ކޮންމެ އަހަރަކުވެސް ރިސޯޓްތައް މޮނިޓަރ ކުރަމުންދާނަން: މިނިސްޓަރު އަލީ ވަހީދު
26 ފެބުރުއަރީ 2020 | ބުދަ 10:28އަހަރަކު އެއްފަހަރު، މޮނިޓަރިންގ އެންޑް ސޭފްޓީ އޮޑިޓެއް ހަދާނެކަމަށް މިނިސްޓަރު ވިދާޅުވި
ޓޫރިޒަމް މިނިސްޓަރު އަލީ ވަހީދު
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުން، ދިވެހިރާއްޖޭގައި ފުރަތަމަ ފަހަރަށް މޮނިޓަރިންގ އެންޑް ސޭފްޓީ އޮޑިޓެއް ހަދާ ނިންމާފައިވާ ކަމަށާއި، އަދި މިނިމަމް ސްޓޭންޓަޑު ނެތުމުން އެކަންކަން އިސްލާހު ކުރުމަށް 13 ރިސޯޓަކަށް އަންގާފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވެސް ބައިވެރިވެވަޑައިގެންނެވި، ކ. ތުލުސްދޫގައި ބޭއްވި "ކޮރަލް ފެސްޓިވަލް ޕެނަލް" ގައި ވާހަކަ ދައްކަވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ، ތިމާވެއްޓާ ގުޅުންހުރި ކަމެއް ވިޔަސް، ސެކިއުރިޓީ، އަދި ދިވެހިން ވަޒީފާގައި ބައިތިއްބަންޖެހޭ މިންގަނޑުތައް ވިޔަސް ކޮންމެ އަހަރަކު އެއްފަހަރު ރިސޯޓްތައް މޮނީޓަރ ކުރަމުންދާނެ ކަމަށެވެ.
އަލީ ވަހީދު ވިދާޅުވީ ރާއްޖޭގެ ގިނަ ރިސޯޓްތައް ހުރީ މާލެއާއި މާލެ ކައިރި އަތޮޅުތަކުގައި ކަމަށާއި، ހދ އަތޮޅު ފަދަ މާލެއާ ދުރު އަތޮޅުތަކަށް ދިޔުމުން، އެ އަތޮޅުގައި ރިސޯޓުތައް ނެތުމުން އެ އަތޮޅުގެ ރައްޔިތުންގެ ކަންބޮޑުވުން އިންތިހާއަށް އެބައޮތް ކަމަށެވެ. އަދި ސަރުކާރުގެ ޢަމާޒަކީވެސް މާލެ ޞަރަަޙައްދުން އިތުރަށް ރިސޯޓެއް ތަރައްގީ ކުރުމަށް ރަށެއް ނުވަތަ ފަޅެއް ވިޔަސް ދޫނުކުރުން ކަމަށާއި ސަރުކާރު ޢަމާޒު ހިފާފައިވަނީ ރިސޯޓްތައް މަދު މާލެއާ ދުރު އަތޮޅުތަކުގައި ވެސް ރިސޯޓުތައް ތަރައްޤީ ކުރުން ކަމަށެވެ.
ޢަލީ ވަހީދު ވިދާޅުވީ 35،000 އެނދު އިތުރު ކުރުމަށް ރައީސް ޞާލިޙު ވަޢުދުފުޅެއް ވެސް އެބައޮތްކަމަށާއި ޓޫރިސްޓް އެނދު އިތުރުކުރާއިރު، މަލޭ އޭރިއާގައި އިތުރު ރިސޯޓް ތަރައްޤީކުރަން ތަނެއް ދޫނުކުރާނެ ކަމަށެވެ.
އަލީ ވަހީދު ވިދާޅުވީ، ރައީސް ޞާލިހު ސަރުކާރާ ހަވާލުވެވަޑައިގެންނެވިއިރު، ޓޫރިޒަމް މިނިސްޓްރީގައި، ރިސޯޓެއްގައި ތިބީ ކިތަން ދިވެހި މުވައްޒަފުންކަން އެނގޭނެ އެއްވެސް ލިޔެކިޔުމެއް ނެތް ކަމަށެވެ. އަދި ރައީސް ޞާލިހު ސަރުކަރާ ހަވާލުވެވަޑައިގެންނެވިއިރު، ރިސޯޓް ތަރައްގީކުރަން ދޫކޮށްފައިވާ 70 ރަށެއް ހެދުން ހުއްޓިފައި އޮތް ކަމަށެވެ.
އަލީ ވަހީދު ވިދާޅުވީ، ރިސޯޓެއް ހަދަން ރަށެއް ދޫކުރުމަށްފަހު، ރައީސް ޞާލިހުގެ ސަރުކާރުން މޮނިޓަރ ކުރަމުންދާނެ ކަމަށާއި އަދި މޮނީޓަރ ކުރުމަށްފަހު، އަހަރަކު އެއްފަހަރު އޮޑިޓް ރިޕޯޓެއްވެސް އެކުލަވާލެވޭނެ ކަމަށެވެ.
