ކާބަފައިން ވަނީ ގެ ރާނާއި، ގާތައް ހުސްކޮށްލާފައި: ޑރ. ހުސައިން ރަޝީދު
ހުރިހާ ރަށެއްގައި ބޮޑު ހިލަން ޖަހަން ބޮޑު އަދަދެއް ހޭދަކުރަން ޖެހޭ: އެންވަޔަރަމެންޓް މިނިސްޓަރު
އެންވަޔަރަމެންޓް މިނިސްޓަރު ޑރ. ހުސައިން ރަޝީދު ހަސަން
ރަށް ގިރަމުންދާ މައްސަލަ ހައްލެއް ހޯދުމަށް ބަލާއިރު، ކާބަފައިން ވަނީ ފަރުމަތީގައި ހުރި ހުރިހާ ގަލެއް ނަގައިގެން ގެ ރާނާފައި ކަމަށް އެންވަޔަރަމެންޓް މިނިސްޓަރު ޑރ. ހުސައިން ރަޝީދު ވިދާޅުވެއްޖެއެވެ.
އެސޯސިއޭޝަން އޮފް އެނަރޖީ އިންޖިނިއާޒްއާ ގުޅިގެން ހިންގި ސެޓިފައިޑް އެނަރޖީ އޮޑިޓް ޓްރެއިނަރުން ތަމްރީންކުރުމުގެ ޕްރޮގްރާމް ނިންމުމުގެ ރަސްމިއްޔާތުގައި އެންވަޔަރަމެންޓް މިނިސްޓަރު ވިދާޅުވީ، ގާތައް ނެތުމުން ދެން ޖެހެނީ، ހިލަތޮށި ޖަހަން ކަމަށެވެ. އެކަމަކު މީހުން ދިރިއުޅޭ ހުރިހާ ރަށެއްގައި ބޮޑު ހިލަން ޖަހަން ބޮޑު އަދަދެއް ހޭދަކުރަންޖެހޭކަމަށް ވިދާޅުވިއެވެ.
މިނިސްޓަރު ވިދާޅުވީ، މިހާރު ކުރިމަތިވަމުންދާ ކަންތައް ކުރިމަތިވަމުން ދަނީ ގުދުރަތީ ގޮތުން އެކަންތައް ހިނގާ އުސޫލަކުން ނޫން ކަމަށެވެ. އެކަން ކުރިމަތިވަނީ އިންސާނުން އަމަލުކުރި ގޮތުގެ ސަބަބުންކަން ފާހަގަކުރައްވާ މިނިސްޓަރ ވިދާޅުވީ، ހާއްސަކޮށް އިންޑަސްޓްރިއަލް ރިވޮލިއުޝަންގެ ފަހުން އިންސާނުން ދިރިއުޅުމަށްޓަކައި ކަންތައް ބައްޓަން ކުރިގޮތުން، ދުނިޔޭގެ ވެއްޓަށް އަންނަމުންދާ ބަދަލުތަކުގެ ސަބަބުން ނުބައި އަސަރުތައް ފޯރަމުންދާ ކަމަށެވެ.
އައިޕީޕީސް ސްޕެޝަލް ރިޕޯޓުގައި ބުނެފައިވާގޮތުން އެއްވެސްކަމެއް ނުކޮށް ''ބިޒްނަޒް އޭޒް ޔޫ ޝުއަލް'' ތިބެފިއްޔާ 2030 ވަނަ އަހަރު އަންނައިރު ދުނިޔޭގެ އެވަރޭޖް ފިނި ހޫނުމިން ގާތްގަނޑަކަށް ދެ ޑިގްރީ އަށްވުރެ މައްޗަށް ދިޔުމަކީ ވަރަށް އެކަށީގެންވާ ކަމެއް ކަމަށެވެ.
މިނިސްޓަރު ވިދާޅުވި ގޮތުގައި އެހެން ކަންތައް ވެއްޖެނަމަ ރާއްޖެ ކަހަލަ ގައުމަކަށް ކުރިމަތިވާނެ އެންމެ ބޮޑު މައްސަލައަކަށް ވާނީ ހިމެނޭ ރާއްޖޭގެ ފަރުތަކުގެ 90 ޕަސެންޓް ހަލާކުވެގެންދާ ކަމަށެވެ. ފަރުތައް ހަލާކުވެގެން ދިޔުމަކީ އިއާދަ ނުކުރެވޭ ވަރުގެ ބޮޑު ގެއްލުމަކަށް ވާނެ ކަމަށް ޑރ. ހުސައިން ރަޝީދު ވިދާޅުވިއެވެ.
