ޓެރަރިސްޓު ޙަމަލާއަކުން ސޫދާންގެ ބޮޑުވަޒީރު ޢަބްދުﷲ ހަމްދޮކް ސަލާމަތްވެވަޑައިގެންފިއެވެ.
ހޯމަ ދުވަހު ދިން މި ޙަމަލާއާ ގުޅޭގޮތުން ސޫދާންގެ ދަޢުލަތުގެ މީޑިއާއާ ޙަވާލާދީ ބައިނަލްއަޤުވާމީ ރިޕޯޓުތައް ބުނާގޮތުން، ޙަމަލާ ދީފައިވަނީ އެމަނިކުފާނު އިންނެވި މޮޓޯކޭޑަށް ޢަމާޒުކޮށެވެ. އެގޮތުން މޮޓޯކޭޑަށް ޢަމާޒުކޮށް ގޮވާތަކެތީގެ ޙަމަލާއެއްގެ އިތުރުން، ބަޑީގެ ޙަމަލާތަކެއް ވަނީ ޢަމާޒުކޮށްފައެވެ.
ވެރިރަށް ޚަރުތޫމުގައި ހިނގި މި ޙާދިސާގައި ބޮޑުވަޒީރު ޢަބްދުﷲ ހަމްދޮކްއަށް އެއްވެސް ހާނިއްކައެއް ނުވެއެވެ. އެ ޙަމަލާއަށް ފަހު، އެމަނިކުފާނު ވަނީ މޭޒުކޮޅުދޮށުގައި ހިނިތުންވެވަޑައިގެން އިންނެވި ފޮޓޮއެއް ޓްވިޓަރގައި ހިއްސާކުރައްވައި، ޙާލުކޮޅު ރަނގަޅުކަން ބަޔާން ކުރައްވާފައެވެ. އޭރު މޭޒުކޮޅު ފަހަތުގައި އެމަނިކުފާނަށް ޙަމަލާދިންކަމަށް ބުނާ ޚަބަރު ޓީވީން ދިޔައީ ވަގުތުން ދައްކަމުންނެވެ.
ނަމަވެސް މި ޙަމަލާގައި އެމަނިކުފާނުގެ ސެކިއުރިޓީ އޮފިސަރަކަށް ކޮންމެސް ވަރެއްގެ އަނިޔާތަކެއް ލިބިފައިވާއިރު، ބޭރުގެ ޚަބަރުތައް ބުނާގޮތުން ޙަމަލާދިން ވަގުތު ބޮޑުވަޒީރު ދަތުރު ކުރައްވަމުން ގެންދެވީ ރަސްމީ އޮފީހަށް ވަޑައިގަތުމަށެވެ.
މި ޙަމަލާގެ ޒިންމާ އެއްވެސް ބަޔަކު އަދި މިހާތަނަށް އުފުލާފައެއް ނުވެއެވެ.
ބޮޑުވަޒީރަށް ޢަމާޒުކޮށް މި ޙަމަލާދީފައިވާއިރު، މީގެ 2 މަހެއްހާ ކުރިން ސޫދާންގެ ވެރިރަށް ޚަރްތޫމް ސިޓީގައި ގްރެނޭޑެއް ގޮއްވާލައިގެން ދިން ޙަަމަލާއެއްގައި ހަތް މީހުން ވަނީ މަރުވެފައެވެ.
