ރަށްވެހި ފަތިސް ކެމްޕެއިން: ގދ. އަތޮޅުގެ ހުރިހާ ރަށަކަށް ރައީސް ނަޝީދު ވަޑައިގަންނަވަނީ

ކުރިޔަށް އޮތް ލޯކަލް ކައުންސިލް އިންތިޚާބުގައި އެމްޑީޕީގެ ކެމްޕެއިން ދަތުރުތަކާއި ގުޅިގެން، ގދ އަތޮޅުގެ ރަށްތަކަށް ރައީސް މުޙައްމަދު ނަޝީދު މިއަދު މެންދުރު ފުރާވަޑައިގަންނަވާނެކަމަށް އެމްޑިޕީން ބުނެފިއެވެ.

ކައުންސިލް އިންތިޚާބާއި ގުޅިގެން އެމްޑީޕީން ސިލްސިލާކޮށް ބާއްވާ ނޫސްވެރިންގެ ބައްދަލުވުމުގައި، ރަށްވެހި ފަތިސް ކެމްޕެއިންގެ ސްޕޯކްސްޕަރސަން އަފްޝަން ލަތީފް ވިދާޅުވީ، ރައީސް ނަޝީދު ގދ އަތޮޅަށް ބުދަ ދުވަހުގެ މެންދުރު ފަހު ފުރާވަޑައިގަންނަވާނެކަމަށާއި، މި ދަތުރުފުޅުގައި އެ އަތޮޅުގެ ހުރިހާ ރަށަކަށް ވަޑައިގަންނަވާނެކަމަށެވެ. ކެމްޕެއިންގައި އެމްޑީޕީގެ ޓިކެޓުގައި ކައުންސިލްތަކަށް ކުރިމަތިލައްވާ ހުރިހާ ކެންޑިޑޭޓުންވެސް ބައިވެރިވެވަޑައިގަންނަވާއިރު، ދޮރުން ދޮރަށް ހިންގެވުމާއި ޖަލްސާތައް ބޭއްވުމުގެ އިތުރުން ރައްޔިތުންނާއި ބައްދަލުކުރައްވާނެކަމަށް އެމްޑިޕީން ވަނީ ބުނެފައެވެ،

Advertisement

އިތުރަށް ވާހަކަ ދައްކަވަމުން އަފްޝަން ވަނީ ގދ އަތޮޅުން ވީހާވެސް ގިނަ ބޭފުޅުން ޙަރަކާތްތަކުގައި ބައިވެރިވެވަޑައިގަތުމަށް އެދިވަޑައިގެންފައެވެ. ރައީސް ނަޝީދު ހުވަދު އަތޮޅު ދެކުނުބުރިއަށް ކުރައްވާ ދަތުރުފުޅުގައި ބުދަ ދުވަހުގެ ރޭ ގައްދޫ ހަރުގޭގައި ޖަލްސާއެއް އޮންނާނެކަމަށްވެސް ވަނީ ވިދާޅުވެފައެވެ.

ލޯކަލް ކައުންސިލްތަކުގެ އިންތިޚާބުގައި 2435 ކެންޑިޑޭޓުން ވާދަކުރައްވާ ކަމަށް އިލެކްޝަންސް ކޮމިޝަނުން ހޮނިހިރު ދުވަހުގެރޭ ވަނީ ބުނެފަ އެވެ. އެގޮތުން އެންމެ ގިނަ ކެންޑިޑޭޓުން ވާދަކުރަނީ އެމްޑީޕީން ނެވެ. އެއީ 876 ކެންޑިޑޭޓުން ނެވެ. އިދިކޮޅު ޕީޕީއެމް-ޕީއެންސީ ކޯލިޝަނުން ކުރިމަތިލާފައިވަނީ 679 ފަރާތެކެވެ. މީގެ އިތުރުން ޖުމްހޫރީ ޕާޓީން 127، އަދާލަތު ޕާޓީން 30، އެމްޑީއޭ 22، އެމްއާރުއެމް 16، އެމްއެލްއެސްޑީޕީ 4، ޑީއާރުޕީ 1 އަދި އަމިއްލަ ގޮތުން 680 މީހަކު ވަނީ ކުރިމަތިލާފައިވެއެވެ.

މީގެއިތުރުން އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް 1817 ފަރާތެއް ވަނީ ކުރިމަތިލާފައެވެ. އެއީ އެމްޑީޕީން 722، ޕީޕީއެމް 517، ޖޭޕީ 56، އަދާލަތު ޕާޓީ 25، އެމްޑީއޭ 20، އެމްއާރުއެމް 4 އަދި އަމިއްލަ ގޮތުން 473 މީހަކު ކުރިމަތިލާފައިވާ ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.