޓަލީގެ އިތުރުން ސްޕެއިންގެ ވެލެންސިއާގެ ކުޅުންތެރިންތަކަކާއި އިނގިރޭސިވިލާތުގެ އާސެނަލްގެ ކޯޗު މިކޭލް އާޓެޓާ އާއި ޗެލްސީގެ ކުޅުންތެރިޔަކުވެސް ވަނީ މި ވައިރަހަށް ޕޮޒިޓިވްވެފައެވެ.

ޔޫރަޕުގައި މިހާރު ފެތުރެމުން އަންނަ ކޮރޯނާވައިރަސް (ކޮވިޑް-19) އާއި ގުޅިގެން ފުޓްބޯޅައިގެ ހުރިހާ މުބާރާތެއްހެން މިހާރު ވަނީ ފަސްކޮށްފައެވެ.