ކައުންސިލްތައް ދުސްތޫރީ ހުސްކަމަކަށް ދާތީ، އިންތިހާބީ މައްސަލަ ސުޕްރީމް ކޯޓަށް ހުށަހަޅައިފި
މައްސަލަ ކުރިން ވެއްދީ ހައިކޯޓަށް
އިލެކްޝަންސް ކޮމިޝަންގެ ރައީސް އަހްމަދު ޝަރީފް އަދި ނައިބު ރައީސް އަހްމަދު އަކުރަމް
ކުރިޔަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ވޯޓުލުން މުއްދަތެއް ނެތްގޮތަށް ފަސްކުރުމުގެ އަމުރަކަށް އެދި އިލެކްޝަންސް ކޮމިޝަނުން ހައިކޯޓަށް ހުށައެޅި މައްސަލަ އަނބުރާ ނެގުމަށްފަހު، ސުޕްރީމް ކޯޓަށް ހުށަހަޅައިފިއެވެ.
ސުޕްރީމް ކޯޓުން ހައިކޯޓަށް ހުށަހެޅި މައްސަލަ ނެގުމަށްފަހު ސުޕްރީމް ކޯޓަށް ހުށަހަޅާފައި މިވަނީ، މުއްދަތެއް ނެތްގޮތަށް ވޯޓުލުން ފަސްކުރުމުން، މިހާރު ތިބި ކައުންސިލަރުންގެ ދަރު ހަމަވެ، ކައުންސިލްތައް ދުސްތޫރީ ހުސްކަމަކަށް އަންނާނެތީ އެވެ. އެހެންކަމުން މިމައްސަލަ ސުޕްރީމް ކޯޓަށް ހުށަހަޅާފައިވަނީ ދުސްތޫރީ މައްސަލައެއްގެ ގޮތުގައެވެ.
މި މައްސަލަ ހައިކޯޓަށް ހުށައެޅީ އިލެކްޝަންސް ކޮމިޝަނުންނެވެ. މިކަން އިއުލާންކުރައްވާ ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ރައީސް އަހުމަދު ޝަރީފް ވިދާޅުވީ، މި ވަގުތު ހާލަތަށް ރިއާޔަތްކޮށް އިންތިހާބުގެ ވޯޓުލުން ކުރިން ކަނޑައަޅާފައިވާ ތާރީހުގައި ކުރިއަށް ގެންދިއުމަކީ ވާނެ ކަމެއް ނޫން ކަމަށެވެ.
ލޯކަލް ކައުންސިލް އިންތިހާބު އެންމެ ފުރަތަމަ ބާއްވަން ހަމަޖެހިފައި އޮތް ތާރީހަކީ އެޕްރިލް މަހުގެ 4 އެވެ. ނަމަވެސް، ފަހުން އިލެކްޝަންސް ކޮމިޝަނުން ވަނީ އިންތިހާބު ބާއްވާ ތާރީހު އެޕްރިލް 18 އަށް ބަދަލުކޮށްފައެވެ.
ދުސްތޫރީ މައްސަލައެއްގެ ގޮތުގައި އިލެކްޝަންސް ކޮމިޝަންގެ ފަރާތުން ހައިކޯޓަށް އެ މައްސަލަ ވައްދާފައިވާއިރު، އެ މައްސަލައިގެ ތެރެއަށް ސިޔާސީ ޕާޓީތަކުން ތަދައްހުލު ވާނެ ކަމަށް ބެލެވެއެވެ. ކޮމިޝަންގެ ރައީސް ޝަރީފް ވިދާޅުވީ އިންތިހާބުގެ ވޯޓުލުން އެކަނި ފަސްކުރަން ހުށައެޅީ، މިހާރު ކޮށްފައިވާ ހަރަދުތައް އަލުން ބަލުން ނުކުރަން ކަމަށެވެ.
