ކޮވިޑް-19:ވައިރަސްއަށް ޕޮޒިޓިވްވިތާ އެއް ހަފުތާ ފަހުން ޓޮމް ހޭންކްސް އާއި އަންހެނުން ހޮސްޕިޓަލުން ދޫކޮށްލައިފި
18 މާރިޗު 2020 | ބުދަ 04:55ޓޮމް އާއި އަންހެނުން ރީޓާ މިހާރު ތިބީ ގޭގައި އެކަހެރިކޮށްފައި
ޓޮމް ހޭންކްސް އާއި ރީޓާ ވިލްސަން
ކޮވިޑް-19 އަށް ޕޮޒިޓިވްވި، ހޮލީވުޑްގެ މަޝްހޫރު ފިލްމީ ތަރި ޓޮމް ހޭންކްސް ހޮސްޕިޓަލުން ދޫކޮށްލައިފިއެވެ.
ޓޮމް އާއި އަންހެނުން އަދި ލަވަކިޔުންތެރިޔާ ރީޓާ ވިލްސަން ކޮރޯނާވައިރަސްއަށް ޕޮޒިޓިވްވިކަން އިއުލާންކޮށްފައިވަނީ މީގެ ހަފުތާއެއް ކުރިންނެވެ. ދެމަފިރިން ކޮވިޑް-19 އަށް ޕޮޒިޓިވްކަން އެނގިފައިވަނީ އޮސްޓްރޭލިއާގެ ކްއީންސްލޭންޑްގައި ހުއްޓައި ރޯގާގެ އަސަރު ފެނުމުން ޑޮކްޓަރަށް ދެއްކުމުންކަމަށް ޓޮމް ބުނެފައިވެއެވެ.
ޓޮމް އާއި ރީޓާ ހޮސްޕިޓަލުން ދޫކުރިކަން ވެސް ހާމަކޮށްފައިވަނީ ސޯޝަލް މީޑިއާ މެދުވެރިކޮށެވެ.
އަންގާރަ ދުވަހު ކުރި ޕޯސްޓެއްގައި ޓޮމް ބުނީ ދެ މީހުން ހޮސްޕިޓަލުން ދޫކޮށްލާފައިވާކަމަށާއި، މިހާރު ތިބީ ގޭގައި އެކަހެރި ކޮށްފައިކަމަށެވެ. މީގެ އިތުރުން، އަދިވެސް ކުރިއެކޭ އެއް އަލާމާތްތައް ހުރިނަމަވެސް "މިހާރު ހުމެއް ނެތް"ކަމަށް އޭނާ ބުންޏެވެ.
އަދި އޮސްޓްރޭލިއާއަށް ދަތުރުކުރީ ޓައިޕްރައިޓަރެއް ހިފައިގެންކަމަށް ބުނެ، ޓޮމް ވަނީ މި ޓައިޕްރައިޓަރގެ ފޮޓޯއެއް ހިމަނާފައެވެ. އެއީ އެލްސީ ސްމިތު އެންޑް ކޮރޯނާ ޓައިޕްރައިޓަރސް އިންކްގެ "ކޮރޯނާ ސްޓެންޑަޑް" ޓައިޕްރައިޓަރއެކެވެ.
63 އަހަރުގެ މި ދެމަފިރިން އޮސްޓްރޭލިއާގައި ތިބީ ފިލްމެއްގެ މަސައްކަތުގައެވެ. އެއީ މަޝްހޫރު ކަންޓްރީ ލަވަކިޔުންތެރިޔާ އެލްވިސް ޕްރެސްލީގެ ހަޔާތުގެ މައްޗަށް ތައްޔާރުކުރާ ފިލްމެކެވެ.
1988 ވަނަ އަހަރު ކައިވެނިކުރި ޓޮމް އާއި ރީޓާގެ ހަތަރު ކުދިން ތިބެއެވެ.
