ކޯޓުތަކުގެ އިދާރީ ހިންގުން ބަދަލުކޮށްގެން އެކަނި ރައްޔިތުން ބޭނުންވާ ހަގީގީ ބަދަލު ނުފެންނާނެ: ރައީސް ސޯލިހު
ކޯޓުތަކަށް ދިމާވާ ވަރަށް ގިނަ ދަތިތައް ހުރިކަން ވެސް ގަބޫލުކުރައްވާ ކަމަށް ވިދާޅުވި
\'\'ގަޟާއީ އަހަރު 2020\'\' ގެ ހަފްލާގައި ރައީސް ވާހަކަފުޅު ދައްކަވަނީ
ހަމައެކަނި ކޯޓުތަކުގެ އިދާރީ ހިންގުން ބަދަލުކޮށް ގާނޫނުތައް އިސްލާހުކުރަމުން ރައްޔިތުން ބޭނުންވާ ހަގީގީ ބަދަލު ނުފެންނާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި ގަޟާއީ އަހަރު 2020"ގެ އިފްތިތާހީ ޖަލްސާ އިފްތިތާހު ކޮށްދެއްވައި ވާހަކަފުޅު ދައްކަވަމުން ރައީސް ވިދާޅުވީ، ކޯޓުތަކުގެ ގާނޫނާއި، ފަނޑިޔާރުންގެ ގާނޫނު އިސްލާހު ކުރުމުގެ ބިލުތައް ވަރަށް އަވަހަށް މަޖިލީހަށް ހުށަހެޅިގެންދާނެ ކަމަށެވެ. އަދި ޝަރުއީ ދާއިރާގެ ގާނޫނީ އޮނިގަނޑަށް ގެންނަންޖެހޭ ބަދަލުތައް، ދިރާސާކޮށް ބަލަމުން އަންނަ ކަމަށް ވިދާޅުވިއެވެ.
ރައީސް ވިދާޅުވީ، ޝަރުއީ ދާއިރާ އިސްލާހުކޮށް ހަރުދަނާ ކުރުމުގެ ވާހަކަ ދައްކާއިރު، ކޯޓުތަކަށް ދިމާވާ ވަރަށް ގިނަ ދަތިތައް ހުރިކަން ވެސް ގަބޫލުކުރައްވާ ކަަމަށެވެ. އެގޮތުން މެޖިސްޓްރޭޓް ކޯޓުތަކަށް ބޭނުންވާ މިންވަރަށް ވަސީލަތްތައް ފުރިހަމަ ނުވުމާއި، މެޖިސްޓްރޭޓުން މަދުވުމަކީވެސް، އެންމެ ހަލުވިމިނުގައި އަދުލު އިންސާފު ގާއިމުކުރުމަށް ހުރަސް އެޅޭ ކަންކަން އެމަނިކުފާނު ފާހަގަކުރެއްވިއެވެ.
އޭގެ ތެރެއިން ވެސް އެންމެ ބޮޑު ކަމަކީ، މާލޭގައި ހުރި ކޯޓުތަކުގެ ޖާގައިގެ ދަތިކަންކަން ފާހަގަކުރައްވާ ރައީސް ވިދާޅުވީ، މުޅި ރާއްޖޭގެ ނިސްބަތުން ވެސް އެންމެ ގިނަ މައްސަލަތައް ހުށަހެޅެނީ މާލޭގައި ހުރި ކޯޓުތަކަށް ކަމަށެވެ.
ހުޅުމާލެގައި ކޯޓު ކޮމްޕްލެކްސް އެއް ހެދުމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ވަނީ ދާދި ފަހުން އެޗްޑީސީއާ އެކު އެއްބަސްވުމެއްގައި ސޮއިކޮށްފައެވެ. އެ ކޯޓު ކޮމްޕްލެކްސް ހާއްސަ ކުރެވިގެންދާނީ ސިވިލް ކޯޓު، ފެމިލީ ކޯޓު އަދި ޖުވެނައިލް ކޯޓުގެ މަސައްކަތްތަކަށެވެ.
ރައީސް ވިދާޅުވީ، އެ މަޝްރޫއު ނިމޭއިރު މިހާރު ދިމާވެފައިވާ ޖާގައިގެ ދަތިކަން ހައްލުވެ ޝަރީޢަތްތައް މިހާރަށް ވުރެ ހަލުވިމިނުގައި ކުރިއަށް ދާނެކަމަށް އުއްމީދު ކުރައްވާ ކަމަށެވެ.
ރައީސް ސޯލިހު އިތުރަށް ވިދާޅުވީ، ރައްޔިތުންގެ ހައްގުތައް ރައްކާތެރިކޮށްދީ އަދުލު އިންސާފު ގާއިމުކުރުމަކީ، ހަމައެކަނި ފަނޑިޔާރުގެއާ ފަނޑިޔާރުންނާ ހަމައިން ނިމޭ ކަންތައްތައް ނޫން ކަމަށެވެ. އެއީ އެތައް މުއައްސަސާއެއްގެ އެތައް ބަޔަކު ލާމެހިފައިވާ، ވަށައިޖެހޭ ނިޒާމަކުން ނޫނީ ހާސިލްކުރެވޭނެ ކަމެއް ނޫންކަން ރައީސްގެ ވާހަަކަފުޅުގައި ވަނީ ފާހަގަކުރެއްވާފައެވެ.
