ސިޔާސީ ހަތިޔާރަކަށް އޭސީސީ ހަދާކަށް ބޭނުމެއް ނުވޭ!
20 ފެބުރުއަރީ 2020 | ބުރާސްފަތި 11:06ސިޔާސީ ހާލަތާއި ގުޅިގެން ގިނަ ސިޔާސީ ފަރާތްތަކާ ގުޅޭ ޝަކުވާތައް އާދޭ
އޭސީސީގެ މެމްބަރުން މިނިވަން މުއައްސަސާތަކުގެ ކޮމިޓީގައި
ސިޔާސީ ހަތިޔާރެއްގެ ގޮތުގައި އޭސީސީ ބޭނުންކުރުމަކީ ބޭނުންވާގޮތެއް ނޫންކަމަށް އެ ކޮމިޝަނުގެ ރައީސް މަރިޔަމް ޝިއުނާ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި މަޢުލޫމާތު ދެއްވަމުން އޭސީސީގެ ރައީސް މަރިޔަމް ޝިއުނާ ވިދާޅުވީ، ސިޔާސީ މާޙައުލުގައި ކަން ހިނގާ ގޮތާއި ގުޅިގެން ވަރަށް ގިނަ ޢަދަދެއްގެ ޝަކުވާތަކެއް ލިބެމުންދާ ކަމަށެވެ.
މިހެން ހުށައެޅޭ ޝަކުވާތަކާއި ގުޅޭ މައްސަލަތަކުގައި ޢަމަލުކުރާ ގޮތް ބަޔާންކުރައްވަމުން ޝިއުނާ ވިދާޅުވީ، ސިޔާސީ ފަރާތްތަކާއި ގުޅޭ ޝަކުވާތަކަށް ޚާއްޞަ އިސްކަމެއް ދީގެން އެ ޝަކުވާތަކުގެ އޭސީސީން ބަލަމުންދާ ކަމަށެވެ. އަދި ތުހުމަތެއްގެ ގޮތުގައި އެތައް އަހަރުތަކެއް ވަންދެން އެ މައްސަލަ ބޭއްވުމުގެ ބަދަލުގައި އެ ޝަކުވާއެއްގެ ޞައްޙަކަން ވަޒަންކުރާ ކަމަށް ޝިއުނާ ވިދާޅުވިއެވެ.
މިހާރު ހިނގަމުންދާ މަޝްރޫޢުތަކަށް އިޝާރާތްކުރައްވާ ޝިއުނާ ވިދާޅުވީ، އެ ޝަކުވާތަކަށް އިސްކަމެއް ދީގެން ބަލަނީ އެކަމެއް ވިޔަނުދިނުމަށްޓަކައި ކަމަށެވެ. އެގޮތުން މިހާރު ހިނގަމުންދާ މަޝްރޫޢަކާއި ގުޅޭ ޝަކުވާއެއް އަތުވެއްޖެނަމަ، އެކަމަށް އިސްކަންދޭނެ ކަމަށް ވިދާޅުވިއެވެ.
ޝިއުނާ މިވާހަކަތަައް ދެއްކެވީ، މިނިވަން މުއައްސަސާތަކުގެ ކޮމިޓީއަށް އޭސީސީގެ މެންބަރުން ހާޒިރުކޮށް، ކުރިން ހިނގާފައި ހުރި ބޮޑެތި ޚިޔާނާތުގެ މައްސަލަތައް ބެލުން ލަސްވަމުންދާ ސަބަބާމެދު ކޮމިޓީގައި ހިމެނިވަޑައިގަންނަވާ އެމްޑީޕީ މެންބަރުން ކަންބޮޑުވުން ފާޅުކުރެއްވުމާއި ގުޅިގެންނެވެ.
އޭސީސީގެ މެންބަރުން ވަނީ އެ ހުރިހާ މައްސަލަތަކެއްވެސް ބަލަމުންދާ ކަމުގެ ޔަޤީންކަން ކޮމިޓީގައި ތިއްބެވި މެންބަރުންނަށް އަރުވާފައެވެ. ކޮމިޝަނާ ޙަވާލުވެވަޑައިގެންނެވިއިރުވެސް، ބެކްލޮގުގައި 700 އެއްހާ މައްސަލަތައް ހުރިކަން ފާހަގަކުރައްވާ ޝިއުނާ ވިދާޅުވީ، މިހާރު ހުށައެޅޭ މައްސަލަތަކަށް އިސްކަމެއް ދީގެން ބަލުމުންގެންދަނީ އެ ޙާލަތު އަލުން އަޔަ ނުދިނުމަށް ކަމަށެވެ.
އޭސީސީގައި މިހާރު ހުރި މައްސަލަތަކަށް ބަލާއިރު، އެ ކޮމިޝަނުން މިހާރުވެސް އަންނަނީ 1000 އަށް ވުރެ ގިނަ މައްސަލަ ބަލަމުންނެވެ. އެގޮތުން ތަހުޤީޤު މަރުޙަލާގައި 688 މައްސަލައެއް ބަލަމުން އަންނައިރު، ޝަކުވާ ވަޒަންކުރާ މަރުޙަލާގައި 328 މައްސަލައެއް އެބައޮތެވެ.
