މުއިއްޒު، ފުލުހަށް ހާޒިކުރަނީ
22 ފެބުރުއަރީ 2020 | ހޮނިހިރު 12:30މައްސަލަ އެއް ހާމައެއް ނުކުރޭ
ޑރ. މުހައްމަދު މުއިއްޒު
ކުރީގެ ހައުސިންގ މިނިސްޓަރު އަދި ޕީޕީއެމްގެ ނައިބު ރައީސް ޑރ. މުޙައްމަދު މުއިއްޒު ފުލުހަށް ހާޒިރުވާން އަންގައިފިއެވެ.
މީޑިއާތަކަށް ފޮނުވި މެސެޖެއްގައި ޕީޕިއެމްގެ ސްޕޯކްސް ޕަރސަން ހީނާ ވަލީދު ވިދާޅުވީ، ހޮނިހިރުދުވަހުގެ ރޭ (މިރޭ) 20:00 އަށް ފުލުހަށް ހާޒިރުވުމަށް މުއިއްޒު އަށް އަންގާފައިވާ ކަމަށެވެ. އެކަމަކު އެއީ ކޮން މައްސަލައަކާއި ގުޅިގެން ކަމެއް ހީނާ ވިދާޅެއް ނުވެއެވެ.
އެކަމުގެ އިތުރު ތަފުޞީލު ހޯދާލުމަށް ރާއްޖެ.އެމްވީން މުއިއްޒު އަށް ގުޅާލުމުން ފޯނަށް ޖަވާބު ނުދެއްވާތީ އިތުރު ތަފުޞީލު ލިބޭގޮތް ވަނީ ނުވެފައެވެ. ޕީޕީއެމްގެ ނައިބު ރައީސްގެ މަޤާމުވެސް ފުރުއްވަމުން ގެންދަވާ މުއިއްޒު، ފުލުހަށް ހާޒިރުވާން އަންގާފައިވާއިރު، ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި) އިން ދިވެހި ސަރުކާރުގެ މައްޗަށް ހުށަހެޅި އާރބިޓްރޭޝަން މައްސަލައިގައި މުއިއްޒު ޢަމަލުކުރެއްވި ގޮތާ ގުޅިގެން ޖިނާއީ ތަޙްޤީޤެއް ހިންގަވައި ދިނުމަށް މޯލްޑިވްސް ޕޮލިސް ސަރވިސްގައި، އެޓަރނީ ޖެނެރަލް (އޭޖީ)ގެ އޮފީހުން އެދިފައިވާތީ، އެ މައްސަލަ ބަލަމުންދާ ކަމަށް ފުލުހުން ވަނީ މީގެ ކުރިން ބުނެފައެވެ.
