ރިޔާސީ ބަޔާނަށް ޖަވާބު ދިނުން ހޯމަ ދުވަހު، އެއީ މައިނޯރިޓީ ލީޑަރުގެ ދުވަސް!
ރިޔާސީ ބަޔާނަށް ޖަވާބުދޭނީ ހޯމަ ދުވަހު އޮންނަ މަޖިލީހުގެ ޖަލްސާގައި
މަޖިލީހުގެ މައިނޯރިޓީ ލީޑަރު، އޭދަފުށި ދާއިރާގެ މެމްބަރު އަހުމަދު ސަލީމް
ރިޔާސީ ބަޔާނަށް އިދިކޮޅުން ޖަވާބު ދެއްވާނީ ހޯމަ ދުވަހު ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާގައި ރިޔާސީ ބަޔާނަށް އިދިކޮޅުން އަރުވާ ޖަވާބާއި ގުޅިގެން ވާހަކަ ދައްކަވަމުން ނަޝީދު ވިދާޅުވީ 24 ފެބްރުއަރީ ވާ ހޯމަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ ޖަލްސާގައި ރިޔާސީ ބަޔާނަށް ދެއްވާ ޖަވާބު ދެއްވުމަށް މަޖިލީހުގެ މައިނޯރިޓީ ލީޑަރު ވަނީ އެދިވަޑައިގެންފައިވާކަމަށެވެ.
ޕީޕީއެމްގެ ޕާލަމަންޓްރީ ގްރޫޕްގެ ލީޑަރ އޭދަފުށި ދާއިރާގެ މެމްބަރ އަހުމަދު ސަލީމް ވަނީ މައިނޯރިޓީ ލީޑަރުގެ ގޮތުގައި ހަމަޖެހިގެން ގޮސްފަ އެވެ. އެހެންކަމުން މިހާރު މަޖިލީހުގެ ގަވާއިދު ބުނާގޮތުން ރައީސް އިއްވެވި ރިޔާސީ ބަޔާނަށް ޖަވާބު ދެއްވާނީ މައިނޯރިޓީ ލީޑަރ އޭދަފުށި ދާއިރާގެ މެމްބަރ އަހުމަދު ސަލީމެވެ.
ރައީސް ނަޝީދު ވިދާޅުވީ ރައްޔިތުންގެ މަޖިލީހުގެ ގަވާއިދުގެ 32 ވަނަ މާއްދާގެ (ރ) ގައިވާގޮތުގެ މަތިން ރިޔާސީ ބަޔާނަށް ދޭ ޖަވާބު ތައްޔާރުވުމުން އެ ޖަވާބުދޭނެ ޖަލްސާއެއް މަޖިލީހުގެ ރައީސަށް ޖަވާބުދޭ ފަރާތުން އެންގުމުން، އެ ޖަލްސާގައި އެ ޖަވާބު ދެވޭނެ ގޮތް މަޖިލީހުގެ ރައީސް ހަމަޖައްސަދޭން ޖެހޭނެ ކަމަށެވެ.
ނަޝީދު ވިދާޅުވީ ރިޔާސީ ބަޔާނަށް ޖަވާބުދެއްވާ ދުވަހަކީ މައިނޯރިޓީ ލީޑަރުގެ ދުވަސް ކަމަށެވެ. އެމްޑީޕީގެ 65 މެމްބަރުންގެ ނަން އިއްވުމަށްފަހު ނަމަވެސް ބަޔާން އިއްވޭނެ ގޮތް ހަމަޖައްސަވާނެ ކަމަށެވެ. އަދި އުއްމީދު ކުރައްވަނީ އެ ބަޔާން ވެގެންދާނީ ވަކި ތަޖުވީދަކަށް އޮންނަ ބަޔާނަކަށް ކަމަށެވެ.
ރައްޔިތުންގެ މަޖިލީހުގެ ޖަލްސާތައް މިދައުރަށް ފެށުމުގެ ގޮތުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއްވެވި ރިޔާސީ ބަޔާނަށް އިދިކޮޅު މެމްބަރުން ދެއްވާ ޖަވާބު ތައްޔާރު ކުރެއްވުމަށް އިދިކޮޅު މެމްބަރުންގެ ބައްދަލުވުމެއް ހޯމަ ދުވަހު ބާއްވާފައިވެއެވެ.
މަޖިލީހުގައި މިހާރު ތިއްބަވަނީ އެމްޑީޕީގެ 65 މެމްބަރުން، ޕީޕީއެމްގެ 6 މެމްބަރުން، ޖުމްހޫރީ ޕާޓީގެ 5 މެމްބަރުން، އެމްޑީއޭގެ 2 މެމްބަރުން، ޕީއެންސީގެ 3 މެމްބަރުން އަމިއްލަ 6 މެމްބަރުންނެވެ.
