ބްރެޒިލްގެ ރައީސް ޖައިރް ބޮލް ސޮނާރޯ ކޮވިޑް-19 އަށް ޕޮޒިޓިވްވެފައިވާ ކަމަށް އެ ގައުމުގެ ނޫސްތަކުން ރިޕޯޓްކޮށްފިއެވެ.

ބޮލް ސޮނާރޯގެ ދަރިފުޅު އެޑްވަރޑޯ ފޮކްސް ނިއުސް އަށް ދެއްވި އިންޓަވިއުއެއްގައި ވިދާޅުވީ، ކޮވިޑް-19 ހުރިތޯ ބެލުމަށް އިތުރު ޓެސްޓްތައް ހެދުމަށް ހަމަޖެހިފައިވާ ކަމަށާއި، ހުކުރު ދުވަހުގެ ހަވީރުގެ ވަގުތެއްގައި ޓެސްޓްތަކުގެ ނަތިއްޖާ ލިބޭނެ ކަމަށެވެ. ބްރެޒިލްގެ މީޑިއާތަކުން ރިޕޯޓްކޮށްފައިވާ ގޮތުން ކޮވިޑް-19 އަށް ޓެސްޓް ކުރެއްވުމަށް ފަހު ބޮލްސޮނާރޯގެ ހާލަތު ދަނީ މޮނިޓަރ ކުރެވެމުންނެވެ.

ބްރެޒިލްގެ ރައީސް ކޮވިޑް-19 އަށް ޕޮޒިޓިވްވެފައިވާއިރު، ދާދި ފްލޮރިޑާގައި ހުންނަ މާރ އަ ލާގޯ ރިސޯޓުގައި ބޭއްވި 'ޑިނަރ' އެއްގައި އެމެރިކާގެ ރައީސް ޑޮނަލްޑް ޓްރަމްޕް ވެސް ބައިވެރިވެ ވަޑައިގެންނެވިއެވެ. އެ ހަފްލާގައި ވައިރަށް ޕޮސިޓިވްވެފައިވާ ބްރެޒިލްގެ ރައީސްގެ ޕްރެސް ސެކްރެޓަރީއާއި ވަރަށް ގާތުގައި ޓްރަމްޕް އުޅުއްވިއެވެ. އަދި ރައީސުން ސަލާމް ކުރައްވާފައިވާކަން ވަނީ ހާމަވެފައެވެ. ކޮވިޑް-19 އަކީ ފަސޭހައިން ގައިންގަޔަށް އަރާ ބައްޔެކެވެ.

ނަމަވެސް ވައިޓް ހައުސްގެ ޕްރެސް ސެކްރެޓަރީ ބުރާސްފަތި ދުވަހު ނެރުނު ސްޓޭޓްމެންޓެއްގައި ބުނެފައިވަނީ އެމެރިކާގެ ރައީސް ޓްރަމްޕާއި އެމެރިކާގެ ނައިބު ރައީސް، ވައިރަސް އަށް ޕޮސިޓިވް ވި އެއްވެސް ފަރާތަކާއި 'އިންޓަރެކްޓް' ކޮށްފައި ނުވާކަމަށެވެ. އަދި ވައިޓް ހައުސްގެ މުވައްޒަފުންގެ ޞިއްޙަތާއި ރައްކާތެރިކަން ކަށަވަރުކުރުމަށްޓަކައި ވައިޓް ހައުސް މެޑިކަލް ޔުނިޓާއި، ޔުނައިޓެޑް ސްޓޭޓްސް ސީކްރެޓް ސަރވިސް އިން ވަރަށް ގާތުން މަސައްކަތް ކުރަމުން އަންނަ ކަމަށެވެ.