ފޯރ ސީޒަންސް މޯލްޑިވްސް އިން ކޯވިޑް-19 އަށް ޝައްކުކުރެވޭ ދެ ބިދޭސީއެއް ޓެސްޓުކުރުމުގެ މަސައްކަތް ފަށައިފިއެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނީ ރައްކާތެރިކަމުގެ ގޮތުން ޢަމަލު ކުރަމުންދާ އުޞޫލުގެ ދަށުން، ކޯވިޑް19 އަށް ޝައްކުކުރެވޭ އަލާމާތްތައް ހުރެގެން ފޯރ ސީޒަން މޯލްޑިވްސް އިން 2 ބިދޭސީއެއްގެ ސާމްޕަލް ނަގާ ޓެސްޓްކުރުމުގެ މަސައްކަތް ކުރިޔަށް ދާ ކަމަށެވެ. އަދި ޓެސްޓްގެ ނަތީޖާ ލިބެންދެން އެރިސޯޓުގައި މޮނީޓަރ ކުރެވެމުން ދާ ކަމަށެވެ.

މީގެ އިތުރުން އާވީ ނޭޗަރސް ޕެރެޑައިސް މޯލްޑިވްސް ރިސޯޓުން ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރި މީހަކު ވަނީ ގޭގައި އެކަހެރިކޮށްފައެވެ. އަދި އެ ރިސޯޓު ވަނީ މޮނީޓަރިންގެ ހާލަތަަށް ގެނެވިފައި ކަމަށް އެޗްޕީއޭ އިން ބުންޏެވެ.

ރާއްޖެއިން މިހާތަނަށް ކޮވިޑް-19 އަށް 13 މީހަކު ވަނީ ޕޮޒިޓިވްވެފައެވެ. އެ އެންމެންނަކީވެސް ބިދޭސީންނެވެ. އަދި މިހާތަނަށް މި ރޯގާއަށް އެއްވެސް ދިވެއްސަކު ޕޮޒިޓިވްއެއް ނުވެއެވެ.