އޮޑިޓް ރިޕޯޓާއި އަހަރީ ރިޕޯޓު އީސީއަށް ހުށަހެޅީ އެމްޑީޕީ އާއި ޖޭޕީން އެކަނި
17 މާރިޗު 2020 | އަންގާރަ 07:05އޮޑިޓް ރިޕޯޓު ހުށަހަޅާފައިވަނީ 2 ޕާޓިން އެކަނި
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
މިއަދުގެ ނިޔަލަށް އޮޑިޓް ރިޕޯޓާއި އަހަރީ ރިޕޯޓު ހުށަހަޅާފައިވަނީ ހަމައެކަނި އެމްޑީޕީއާއި ޖުމްހޫރީ ޕާޓިން އެކަނި ކަމަށް އިލެކްޝަންސް ކޮމިޝަނުން ބުނެފިއެވެ.
އަންގާރަ ދުވަހު އީސީން ކޮށްފައިވާ ޓުވީޓެއްގައި ބުނެފައިވަނީ، މިއަދާއި ހަމަޔަށް އޮޑިޓް ރިޕޯޓާއި އަހަރީ ރިޕޯތު ހުށަހަޅާފައިވާ ސިޔާސީ 2 ޕާޓީއަށް ގާނޫނުގައި ދޭން ކަނޑައަޅާފައިވާ ގޮތުގެ މަތީން ފައިސާ ދޫކުރުމަށް އެ ކޮމިޝަނުން މިއަދު ނިންމާފައިވާކަމަށެވެ. އެގޮތުން މިހާތަނަށް އެ ލިޔެކިޔުންތައް ހުށަހަޅާފައިވާ ހަމައެކަނި 2 ޕާޓީއަކީ އެމްޑީޕީއާއި ޖުމްހޫރީ ޕާޓީކަމަށް ކޮމިޝަންގެ ޓުވީޓުގައި ވަނީ ފާހަގަކޮށްފައެވެ.
ސިޔާސީ ޕާޓީތަކަށް ފައިސާ ދޭ އުސޫލަށް ބަލާއިރު އެންމެ ބޮޑު ޕަސެންޓެއް އޮންނަނީ ސިޔާސި ގޮތުން ޕާޓީ ހަރަކާތްތެރިވާ މިންވަރަށް ބެލުމަށްފަހު ފައިސާ ދިނުމެވެ. އެ މިންގަޑުގެ ގޮތުގައި ބަލަނީ ރައްޔިތުންގެ މަޖިލީހުގެ އިންތިޚާބުގައި ޕާޓީތަކުން ބައިވެރިވެ އެޕާޓީން ހޯދާ ވޯޓުގެ ނިސްބަތެވެ.
ދެވަނަ ކަމަކަށް ފައިސާ ދޫކުރަނީ ދައުލަތުގެ ބަޖެޓުން ދޫކުރާ ފައިސާގެ ތެރެއިން ޕާޓީ ހިންގުމަށް ދޫކުރާ ވަކި ޕަސެންޓެކެވެ. މިހާރުވެސް އޮންނަ އުސޫލުން 10000 މެމްބަރުންނަށް ވުރެ މެމްބަރުން އިތުރު ޕާޓީތަކަށް، މެމްބަރޝިޕަށް ބަލާފަ ފައިސާ ދެވޭނެއެވެ.
