ތިންބާރުގައި ހިމެނިވަޑައިގަންވާ ބޭފުޅުންނާއި މިނިވަން މުއައްސަސާތަކުގެ މެންބަރުންގެ މުސާރައިން %20 ކުޑަކުރުމަށް މަޖިލީހުން ފާސްކޮށްފި

ރައްޔިތުންގެ މަޖިލީހުގެ މެންބަރުންނާއި، ރައީސުލްޖުމްހޫރިއްޔާ އަދި ނައިބު ރައީސް އާއި ފަނޑިޔާރުންގެ އިތުރުން މިނިވަން މުއައްސަސާތަކުގެ މެމްބަރުންގެ މުސާރައިގެ 20 ޕަސެންޓް ދެމަސް ދުވަހަށް އުނި ކުރުމަށް ރައްޔިތުންގެ މަޖިލީހުން ފާސްކޮށްފި އެވެ.

މިގޮތަށް ފާސްކޮށްފައިވަނީ މިމައްސަލަ ދިރާސާކުރި މާލިއްޔަތު ކޮމިޓީގެ ރިޕޯޓް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 74 މެމްބަރުންގެ ވޯޓުންނެވެ.

މެންބަރުންގެ މުސާރައިގެ 20 ޕަސެންޓު އުނިކުރުމުގެ މަސައްކަތް ފެށީ އެމްޑީޕީގެ ޕީޖީން ނެވެ. އެގޮތުން މުސާރައިގެ 20 ޕަސެންޓް ކުޑަކުރުމަށް އެމްޑީޕީގެ ޕާލަމެންޓްރީ ގްރޫޕުން މަޖިލީހުގެ ރައީސް ، ރައީސް މުހައްމަދު ނަޝީދު މެދުވެރިކޮށް މާލިއްޔަތު ކޮމިޓީއަށް ހުށަހަޅާފަ އެވެ.

މިމައްސަލަ ދިރާސާކުރުމަށް ފަހު މާލިއްޔަތު ކޮމިޓީން ނިންމާފައިވަނީ ރައްޔިތުންގެ މަޖިލީހުން ކަނަޑައަޅަންޖެހޭ މުސާރައިގެ ޢިނާޔަތްތަކުގެ ތެރެއިން އަސާސީ މުސާރައިގެ ގޮތުގައި -/ 30,000 (ތިރީސް ހާސް) ރުފިޔާ އަދި އެއަށްވުރެ މަތިން ކަނޑައަޅާފައިވާ މުސާރަތަކުން، މާރިޗު އަދި އެޕްރީލް 2020 އަށްވާ އަސާސީ މުސާރައިން %20 (ވިހިއިންސައްތަ) އުނިކުރުމަށެވެ. އަދި އެ ނިންމުން ކޮމިޓީން ކޮންމެ މަހަކު އެއްފަހަރު މުރާޖަޢާކުރުމަށްވެސް ކޮމިޓީން ވަނީ ނިންމާފަ އެވެ.

ރައްޔިންތުންގެ މަޖިލީހުގެ މެމްބަރެއްގެ މުސާރައަކީ މަހަކު 42،00 ރުފިޔާއެވެ. މުސާރައިގެ 20 އިންސައްތަ އަކީ 8400 ރުފިޔާ އެވެ. އެހެންކަމުން އަސާސީ މުސާރައިގެ ބައިން ދެން މެމްބަރުންނަށް ލިބިވަޑައިގަންނަވާނީ 33,600 ރުފިޔާ އެވެ.

މީގެއިތުރުން 20،000 ރުފިޔާގެ ލިވިންގް އެލަވަންސާއި ކޮމިޓީ އެލަވަންސްގެ ގޮތުގައި 20،000 ރުފިޔާ މެމްބަރުންނަށް ލިބިވަޑައިގަންނަވާނެއެވެ. އޭގެ ތެރެއިން ކޮމިޓީ އެލަވަންސަކީ މެމްބަރުގެ ކޮމިޓީ ހާޒިރީއަށް ބަލާފައި ދޭ އެލަވަންސެކެވެ.