ވިޔަފާރިވެރިންނަށް ސިޔާސީ ފިއްތުމާއި ނުފޫޒު ފޯރުވުން ނިމުމަކަށް އަންނަން ބާކީ އޮތީ ފަސް ދުވަސް ކަމަށް ދިއްގަރު ދާއިރާގެ މެންބަރު އަހުމަދު ފާރިސް މައުމޫން ވިދާޅުވެއްޖެ އެވެ.
އެމްޑީޕީއާއި ޕީޕީއެމާއި ޖުމްހޫރީ ޕާޓީގެ އިތުރުން އަދާލަތު ޕާޓީ ގުޅިގެން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ފާރިސް ވިދާޅުވީ ވިޔަފާރިވެރިންނަށް ފިއްތުމާއި ނުފޫޒް ފޯރުވުން ނިމުމަކަށް އަންނަން ބާކީ އޮތީ ފަސް ދުވަސް ކަމަށާއި އޭގެ ފަހުން މިނިވަންކަމާއެކު މަސައްކަތް ކުރެވޭނެ ކަމަށެވެ.
"އޭގެ ފަހުން އެބޭފުޅުންނަށް މިނިވަންކަމާއެކު އެބޭފުޅުންގެ ހުރި ހުނަރުވެރިކަމާއެކީގައި އެބޭފުޅުން އިންވެސްޓް ކުރައްވަން ބޭނުންފުޅު ގޮތަކަށް ރާއްޖޭގެ ގާނޫނުތަކާއި ގަވާއިދުތަކާ އެއްގޮތްވާ ގޮތުގެ މަތިން ވިޔަފާރި ކުރެއްވޭނެ،" ފާރިސް ވިދާޅުވި އެވެ.
ފާރިސް ވިދާޅުވީ ސިޔާސީ ނުފޫޒު ނުވަދެ ވިޔަފާރިވެރިންނަށް ވިޔަފާރި ކުރެވޭނެ މަގު ފަހުކޮށްދިނުމަށް މަޖިލިސް ތެރެއިން ކުރެވެން ހުރި ހުރިހާ ކަމެއް ކޮށްދެއްވާނެ ކަމަށެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރުގެ މައްސަލައަށް އިޝާރާތް ކުރައްވާ ފާރިސް ވަނީ މަޖިލިސް މެންބަރުންނަށް ހިތްވަރު ދެއްވުމަށް ވިޔަފާރިވެރިންނަށް ގޮވާލައްވާފަ އެވެ.
"މި ދުވަސްކޮޅު މި މަދު ދުވަސްކޮޅު އަޅުގަނޑުމެންނަށް ހިތްވަރު ދެއްވާށޭ، އަޅުގަނޑުމެންގެ ތެރެއިން ބަޔަކަށް ވެސް ފިއްތުންތައް އެބަ އާދެއޭ، އެ އިންޒާރުތައް އެބަ އާދެއޭ، ވިޔަފާރިވެރިންނަށް ވެސް ހަމަ އެހެނޭ މިކަންތައް މިއޮތީ، އަޅުގަނޑުމެންނާއެކީގައި ތިއްބަވައި ދެއްވާށޭ،" ފާރިސް ވިދާޅުވި އެވެ.
ފާރިސް ވިދާޅުވީ މަޖިލީހުގައި މަސައްކަތް ކުރެވޭނެ މާހައުލެއް ގާއިމްވުމުން ވިޔަފާރިވެރިންގެ އަތުން ނުހައްގުން އަތުލާފައިވާ ހައްގުތައް ވެސް އަނބުރާ ހޯދައިދެއްވާނެ ކަމަށެވެ.
