ދެމެހެއްޓެނިވި ގޮތުގައި ލޯނު ސްކީމް ކުރިޔަށް ގެންދެވޭނީ ނުދައްކާ ހުރި ފައިސާ ލިބިގެން: ޑރ. އިބްރާހިމް ހަސަން
މިދިޔަ އަހަރު 130 މިލިއަނަށްވުރެ ގިނަ ފައިސާ ލޯނަށް ދޫކޮށްފައިވޭ
ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން
ސްޓޫޑެންޓް ލޯން ސްކީމް ދެމެހެއްޓެނިވި ގޮތެއްގައި ކުރިޔަށް ގެންދެވެނީ މަތީ ތަޢުލީމަށް ދޫކުރި ލޯނުތަކުގެ ތެރެއިން، ނުދައްކާ ހުރި ފައިސާ ލިބިގެން ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ޙަސަން ވިދާޅުވެއްޖެއެވެ.
ނިމިގެން ދިޔަ އަހަރު އެކަނިވެސް ސްޓޫޑެންޓް ލޯނަށް 130 މިލިއަނަށް ވުރެ ގިނަ ރުފިޔާ ވަނީ ޚަރަދުކޮށްފައެވެ. މީގެ ކުރިން އޮޑިޓް ރިޕޯޓުން ހާމަވެފައިވާ ގޮތުން މަތީ ތަޢުލީމަށް ކިޔަވަން ދޫކުރި ގިނަ ޢަދަދެއްގެ ފައިސާ އަދިވެސް އަނބުރާ ނުލިބެއެވެ.
ރާއްޖެ ޓީވީގެ ފަލަސުރުޚީ ޕްރޮގުރާމުގައި ހަޔަރ އެޑިއުކޭޝަން މިނިސްޓަރު ވިދާޅުވީ، މީހުން ބިނާކުރުމަށްޓަކައި ވޭތުވެދިޔަ އަހަރު ތެރޭގައި ގިނަ ޢަދަދެއްގެ ފައިސާ ލޯނު ސްކީމްގެ ދަށުން ހޭދަކޮށްފައިވާ ކަމަށެވެ. އެ ލޯނުތައް ދޫކޮށްފައިވަނީ ލިބުނު ފަރާތްތަކުން އެ ފައިސާ އަނބުރާ ސަރުކާރަށް ދައްކާނެ ކަމަށް ވަޢުދުވެގެންކަން ފާހަގަކުރައްވައި މިނިސްޓަރު ވިދާޅުވީ، އެއްވެސް ގޮތަކަށް ފައިސާ އަނބުރާ ނުދައްކާ ފަރާތްތަކާއި، ވަކި ހިސާބަކުން ކޮންމެވެސް ސަބަބުތަކާއި ގުޅިގެން ފައިސާ ދެއްކުން ހުއްޓާލާފައިވާ ފަރާތްތައް އެބަތިބި ކަމަށެވެ.
އޭނާ ވިދާޅުވީ، ފޯރިއާއި ޖޯޝުގައި އެ ފައިސާ ހޯދުމުގެ މަސައްކަތް މިހާރު މިނިސްޓްރީން ފަށާފައިވާ ކަމަށާއި، ލޯނު ސްކީމެއް ދެމެހެއްޓެނިވި ގޮތެއްގައި ކުރިޔަށް ގެންދެވޭނީ ފައިސާ ލިބިގެން ކަމަށެވެ. ހަޔަރ އެޑިއުކޭޝަން މިނިސްޓްރީްނ ވަނީ ލޯނު ނަގާފައި ފައިސާ ނުދައްކާ ފަރާތްތަކަށް ''ރިމައިންޑާ ސިޓީ'' ތަކެއް ފޮނުވާފައެވެ.
އެ ޕްރޮގުރާމުގައި ވާހަކަ ދައްކަމުން ޑރ. އިބްރާހިމް ޙަސަން ވިދާޅުވީ، މި ފަހަރު އިޢުލާންކުރި ލޯނުތަކުގެ ތެރެއިން ޑިޕްލޮމާއަށް 45 ފުރުޞަތު، ފުރަތަމަ ޑިގްރީއަށް 253 ފުރުޞަތު އަދި މާސްޓަރސް އަށް 126 ފުރުޞަތު އަދި ޕީއެޗްޑީ އަށް 10 ފުރުޞަތު ހުޅުވާލާފައިވާ ކަމަށެެވެ.
މިނިސްޓަރު ވިދާޅުވީ، ސްކޮލަރޝިޕްގެ ފުރުޞަތުތައް ހޯދަން ބޭރުގެ ޤައުމުތަކާއެކު ވާހަކަތައް ދެކެވޭއިރު ރާއްޖެއިން މީހުން ބިނާކުރަން އެންމެ ބޭނުންވެފައި ހުރި ފަރާތްތަކަށް ފުރުޞަތު ފަހިކޮށް ދިނުމަށް މަސައްކަތް ކުރައްވާ ކަމަށެވެ.
މެޑިކަލް ކިޔަވަން ބޭނުންވާ ކުދިންނަށް އެންމެ ފަހުން ލޯނު ސްކީމުގެ ދަށުން ދޫކޮށްފައިވަނީ މަދު ފުރުޞަތުތަކެެކެވެ. އޭގެ ސަބަބުން ކޮންމެވެސް ވަރަކަށް ފާޑުކިޔުންތަކެއްވެސް އެ މިނިސްޓްރީ އަށް ޢަމާޒުވިއެވެ. އެކަމަކު މި ފަހަރު މެޑިކަލް ކިޔަވަން 30 ފުރުސަތު ވަނީ ހުޅުވާލާފައެވެ.
މި ފަހަރުގެ ލޯނު ސްކީމްގައި މުޅިން އަލަށް މެޑިކަލް ސްޕެޝަލައިޒޭޝަންގެ 11 ފުރުޞަތެއް ހުޅުވާލާފައިވާއިރު، މިނިސްޓަރު ވިދާޅުވީ، އެ ދާއިރާގެ މީހުން ރާއްޖެއަށް ބޭނުންވާ ކަމަށެވެ.
