ސިއްހީ ފަންނުވެރިން ދަރުމަވެރިންގެ ގޮތުގައި ނުކުތުމަށް ގޮވާލައްވައިފި
16 މާރިޗު 2020 | ހޯމަ 07:54ވައިރަސް ނައްތާލުމަށް ގައުމީ ފެންވަރުގައި ދަނީ މަސައްކަތް ކުރަމުން
އޭޑީކޭގެ މެނޭޖިންގ ޑިރެކްޓަރ އަހުމަދު އައްފާލް
ގައުމުގައި ފުރަތަމަ ފަހަރަށް އާއްމު ސިއްހަތުގެ ކުއްލި ނުރައްކާ އިއުލާނު ކޮށްފައިވާ މި ދަނޑިވަޅުގައި ސިއްހީ ފަންނުވެރިން ދަރުމަވެރިންގެ ގޮތުގައި ނުކުތުމަށް އޭޑީކޭގެ މެނޭޖިންގ ޑިރެކްޓަރ އަހުމަދު އައްފާލް ގޮވާލައްވައިފިއެވެ.
ރާއްޖެޓީވީން ކުރިއަށް ގެންދާ ކޮވިޑް-19ގެ ލައިވް ކަވަރޭޖްގައި އައްފާލް ވިދާޅުވީ ވަރަށް ގިނަ ސިއްހީ ފަންނުވެރިން ވަޒީފާ އަދާ ނުކޮށް އެކި ސަބަބުތަކަށްޓަކައި ގޭގައި ތިބޭ ކަމަށާއި، ގައުމުގައި ފުރަތަމަ ފަހަރަށް އާއްމު ސިއްހަތުގެ ކުއްލި ނުރައްކާ އިއުލާނު ކޮށްފައިވާ މިދަނޑިވަޅުގައި އެފަދަ ފަރާތްތަކުން ދަރުމަވެރިންގެ ގޮތުގައި ނުކުތުން ވަރަށް މުހިންމު ކަމަށެވެ.
އައްފާލް ވިދާޅުވީ ކޮވިޑް-19 ފެތުރިގެންދާއިރު ވައިރަސް ނައްތާލުމަށް ގައުމީ ފެންވަރުގައި މަސައްކަތްތަކުގައި އެންމެންގެ އެއްބާރުލުމާއި އެހީތެރިކަން ބޭނުންވާ ކަމަށާއި، ބަލި ކޮންޓްރޯލް ކުރުމުގައި ހުރިހާ ރައްޔިތުން ވެސް ފަރުދީ ޒިންމާ ނެގުން މުހިންމު ކަމަށެވެ.
އައްފާލް ވިދާޅުވީ ކޮވިޑް-19 އިން ރައްކާތެރިވުމަށް އަޅަމުންދާ ފިޔަވަޅުތަކުގެ ތެރޭގައި ޚާއްސަ އިސްކަމެއްދީގެން އާންމުން ހޭލުންތެރިކުރުމުގެ މަސައްކަތް ކުރަމުންދާ ކަމަށެވެ. އަދި ސަރުކާރުން ނިންމާ ނިންމުންތަކުގެ އިތުރުން އާންމުން ކުރާ މަސައްކަތްތަކުގައި އެފަރާތްތަކުން ބޭނުންވާ ފަންނީ ލަފާ ވެސް ދެމުންދާ ކަމަށެވެ.
މިވައިރަސް އިތުރަށް ނުފެތުރުމަކީ އުންމީދުކަން ފާހަގަކުރައްވައި އައްފާލް ވިދާޅުވީ ނަމަވެސް މިހާރު މަސައްކަތް ކުރަނީ ތައްޔާރީ ހަލުގައި ތިބުމަށް ކަމަށެވެ.
އޭޑީކޭ ހޮސްޕިޓަލުން ކޮވިޑް-19 އާ ދެކޮޅަށް ކުރަމުންދާ މަސައްކަތުގެ ދަށުން އޮންލައިން ފްލޫ ކްލިނިކެއް ވަނީ މިމަހުގެ 14 ވަނަ ދުވަހު ހުޅުވާފައެވެ. އޮންލައިންކޮށް ފްލޫ ކްލިނިކްގެ ހިދުމަތް ހޯދަން ބޭނުންވާ ފަރާތްތަކަށް ހެނދުނު 8:00 ން ރޭގަނޑު 8:00 އަށް އެޕޮއިންޓްމެންޓް ހެއްދޭއިރު، މި ޚިދުމަތް އެހޮސްޕިޓަލުން ފޯރުކޮށްދެނީ ހިލޭއެވެ.
އަރިދަފުސް ރޯގާ އާއި ހުމުގެ އެއްވެސް އަލާމާތެއް ހުރި މީހެއް ނަމަ ނުވަތަ ރާއްޖެއިން ބޭރަށް ދަތުރުކޮށްފައި އައި ފަހުން ބަލީގެ އެއްވެސް އަލާމާތެއް ފެންނަ ނަމަ އޮންލައިން ފްލޫ ކްލިނިކަށް ދެއްކޭނެ އެވެ.
