އެމްޑީޕީގެ އަންހެނުންގެ ރޫހުގެ ފަރާތުން "ރަށްވެހި ފެސްޓިވަލް"އެއް ބާއްވަނީ
2 މާރިޗު 2020 | ހޯމަ 11:54މިނިސްޓަރުންވެސް ބައިވެރިވެވަޑައިގެން މައުލޫމާތު ދެއްވާނެ
މާލެ ސިޓީ މޭޔަރު ޝިފާ މުހައްމަދު
ބައިނަލްއަޤްވާމީ އަންހެނުންގެ ދުވަހު، "ރަށްވެހި ފަތިސް" ކެމްޕެއިންއާ ގުޅުވާލައިގެން އެމްޑީޕީގެ އަންހެނުންގެ ރޫހުގެ ފަރާތުން "ރަށްވެހި ފެސްޓިވަލް" އެއް ބޭއްވުމަށް ނިންމަވައިފި އެވެ.
ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ އަންހެނުންގެ ކޮމެޓީގެ އިންތިހާބުގެ ކެމްޕެއިން ހަރަކާތްތަކުގެ މައުލޫމާތު ދެއްވުމަށް އެމްޑީޕީގެ "ރަށްވެހި ފަތިސް" ކެމްޕެއިން މައި އޮފީހުގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން، މިކަން ހާމަކުރެއްވީ އެމްޑީޕީ އަންހެނުންގެ ރޫހުގެ ރައީސް އަދި މާލެ ސިޓީގެ މޭޔަރު ޝިފާ މުހައްމަދުއެވެ.
ޝިފާ ވިދާޅުވީ، ބައިނަލްއަޤްވާމީ އަންހެނުންގެ ދުވަސް ކަމަށްވާ މަރޗު 8 ވަނަ ދުވަހު ވިލިމާލޭގައި ހާއްސަ އިވެންޓެއްގެ ގޮތުގައި އަންހެނުންގެ ކޮންފަރެންސެއް އޮންނާނެ ކަމަށާއި އެއީ "ރަށްވެހި ފަތިސް" ކެމްޕެއިންގެ ހަރަކާތުގެ ތެރެއިން ހިންގާ "ރަށްވެހި ފެސްޓިވަލް" އެއް ކަމަށެވެ.
ޝިފާ ވިދާޅުވީ އެމްޑީޕީ އިދިކޮޅު ޕާޓީއެއްގެ ގޮތުގައި އޮތްއިރު، އެމްޑީޕީގެ އަންހެނުންގެ ރޫހުން ކުރި މަސައްކަތްތަކީ ގައުމު ބަލައިގަނެފައިވާ މަސައްކަތެއް ކަމަށެވެ. އަދި އެ މަސައްކަތްތަކަކީ ގައުމިއްޔަތެއް ބިނާކުރުމުގެ އުއްމީދުގައި ކުރެވިފައިވާ މަސައްކަތްތަކެއް ކަމަށެވެ.
ޝިފާ ވިދާޅުވީ އަންހެނުންގެ ތަރައްގީއަށް މަސައްކަތްކުރާ އަންހެނުންގެ ކޮމެޓީއާއި ކައުންސިލްތަކުގެ އަންހެނުންގެ ގޮނޑުތަކަށް ވާދަކުރައްވާ އެމްޑީޕީގެ ހުރިހާ ކެންޑިޑޭޓުން ވިލިމާލޭގައި އެޕާޓީން ބާއްވާ ކޮންފަރެންސްގައި ބައިވެރިވެވަޑައިގެން ދެއްވުމަކީ ވަރަށް ބޮޑަށް އެދޭ ކަމެއް ކަމަށެވެ.
ޝިފާ ވިދާޅުވީ އެ ފެސްޓިވަލްގައި މައިގަނޑު ގޮތެއްގައި ހިންގަނީ އަންހެނުންގެ ކުރިއެރުމާއި ތަރައްގީއަށް ބޭނުންވާ ތަމްރީންތަކާއި ކުރިމަތިވާ ގޮންޖެހުންތަކުން އަރައިގަންނާނެ ގޮތުގެ ތަމްރީންތައް ކަމަށެވެ. އަދި ސަރުކާރުން ހިންގަމުންދާ ބޮޑެތި މަޝްރޫއުތަކުގެ މައުލޫމާތުތައް ފޯރުކޮށްދިނުމަށް ވެސް ވަނީ ހަމަޖެހިފައެވެ.
މީގެއިތުރުން ލާމަރުކަޒީ ގާނޫނުން ކައުންސިލްތަކަށް ލިބިފައިވާ ބާރުވެރިކަމާއި މަލީ ބާރުވެރިކަމުގެ ތެެރެއިން ރައްޔިތުން ބާރުވެރިކުރުމަށް ކުރަންޖެހޭ ކަންކަމުގެ މައުލޫމާތުތައް ވެސް ލިބިގެންދާނެ ކަމަށް ޝިފާ ވިދާޅުވިއެެވެ.
