އައްޑޫ އިކުއެޓޯރިއަލް ހޮސްޕިޓަލްގެ ޑިޒައިނިންގެ މައްސަލައާހުރެ ހުޅުވާނެ ތާރީހެއް ބުނަން ދަތި: އައްޑު ސިޓީ މޭޔަރ
24 ފެބުރުއަރީ 2020 | ހޯމަ 17:12މިއީ މަޝްވަރާ ކުރުމެއްނެތި މަސައްކަތް ކުރިއަށް ގެންދިއުމުން ދިމާވާ މައްސަލަ
އައްޑޫ އެކުއެޓޯރިއަލް ހޮސްޕިޓަލް
ޓަރޝަރީ ފެންވަރަށް ތަރައްގީ ކުރަމުންދާ އައްޑޫ އެކުއެޓޯރިއަލް ހޮސްޕިޓަލްއަށް މިހާރު ދިމާވަމުންދާ މައްސަލަތަކަކީ ތަރައްޤީކުރިއިރު މަޝްވަރާ ކުރަންޖެހޭ ވަރަށް މަޝްވަރާކުރުމެއް ނެތި އެމަސައްކަތް ކޮށްފައިވާތީ ދިމާވާ މައްސަލަތައް ކަމަށް އެސިޓީގެ މޭޔަރު އަބްދުﷲ ޞާދިޤު (ސޯބެ)ވިދާޅުވެއްޖެއެވެ.
ރާއްޖެއެމްވީއަށް ޞާދިޤު ވިދާޅުވީ ހޮސްޕިޓަލްގެ ޢާންމު މަސައްކަތްތައް ނިންމާ ހޮސްޕިޓަލް ހުޅުވަން އެތައް ތާރީޚެއް ކަނޑައެޅިއްޖެ ކަމަށާއި، ނަމަވެސް ނުހުޅުވި ލަސްވަނީ ހޮސްޕިޓަލުގެ ޑިޒައިންގެ މައްސަލަތަކެއް ދިމާވާތީ ކަމަށެވެ.
ޞާދިޤު ވިދާޅުވީ ހޮސްޕިޓަލް ތަރައްޤީ ކުރި ޢީމާރާތަކީ މުޅިން އެހެން ކަމަކަށް ތަރައްޤީ ކުރި ތަނެއް ކަމަށެވެ. އެހެންކަމުން މިހާރު ގިނަ ގޮންޖެހުންތަކާ ކުރިމަތިވާ ކަމަށް ޞާދިޤު ވިދާޅުވިއެވެ. އަދި ވިދާޅުވީ ހޮސްޕިޓަލް ތަރައްޤީ ކުރުމަށް ކަމާބެހޭ ޞިއްޙީ މާހިރުން، ހައުސިން މިނިސްޓްރީ، ޕްލޭނިން މިނިސްޓްރީގެ އިތުރުން ރައްޔިތުންނާ މެދު މަޝްވަރާކުރެވިގެން މަސައްކަތްތައް ކުރިއަށް ގެންދިޔަނަމަ މިހާރު ދިމާވާ ޑިޒައިންގެ މައްސަލަތައް ފެންމަތިނުވާނެ ކަމަށެވެ.
ކުރީގެ ރައީސް ޢަބްދުﷲ ޔާމީނުގެ ވެރިކަމުގައި ހޮސްޕިޓަލް ތަރައްޤީ ކުރުމުގެ މަސައްކަތްތައް ކުރިއަށް ގެންދިޔައީ ކައުންސިލާ ވެސް މަޝްވަރާކުރުމެއްނެތިކަން ފާހަގަކުރައްވައި ޞާދިޤު ވިދާޅުވީ މަޝްރޫޢުތައް ހިންގާއިރު ޑިޒައިނިންގެ މަސައްކަތުގައި ވަރަށް ރަނގަޅަށް މަސައްކަތް ކުރަންޖެހޭ ކަމަށެވެ. ނޫންނަމަ އޭގެ ހިތި ނަތީޖާ ފެންނާނެ ކަމަށް އޭނާ ވިދާޅުވިއެވެ. އަދި ވިދާޅުވީ އައްޑޫ އިކުއެޓޯރިއަލް ހޮސްޕިޓަލްގެ ގިނަ ޑިޒައިނިންގެ މައްސަލަތައް މިހާރު ފެންމަތިވަމުން އަންނަ ކަމަށެވެ.
ޞާދިޤު ވިދާޅުވީ ހޮސްޕިޓަލްގެ އޮޕަރޭޝަން ތިއޭޓަރގައި ސީލިންގ ހުންނަންޖެހޭނީ ވަކި ގޮތަކަށް ކަމަށް ޑޮކްޓަރުން ފާހަގަކުރި ނަމަވެސް ސީލިންގ ފަރުމާކޮށްފައިހުރީ ވެސް އާދައިގެ ގޮތަކަށްކަމަށެވެ. އަދި މިފަދަ އެތައް މައްސަލަތަކެއް ކުރިމަތިވަމުންދާ ކަން ޞާދިޤު ފާހަގަކުރެއްވިއެވެ.
ހޮސްޕިޓަލުން ދެމުންދާ ޚިދުމަތްތަކަށް އަލިއަޅުއްވާލައްވާ ޞާދިޤު ވިދާޅުވީ އަދި ކުރިއަށްދަނީ ޢާންމު ބަލިތަކަށް ފަރުވާ ދިނުން ކަމަށެވެ. އެޑްމިޓްކޮށްގެން ފަރުވާ ދޭންވެއްޖެ ނަމަ އަދިވެސް ފަރުވާ ދެމުންދަނީ ރީޖަނަލް ހޮސްޕިޓަލުގައި ކަމަށް ޞާދިޤު ވިދާޅުވިއެވެ. އެކްސްރޭ ފަދަ ޚިދުމަތްތައް ލިބޭއިރު، އަންނަ ހަފުތާ ތެރޭގައި އެމްއާރްއައިގެ ޚިދުމަތް ތަޢާރަފު ކުރެވޭނެކަމުގެ މަޢުލޫމާތު ލިބިފައިވާ ކަމަށް ޞާދިޤު ވިދާޅުވިއެވެ.
މީގެ އިތުރުން ޞާދިޤު ވިދާޅުވީ ހޮސްޕިޓަލް ރަސްމީކޮށް ހުޅުވޭނެ ދުވަހެއް ނޭނގޭ ކަމަށާއި، ނަމަވެސް އުންމީދުކުރަނީ ވަރަށް އަވަހަށް ހުޅުވިގެންދާނެ ކަމަށެވެ. ޞާދިޤު މިހެން ވިދާޅުވެފައިވާއިރު، 05 ނޮވެންބަރު 2019 ވަނަ ދުވަހު ރައްޔިތުންގެ މަޖިލީހުގެ ޖަލްސާގައި ހިތަދޫ ދެކުނު ދާއިރާގެ މެންބަރ އިބްރާހީމް ނާޒިލް އައްޑޫ ޓަރޝަރީ ހޮސްޕިޓަލް ހުޅުވުމަށް ހަމަޖެހިފައިވާ ތާރީޚާގުޅޭ ގޮތުން ހެލްތު މިނިސްޓަރާއި ސުވާލު ދެންނެވުމުން މިނިސްޓަރު ޢަބްދުﷲ އަމީން ވިދާޅުވީ މިހާރު ކުރެވެމުންދަނީ ހޮސްޕިޓަލް ހުޅުވުމަށްކުރަންޖެހޭ އެންމެ ފަހުގެ މަސައްކަތްތައް ކަމަށެވެ. އިކުއިޕްމެންޓްސްތައް މިހާރު ބެހެއްޓިފައިވާކަމަށާއި ތަނަށް ބޭނުންވާ މީހުން ނެގުމުގެ ބޮޑު ބައެއްވެސް ނިމިފައިވާކަމަށް މިނިސްޓަރު ވިދާޅުވިއެވެ.
އައްޑޫ އެކުއެޓޯރިއަލް ހޮސްޕިޓަލަކީ 100 އެނދުގެ ހޮސްޕިޓަލެކެވެ. މިހޮސްޕިޓަލް އެޅުމަށް އެލިއާ ކޮންސްޓްރަކްޝަންސް އާ ޙަވާލުކޮށްފައިވަނީ ކުރީގެ ރައީސް ޢަބްދުﷲ ޔާމީނުގެ ވެރިކަމުގައި 2016 ވަނަ އަހަރުގެ ނޮވެންބަރ މަހުގެ 14 ވަނަ ދުވަހު އެވެ. މިއީ މާލެ އާއި ހުޅުމާލެ ފިޔަވައި އަތޮޅު ތެރޭގައި ތަރައްޤީކުރާ ފުރަތަމަ ޓަރޝަރީ ހޮސްޕިޓަލެވެ.
