ކަނޑައެޅިފައިވާ ތާރީހުތަކުގެ ކުރިން ގާނޫނުގައިވާ ކަންކަން ފުރިހަމަ ކުރާނަން: ޖެންޑަރ

ކުޑަކުދިންގެ ހައްގުތައް ރައްކާތެރިކުރުމަށްޓަކައި ކަނޑައެޅިފައިވާ ތާރީހުތަކުގެ ކުރިން ގާނޫނުގައިވާ ކަންކަން ފުރިހަމަ ކުރާނެ ކަމަށް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސެސް އިން ބުނެފިއެވެ.

ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް ވަނީ ބުރާސްފަތި ދުވަހުންފެށިގެން އަމަލުކުރަން ފަށާފައެވެ.

Advertisement

ރައީސް އިބްރާހިމް މުހައްމަދު ސޯލިހު މި ގާނޫނޫ ތަސްދީޤްކުރައްވާފައިވަނީ 20 ނޮވެންބަރު 2019 ގައެވެ. އެ ޤާނޫނުގައި ވާގޮތުން އެ ޤާނޫނަށް ޢަމަލުކުރަން ފަށާނީ، އެ ޤާނޫނު ތަސްދީޤުކޮށް ދިވެހި ސަރުކާރުގެ ގެޒެޓުގައި ޝާއިޢުކުރާ ތާރީޚުން ފެށިގެން 3 މަސް ދުވަސް ހަމަވާ ދުވަހުން ފެށިގެންނެވެ. އެހެންކަމުން، ބުދަ ދުވަހުގެރޭ މެންދަމު 12 އިން ފެށިގެން ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް އަމަލުކުރަން ވަނީ ފަށާފައެވެ.

މިކަމާއި ގުޅިގެން ޖެންޑަރ އިން ނެރުނު ބަޔާނުގައި އެ ގާނޫނުގެ މަގްސަދުތައް ބަޔާން ކޮށްފައިވެއެވެ. އެގޮތުން މި ޤާނޫނުގެ މަޤްޞަދުތަކުގެ ތެރޭގައި ޤާނޫނުއަސާސީއާއި ކުޑަކުދިންގެ ޙައްޤުތަކާބެހޭ ބައިނަލްއަޤުވާމީ މުޢާހަދާއަށް ރިޢާޔަތްކޮށް، ދިވެހިރާއްޖޭގައި ކުޑަކުދިންގެ ޙައްޤުތައް ރައްކާތެރިކޮށްދީ ކަށަވަރުކޮށްދިނުން ހިމެނޭ ކަމަށާއި ކުޑަކުދިންނަށް އަޅައިލުމާއި ރައްކާތެރިކަން ފޯރުކޮށްދިނުމުގައްޔާއި ކުޑަކުދިންގެ ޙައްޤުތައް ރައްކާތެރިކުރުމުގައި ޢާއިލާއާއި މައިންބަފައިންނާއި ބެލެނިވެރިންނާއި މުޖުތަމަޢާއި ދައުލަތާއި އެހެނިހެން ފަރާތްތަކުގެ ޒިންމާ ކަނޑައަޅާފައިވެއެވެ. އިޖުތިމާޢީ ރައްކާތެރިކަމާއި އެހީތެރިކަން ބޭނުންވާ ކުދިންނަށާއި އެ ކުދިންގެ ޢާއިލާތަކަށް އެ އެހީތެރިކަމާއި އެއްބާރުލުން ފޯރުކޮށްދިނުމަށް މަގުފަހިކޮށްދިނުން ވެސް މި ޤާނޫނުގެ މަޤްޞަދުތަކުގެ ތެރޭގައި ހިމެނޭ ކަމަށް ޖެންޑަރ އިން ބުނެއެވެ.

ޖެންޑަރ އިން ބުނީ މި ޤާނޫނަށް ޢަމަލުކުރަން ފެށުމާއެކު، 30 ދުވަހުގެ ތެރޭގައި، ކުޑަކުދިންގެ ޙައްޤުތައް ރައްކާތެރިކުރުމާއި، އެހީތެރިކަމާއި އަޅައިލުން ބޭނުންވެފައިވާ ކުދިންގެ މަޞްލަހަތު ޙިމާޔަތްކުރުމަށް ޓަކައި ޚާއްޞަވެގެން މަސައްކަތްކުރާނެ އިދާރާއެއް "ޗައިލްޑް އެންޑް ފެމިލީ ޕްރޮޓެކްޝަން ސަރވިސަސް"ގެ ނަމުގައި އުފައްދަން ލާޒިމް ކުރާ ކަމަށެވެ. އަދި މި ޤާނޫނަށް ޢަމަލުކުރަން ފަށާތާ 60 ދުވަހުގެ ތެރޭގައި ކުޑަކުދިންގެ ޙައްޤުތައް ރައްކާތެރިކުރުމާ ބެހޭ ކައުންސިލް އުފެއްދުން ލާޒިމުކުރާ ކަމަށާއި މި ޤާނޫނަށް ޢަމަލުކުރަން ފެށުމާއެކު، 90 ދުވަހުގެ ތެރޭގައި އޮމްބަޑްސްޕަރސަން ޢައްޔަންކުރަން ކުރަންވެސް ލާޒިމްވާ ކަމަށެވެ.

އެކަންތައްތަކުގެ އިތުރުން ޤާނޫނާ ގުޅިގެން އިޞްލާޙުކޮށް އެކުލަވައިލަންޖެހޭ ގަވާއިދުތަކާއި އުސޫލުތައް ހަދައި، ޤާނޫނަށް ޢަމަލުކުރަން ފަށާތާ 6 (ހައެއް) މަސް ދުވަސް ތެރޭގައި ދިވެހި ސަރުކާރުގެ ގެޒެޓުގައި ޝާއިޢުކުރަންޖެހޭ ކަމަށް ވެސް ޖެންޑަރ އިން ބުނެއެވެ.

ޖެންޑަރ އިން ބުނީ އެ މިނިސްޓްރީގެ މަޤްޞަދަކީ ބަޔާންކުރެވުނު ތާރީޚުތަކުގެ ކުރިން ޤާނޫނުގައިވާ ކަންކަން ހާސިލުކުރުމަށް މަސައްކަތްކޮށް، އެ ކަންކަން ވީ އެންމެ އަވަސް ފުރުޞަތެއްގައި ފުރިހަމަކުރުން ކަމަށެވެ.