ޓްރަމްޕްގެ ދަރިކަނބަލުން އިވާންކާ ތާޖްމަހަލްގައި ނެގި ފޮޓޯއަށް ގިނަ ބައެއްގެ ސަމާލުކަން
1 މާރިޗު 2020 | އާދީއްތަ 20:43އެއީ އިންޑިއާގެ ޓްވިޓަރގައި އެންމެ "ޓްރެންޑިންގ" އެއް ފޮޓޯ
ޑޮނަލްޑް ޓްރަމްޕްގެ ދަރިކަނބަލުން އިވާންކާ ޓްރަމްޕް
އެމެރިކާގެ ރައީސް ޑޮނަލްޑް ޓްރަމްޕްގެ ދަރިކަނބަލުން އިވާންކާ ޓްރަމްޕް އިންޑިއާއަށް ކުރެއްވި ޒިޔާރަތުގައި އިންޑިއާގެ ތާޖްމަހަލްގައި ނަގާފައިވާ ފޮޓޯއަށް ގިނަ ބައެއްގެ ސަމާލުކަން ލިބިއްޖެއެވެ.
އިވާންކާ ޓްރަމްޕް ތާޖްމަހަލް ކުރިމަތީގައި ހުއްޓިލައިގެން ހުންނަ މި ފޮޓޯ މިހާރު އިންޑިއާގެ ޓްވިޓަރގައި އެންމެ "ޓްރެންޑިންގ" އެއް ފޮޓޯއަށް ވެފައިވާއިރު، ގިނަ ބަޔަކު ދަނީ މި ފޮޓޯ އެޑިޓްކޮށް، ރިޓްވީޓް ކުރަމުންނެވެ.
އެގޮތުން އެކަން ފެށިގެން ދިޔައީ އިންޑިއާގެ ލޯކަލް ފަންނާނެއް ކަމަށްވާ ދިލްޖީތް ދޮސާންޖް އިވާންކާއާ ޖެހިގެން ހުންނަ ގޮތަށް ފޮޓޯޝޮޕްކޮށްފައިވާ ފޮޓޯއެއް ދިލްޖީތު އޭނާގެ ޓްވިޓަރގައި ހިއްސާކުރި ހިސާބުންނެވެ. އެގޮތުން ފޮޓޯ ހިއްސާކުރަމުން އޭނާ ވަނީ އިވާންކާގެ އެދުމުގެ މަތިން އޭނާ ތާޖްމަހަލްއަށް ގެންގޮސްލީކަމަށް ބުނެފައެވެ.
އެ ފޮޓޯ ހިއްސާކުރުމާއެކު އިވާންކާ ވަނީ އެ ފޮޓޯ ރިޓްވީޓްކޮށް، ދިލްޖީތުގެ ސަމާސާ ދަމަހައްޓާފައެވެ. އެގޮތުން އިވާންކާގެ 7.9 މިލިއަން ފޮލޯވަރުންނާ އެ ފޮޓޯ ހިއްސާކުރައްވަމުން އޭނާ ވަނީ ތާޖްމަހަލްއަށް ގެންގޮސްދިނުމުން އެކަމަށް ޝުކުރުއަދާ ކުރާ ކަމަށާއި، އިންޑިއާއަށް ކުރެއްވި ދަތުރަކީ ހަނދާނުން ފިލުވާ ނުލެވޭނެ ދަތުރެއްކަމަށް ވިދާޅުވެފައެވެ.
އެ ފޮޓޯ މިހާރު ގިނަ ބަޔަކު އެޑިޓްކޮށް ޓްވިޓަރގައި ހިއްސާކުރަމުންދާއިރު، އިވާންކާ ވަނީ ފޮޓޯތައް ރިޓްވީޓްކޮށް، އިންޑިއާ ރައްޔިތުންގެ ގާތްކަމަށް ޝުކުރުއަދާ ކުރައްވާކަމަށް ވިދާޅުވެފައެވެ.
ޓްރަމްޕް އިންޑިއާއަށް ކުރެއްވި ދަތުރުފުޅުގައި އިވާންކާ ބައިވެރިވެ ވަޑައިގެންފައިވާއިރު، އިވާންކާއަކީ ޓްރަމްޕްގެ ސީނިއަރ އެޑްވައިސަރވެސް މެއެވެ.
