ރޯގާއަށް މަގުފަހިވާނެ އެއްވެސް ހަރަކާތެއް ކުރިއަކަށް ނުގެންދާނެ: އެމްޑީޕީ
11 މާރިޗު 2020 | ބުދަ 04:11އެއްވެ އުޅުމުގެ ހަރަކާތްތަކާއި ދޮރުން ދޮރަށް ހަރަކާތްތައް ކުރިއަށް ނުގެންދާނެ ކަމަށް ވިދާޅުވި
އެމްޑީޕީން ކުރިއަށް ގެންދިޔަ އަންހެނުންގެ ކޮންފަރެންސް ގެ ތެރެއިން
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މިހާރު ކުރިއަށް ގެންދާ "ރަށްވެހި ފަތިސް" ކެމްޕެއިންގައި ކޮވިޑް-19 އަށް މަގުފަހުވާނެ އެއްވެސް ހަރަކާތެއް ކުރިއަށް ނުގެންދާނެ ކަމަށް އެޕާޓީން ބުނެފިއެވެ.
ބުދަ ދުވަހު (އެމްޑީޕީ) ގެ ކެމްޕެއިންގެ ސްޕޯކްސްޕާސަން އަފްޝަން ލަތީފް ކުރައްވާފައިވާ ޓްވީޓެއްގައި ވަނީ އެޕާޓީން ކުރިއަށް ގެންދާ ކެމްޕޭންގައި އެއްވެ އުޅުމުގެ ހަރަކާތްތަކާއި ދޮރުން ދޮރަށް ހަރަކާތްތައް ކުރިއަށް ނުގެންދާނެކަމަށެވެ.
އޭގެ ބަދަލުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ) އާއި، ހެލްތު މިނިސްޓްރީ އަދި ދުނިޔޭގެ ސިއްޙަތު ޖަމްޢިއްޔާ (ޑަބްލިއުއެޗްއޯ) އިން ކޯވިޑް-19 އާއި ގުޅޭގޮތުން ޢާންމުކުރާ މަޢުލޫމާތާއި، ޚަބަރު އެމްޑީޕީގެ ކެންޕޭނު ޓީމުތަކުން ޢާންމުންނާ ޙިއްސާކުރަމުންދާނެކަމަށެވެ.
ދިވެހިރާއްޖެއިން ކޯވިޑް-19 ފެނިފައިވާތީ ބައްޔަށް މަގުފަހިވާ ބާވަތުގެ ކެންޕޭނުގެ އެއްވެސް ޙަރަކާތެއް ނުހިންގުމަށާއި، ސޯޝަލް މީޑިއާ އަދި މުއާޞަލާތީ ވަޞީލަތްތައް މެދުވެރިކޮށް ކުރިއަށް އޮތް ލޯކަލް ކައުންސިލް އިންތިޚާބުގެ ކެންޕޭނު ޙަރަކާތްތައް ކުރިއަށްގެންދިއުމަށް އެމްޑީޕީން ނިންމާފައިވަނީ ނިމިދިޔަ ހޮނިހިރު ދުވަހުގައެވެ.
އެމްޑީޕީން ނެރުނު ބަޔާނެއްގައި ބުނެފައިވަނީ އެ ޕާޓީއަކީ، 93000 އަށްވުރެ ގިނަ މެންބަރުން ތިބި، ދިވެހިރާއްޖޭގެ އެންމެ ބޮޑު ސިޔާސީ ޕާޓީކަމުގައިވާތީ، ރާއްޖޭގެ ކޮންމެ މީހުން ދިރިއުޅޭ ރަށަކާއި ގުޅިފައިވާ ވިއުގަ މެދުވެރިކޮށް ކެންޕެއިން މެސެޖުތަކާއެކު، ކޮވިޑް-19 އިން ސަލާމަތްވުމުގެ މައްޗަށް ޢާންމުންގެ ހޭލުންތެރިކަން އިތުރުކުރުމުގެ މަސައްކަތް ކުރިއަށް ގެންދިޔުމަށް ނިންމާފައިވާކަމަށެވެ.
