އެމްޑީޕީން ގާސިމަށް ފާޑު ނުކިޔަނީ އެއީ ހަަމަ ''އޮނަރަބަލް ގާސިމް'' ވީމަ: ހަސަން ލަތީފް
ރައީސް އަށް މަސައްކަތް ނުކުރެވޭ ވަރަށް ދަތިތަކެއް ހުރި ކަމަށް ގަބޫލުނުކުރައްވަން: ހަސަން ލަތީފް
އެމްޑީޕީގެ ރައީސް ނަޝީދުއާ ޖޭޕީގެ ލީޑަރު ގާސިމް އިބްރާހިމް
ސަރުކާރުގެ މައިޕާޓީ އެމްޑީޕީން، ކޯލިޝަނުގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމަށް އެމްޑީޕީން ފާޑު ނުކިޔަނީ ''އެއީ ހަމަ އޮނަރަބަލް ގާސިމް'' ވީމަ ކަމަށް އެމްޑީޕީގެ ޗެއަރޕަސަން ހަސަން ލަތީފް ވިދާޅުވެއްޖެއެވެ.
ނަވާރަ ވަނަ ރައްޔިތުންގެ މަޖިލީހުގެ އިންތިޚާބާ ދިމާކޮށް އެމްޑީޕީން ހުރިހާ ދާއިރާތަކަށް ވަކިން ވާދަކުރާނެ ކަމަށް އިޢުލާންކުރި ހިސާބުން ފެށިގެން ޖޭޕީގެ ލީޑަރު ގެންދަވަނީ އެމްޑީޕީއަށް ވަރަށް ފާޅުކަން ބޮޑު ގޮތެއްގައި ބަހުގެ ހޫނު ޙަމަލާތައް ރައްދު ކުރައްވަމުންނެވެ. ވަކިން ޚާއްޞަކޮށް އެމްޑީޕީގެ ރައީސް މުޙައްމަދު ނަޝީދަށް ފާޑު ވިދާޅުވަމުން ގެންދަވާއިރު އެމްޑީޕީން އެކަމަށް މާ ބޮޑު ރައްދެއްދޭ ތަނެއް ނުފެނެއެވެ.
އެމްޑީޕީން ޖޭޕީގެ ލީޑަރަށް ރައްދު ނުދެއްވަނީ ކީއްވެގެންތޯ ރާއްޖެ ޓީވީގެ ފަލަ ސުރުޚީ ޕްރޮގުރާމުގައި ސުވާލު ކުރެއްވުމުން ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރުކަންވެސް ކުރައްވާ ޙަސަން ލަޠީފް ވިދާޅުވީ، ''އެއީ ހަމަ އޮނަރަބަލް ގާސިމްވީމަ ކަމަށެވެ.
އެކަމަކު އޭގެ އިތުރު ތަފުޞީލެއް ނުވަތަ އެކަން މާނަ ކުރެއްވި ގޮތެއް ޙަސަން ލަޠީފް ވިދާޅެއް ނުވެއެވެ. ކޯލިޝަނާ ބެހޭ ގޮތުން ވާހަކަ ދައްކަވަމުން ޙަސަން ލަޠީފް ވިދާޅުވީ، ކޯލިޝަން ތެރޭގައި ރައީސް އިބްރާހިމް މުޙައްމަދު ޞާލިޙަށް ކަންކަން ނުކުރެވޭ ވަރަށް ދަތިތަކެއް ދިމާނުވާ ކަމަށެވެ.
އަދި އެފަދަ ކަންތައްތަކެއް ދިމާވާ ކަމަށް ފާހަގަވެފައިނުވާ ކަމަށް އޭނާ ވިދާޅުވިއެވެ. ޙަސަން ލަޠީފް ވިދާޅުވީ، އެމްޑީޕީގެ ސުޕަރ މެޖޯރިޓީ އޮންނަ ރައްޔިތުންގެ މަޖިލީހުން ރައީސް ޞާލިޙު ބޭނުންފުޅުވާ ކޮންމެ ކަމެއް އެމްޑީޕީގެ މެންބަރުންގެ ތާޢީދާއެކު ކުރައްވާނެ ކަމަށެވެ.
