ފަރަންސޭސްވިލާތުގައި ލޮކްޑައުން އުވާލިތާ ދެ ހަފުތާ، ވައިރަސް ޖެހޭ އަދަދު ދަށަށް

ފަރަންސޭސްވިލާތުގައި ކޮވިޑް-19 ފެތުރޭ މިންވަރު ކުރިޔަށްވުރެ ބޮޑަށް ދަށަށް ގޮސް، އައިސީޔޫގައި ފަރުވާދެމުންދާ މީހުންގެ އަދަދުތައް ދަށަށް ދާން ފަށާފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފި އެވެ.

ފަރަންސޭސްވިލާތުގައި ވައިރަސް ފެތުރުން ކޮންޓްރޯލް ކުރުމަށް އެޅި ލޮކްޑައުން އުވާލިތާ ދެ ހަފުތާ ވެފައިވާއިރު ވައިރަސް ފެތުރޭ މިންވަރު ދަށަށް ގޮސްފައިވުމަކީ، އާންމުން އިޖުތިމާޢީ ގައިދުރުކަން ބަހައްޓާކަމުގެ ނިޝާނެއްކަމަށް އެގައުމުގެ ހެލްތު މިނިސްޓްރީން ބުނެ އެވެ.

ހެލްތު މިނިސްޓްރީގެ ޑޭޓާ ތަކުން ދައްކާގޮތުގައި ހޮނިހިރު ދުވަހު އެގައުމުގައި އަލަށް ވައިރަސް ޖެހުނީ 250 މީހުންނަށެވެ. އެއީ 0.2 އިންސައްތަ އިތުރުވުމެކެވެ. ފާއިތުވި ހަތް ދުވަސް ތެރޭގައި އެވްރެޖްކޮށް ކޭސްތައް މައްޗަށް ޖެހިފައިވަނީ 0.3 އިންސައްތައިގަ އެވެ. ލޮކްޑައުންގެ އެންމެ ފަހު ހަފްތާގައި ކޭސްތައް މައްޗަށް ޖެހިފައިވަނީ 0.8 އިންސައްތައިގަ އެވެ.

ލޮކްޑައުން އުވާލާ ލުއި ތަކެއް ދީފައިވާ ސްޕެއިން އަދި އިޓަލީ އަށް ބަލާލާއިރުވެސް ފާއިތުވި ހަތް ދުވަސް ތެރޭގައި ކޭސްތައް މައްޗަށް ގޮސްފައިވަނީ 0.3 އިންސައްތައިގަ އެވެ.

ފަރަންސޭސްވިލާތުގައި ހޮސްޕިޓަލްގައި ފަރުވާ ދެމުން ގެންދާ މީހުންގެ އަދަދުތައް ވެސް ވަނީ ދަށަށްދާން ފަށާފަ އެވެ. އެގޮތުން ހޮނިހިރު ދުވަހު ފަރުވާ ދީފައިވަނީ 205 މީހުންނަށެވެ. އަދި މި އަދަދުތައް ފާއިތުވި ފަސް ހަފުތާގައި ވަނީ އެއް މިންވަރެއްގައި ދަށަށްދާން ފަށާފަ އެވެ.

އޭޕްރީލް މަހުގެ 14 ވަނަ ދުވަހު ހޮސްޕިޓަލްތަކުގައި ފަރުވާދެމުން ގެންގޮސްފައިވަނީ 32،292 މީހުންނަށެވެ. މިހާރު އެއަދަދުތައް ދަށަށް ގޮސްފައިވަނީ ދުވާލަކަށް 1665 މީހުންގެ ނިސްބަތުން 2.1 އިންސައްތައިގަ އެވެ.

ވައިރަސް އަލަށް ޖެހޭ މީހުންގެ ނިސްބަތާއި ހޮސްޕިޓަލުތަކުން ރަނގަޅުވެގެން ދޫކޮށްލާ ނިސްބަތް ފްރާންސްގެ ސަރުކާރުން ގާތުން ބަލަމުންދާއިރު މިކަންކަމަކީ ކުރިޔަށް އޮތް ތަނުގައި ލޮކްޑައުންގައި އަޅާފައިވާ ފިޔަވަޅުތަކަށް އިތުރު ލުއި ތަކެއް ދޭއިރު ބަލާނެ ކަންކަމެވެ.

ފަރަންސޭސްވިލާތުގެ ހެލްތު މިނިސްޓްރީގެ ހިސާބުތައް ދައްކާގޮތުން، ވައިރަސް ޖެހިގެން މަރުވި މީހުންގެ އަދަދު ހުރީ 28،332 އެވެ. ދިހަ ދުވަސް ވަންދެން ސްޕެއިނަށް ވުރެ ގިނައިން މީހުން މަރުވެގެން ރިޕޯޓްކުރަމުން އައިސް އެ ގައުމުން ރިޕޯޓްކުރާ އަދަދުތައް ވަނީ ސްޕެއިން އަށް ވުރެ ދަށަށް ޖެހިލާފަ އެވެ.

ހޮނިހިރު ދުވަހާ ހަމައަށް އައިއިރު ސްޕެއިންގައި މަރުވި މީހުންގެ އަދަދު ހުރީ 28،678 ގަ އެވެ. އެއާއެކު ސްޕެއިން މިހާރު ވެގެންގޮސްފައިވަނީ ހަތަރު ވަނަ އަށް އެންމެ ގިނަ މީހުން މަރުވެގެން ރިޕޯޓްކުރެފައިވާ ގައުމަށެވެ.