ކޮވިޑް-19:ޗައިނާއަށް އެތެރެވާ މީހުންގެ ގައިން ވައިރަސް ފެންނާތީ ފިޔަވަޅުތައް ވަރުގަދަކޮށްފި
15 މާރިޗު 2020 | އާދީއްތަ 15:46މަރޗް 14 ވަނަ ދުވަހު އެގައުމުން މިވައިރަސް އަލަށް ފެނިފައިވާ 20 މީހުންގެ ތެރެއިން 16 މީހުންނަކީ އެގައުމަށް އެތެރެވި މީހުން
ޗައިނާގައި ވައިރަސް އިން ރައްކާތެރިވުމަށް މާސްކު އަޅައިގެން
ޗައިނާއިން އެހެން ގައުމުތަކުން އެތެރެވާ ފަރާތްތަކުން ކޮވިޑް-19 ގެ އަސަރު ފެންނަމުންދާތީ ބެއިޖިންގ ގެ އެއަރޕޯޓްގައި ފިޔަވަޅުތައް ވަރުގަދަކޮށްފި އެވެ.
ކޮވިޑް-19 އެންމެ ފުރަތަމަ ފެނިފައިވަނީ ޗައިނާއިންނެވެ. އެއީ މިދިޔަ އަހަރުގެ ޑިސެމްބަރ މަހު އެވެ. އެހެންނަމަވެސް ފާއިތުވެގެންދިޔަ ދެ ހަފްތާއެއްގެ ތެރޭގައި ޗައިނާގައި ވަނީ މިވައިރަސް ފެތުރޭ މިންވަރު ބޮޑުތަނުން ދަށްކޮށްފަ އެވެ. މަރޗް 14 ވަނަ ދުވަހު އެގައުމުން މިވައިރަސް އަލަށް ފެނިފައިވަނީ 20 މީހުންގެ ގައިންނެވެ. އޭގެތެރެއިން 16 މީހުންނަކީ އެގައުމަށް އެތެރެވި މީހުންނެވެ.
ބެއިޖިންގ ވަނީ ބައިނަލްއަގްވާމީ ހުރިހާ ފްލައިޓްތަކެއް ޑެކްސިންގ އިންޓަރނޭޝަނަލް އެއަރޕޯޓަށް ޖެއްސުމަށް ބަދަލުކޮށްފަ އެވެ. އަދި އާދިއްތަ ދުވަހު ވަނީ ބެއިޖިންގ އަށް އަންނަ ފަރާތްތައް ކޯޑަންކޮށްގެން މިމީހުން ސްކްރީންކުރަން ވަކި ސަރަހައްދުތަކެއް ކަނޑައަޅާފަ އެވެ. އަދި ބެއިޖިންގ ގައި ޓްރާންސިޓް ކުރާ ފަރާތްތަކަށްވެސް އެހީތެރިކަން ފޯރުކޮށްދެމުންދާނެ ކަަމަށް އެގައުމުން ބުނެ އެވެ.
ވައިރަސް ފެނުނު 16 މީހުންގެ ތެރެއިން 5 މީހުންނަކީ ބެއިޖިންގ އަދި 3 މީހުންނަކީ ޝެންހާއީން ފެނުނު މީހުންކަމަށް ޗައިނާއިން ބުނެ އެވެ. އަދި ބެއިޖިންގ އިން ފެނުނު ތިން މީހުންގެ ތެރެއިން އެކަކީ ސްޕެއިން އަދި އަނެކަކީ އިޓަލީ އަދި ދެން ހުރި މީހާއަކީ ތައިލެންޑުން އައި މީހުންކަމަށް އެގައުމުން ބުނެއެވެ.
ޝަންހާއިން ފެނުނު މީހުންނަކީ އިޓަލީގައި ދިރިއުޅޭ ޗައިނާގެ މީހުންކަމަށް އެގައުމުން ބުނެއެވެ.
ފާއިތުވި ދެ މަސްދުވަހު ޗައިނާގައި ހަލުވިކަމާއެކު މިވައިރަސް ފެތުރިފައިވާއިރު މިވައިރަސް އެންމެ ފުރަތަމަ ފެނުނު ހޫބޭ އިން މިވައިރަސްގެ އަސަރު ހުރި މީހަކު ނުފެންނަތާ މިއަދަށް މިއީ 10 ވަނަ ދުވަސްކަމަށް އެގައުމުން ބުނެއެވެ.
