ވެލެންސިއާ ފަސް ކުޅުންތެރިއަކު ކޮރޯނާވައިރަހަށް ޕޮޒިޓިވްވެއްޖެ

މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އަށް ވެލެންސިއާގެ ފަސް ކުޅުންތެރިއަކު ޕޮޒިޓިވްވެއްޖެ އެވެ.

ސްޕެނިޝް ލީގުން އެންމެ ފުރަތަމަ މި ވައިރަހަށް ޕޮޒޓިވްވެގެން ރިޕޯޓުކޮށްފައިވަނީ އެޓީމުގެ ޑިފެންޑަރު އެޒެކުއެލް ގަރާއި އެވެ. އޭގެ ފަހުން އެޓީމުގެ އިތުރު ހަތަރު ކުޅުންތެރިއަކު މި ވައިރަހަށް ޕޮޒިޓިވްވެފައިވާ ކަމަށް އެ ކްލަބުން ވަނީ ބުނެފައެވެ. ނަމަވެސް އެއީ ކޮން ކުޅުންތެރިންނެއް ކަމެއް ހާމަކޮށްފައެއް ނުވެއެވެ. ފަސް ކުޅުންތެރިންގެ އިތުރުން އެޓީމުގެ ބައެއް ސްޓާފުންވެސް ވަނީ މި ވައިރަހަށް ޕޮޒިޓިވްވެފައެވެ.

ވެލެންސިއާގެ ފަސް ކުޅުންތެރިއަކު ކޮރޯނާވައިރަސް (ކޮވިޑް-19) އަށް ޕޮޒިޓިވްވިއިރު، ސްޕެނިޝް ލީގުގެ މެޗުތައް މިހާރު ވަނީ މެދުކަނޑާލާފައެވެ. ސްޕެނިޝް ލީގު މެދުކަނޑާލިއިރު، ރެއާލް މެޑްރިޑްގެ ބާސްކެޓްބޯޅަ ކުޅުންތެރިއަކު ކޮރޯނާވައިރަސް (ކޮވިޑް-19) އަށް ޕޮޒިޓިވްވުމުން، ރެއާލްގެ ފުޓްބޯޅަ ޓީމުވެސް މިހާރު ވަނީ ކަރަންޓީނު ކޮށްފައެވެ.

ސްޕެއިނުން މިހާތަނަށް 7،753 މީހުން ކޮރޯނާވައިރަހަށް ޕޮޒިޓިވް ވެފައިވާއިރު، 291 މީހުން ވަނީ މިބަލީގައި މިހާތަނަށް މަރުވެފައެވެ.

ވެލެންސިއާގެ ފަސް ކުޅުންތެރިންގެ އިތުރުން އިޓާލިއަން ލީގުގެ ގިނަ ކުޅުންތެރިންތަކެއްވެސް މިހާތު ވަނީ މި ވައިރަހަށް ޕޮޒިޓިވްވެފައެވެ. އެއީ ފިއޮރެންޓީނާގެ ފޯވާޑް ޕެޓްރިކް ކުޓްރޯން އާއި ޑިފެންޑަރު ޖާމަން ޕެޒެއްލާ އާއި ފޯވާޑް ޑޫޝަން ވްލާހޮވިޗް ގެ އިތުރުން ޔުވެންޓަސްގެ ޑިފެންޑަރު ޑެނިއެލް ރުގާނީ އާއި ސަމްޕްޑޯރިއާގެ ފޯވާޑް މަނޯލޯ ގަބިއަޑިނީ އެވެ. އަދި ސަމްޕްޑޯރިއާގެ އިތުރު ކުޅުންތެރިންތަކެއްވެސް މި ވައިރަހަށް ޕޮޒިޓިވްވެފައއިވާ ކަމަށް އެޓީމުން ވަނީ ބުނެފައެވެ. އެކަމަކު އެއީ ކޮން ކުޅުންތެރިންނެއް ކަމެއް ހާމަކޮށްފައެއް ނުވެއެވެ.

އިންގްލެންޑުން މިހާތަނަށް މި ވައިރަސް ޖެހިފައިވަނީ އާސެނަލްގެ ކޯޗު މިކޭލް އާޓެޓާ އާއި ޗެލްސީގެ ޒުވާން ފޯވާޑް ކަލުމް ހަޑްސަން-އޮޑޯއި އަށެވެ.