ހަފުތާއެއްގެ ތެރޭގައި 8 ލައްކައަށް ވުރެ ގިނަ ޓެސްޓު ކުރުމުގެ ކެޕޭސިޓީ އެބަހުރި: ޖަރމަނީ

ހަފުތާއެއްގެ ތެރޭގައި ކޮވިޑް-19 އަށް 8 ލައްކައަށް ވުރެ ގިނަ ޓެސްޓު ކުރުމުގެ ކެޕޭސިޓީ އެބަހުރި ކަމަށް ޖަރުމަނުގެ ނެޝަނަލް ސެންޓަރ ފޮރ ޑިޒީސް ކޮންޓްރޯލް އިން ބުނެފިއެވެ.

ކޮވިޑް-19 އަށް ޓެސްޓުކުރުން އިތުރުކުރުމަކީ މުހިންމުކަމެއް ކަމަށް ވާއިރު، ޖަރުމަނުގެ ލެބުތަކުން ވަނީ އެޤައުމުގައި ކޮވިޑް-19 އަށް ޓެސްޓު ކުރެވޭ ކެޕޭސިޓީ އިތުރުކޮށްފައެވެ. އެގޮތުން ދުވާލެއްގެ މައްޗަށް 141,815 ޕީސީއާރު ޓެސްޓު ހެދުމުގެ ކެޕޭސިޓީ އެބަހުރިކަމަށެވެ.

ދުވާލެއްގެ މައްޗަށް އެއް ލައްކަ އަށް ވުރެ ގިނަ ޓެސްޓު ހެދޭއިރު ހަފުތާއެއްގެ ތެރޭގައި 860,494 ޓެސްޓު ހެދޭނެ ކަމަށެވެ.

ޖަރުމަނުގެ ލެބުތަކުން ޓެސްޓު ކުރެވޭ ކެޕޭސިޓީ އިތުރުކޮށްފައިވާއިރު ފާއިތުވި ހަފުތާގައި ޖަރުމަނުން ކޮށްފައިވަނީ 467,137 ޓެސްޓެވެ. ފާއިތުވެދިޔަ 24 ގަޑިއިރު ތެރޭގައި ޖަރުމަނުން ރިޕޯޓުކޮށްފައިވަނީ 1478 ކޭސްއެވެ. އަދި ފާއިތުވެ ދިޔަ 24 ގަޑިއިރު ތެރޭގައި 173 މީހުން މި ބަލީގައި މަރުވެފައިވެއެވެ.

ޖަރުމަނުން ވަނީ މި ބަލި ކޮންޓްރޯލް ކުރުމުގައި ބޮޑެތި ކުރިއެރުންތަކެއް ހޯދާފައެވެ. މި ކުރިއެރުމުގެ ފަހަތުގައި ވަނީ ޓެސްޓު ކުރެވޭ މިންވަރު އިތުރުކުރުން ކަމަށް އެޤައުމުން ބުނެއެވެ.

ބަލި ކޮންޓްރޯލް ކުރުމުގައި ބޮޑެތި ކުރިއެރުންތަކެއް ހޯދާފައިވާއިރު، ޖަރުމަނު ސަރުކާރުން ވަނީ ކޮވިޑް-19 އާއި ގުޅިގެން އެޤައުމުގައި އަޅާފައިވާ ފިޔަވަޅުތަކެއް ލުއިތަކެއް ދިނުމަށް ވަނީ ނިންމާފައެވެ.