ކުރިއަށް އޮތް ލޯކަލް ކައުންސިލް އިންތިޚާބު އެމްޑީޕީއަށް ކާމިޔާބުވާނެ ކަމަށާއި އެއާއެކު ސަރުކާރު ކޯލިޝަންގައި މޫނުއަޅާނެ ކަމުގެ ޔަޤީންކަން ރައްޔިތުންނަށް ދެއްވާކަމަށް ރައްޔިތުންގެ މަޖިލީހުގެ އެމްޑީޕީ މެމްބަރ ބިލެތްދޫ ދާއިރާގެ މެމްބަރ އަހުމަދު ހަލީމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ވާހަކަ ދައްކަވަމުން އަހުމަދު ހަލީމް ވިދާޅުވީ މިސަރުކާރުން ރައްޔިތުންގެ މަޖިލީހަށް ހުށަހަޅާފައިވާ އިސްލާހުތަކާއި ގުޅިގެން ވާދަވެރިން ސިޔާސީ މަގްސަދު ހާސިލްކުރުމަށްޓަކައި އެކިއެކި ވާހަކަތައް ދައްކަމުންދާކަމަށެވެ. އެހެންނަމަވެސް ކޮންމެ ކަމަކީ ސިޔާސީ ވާދަވެރިން ކެމްޕޭނުގައި ވޯޓު ހޯދުމަށްޓަކައި ދައްކާ ވާހަކައަކަށް ވާނަމަ ރާއްޖޭގެ ރައްޔިތުންނަށް ވަރަށް ބޮޑަށް އޮޅިގެންދާނެ ކަމަށް ހަލީމް ވިދާޅުވި އެވެ.
ހަލީމް އިތުރަށް ވިދާޅުވީ ކުރިއަށް އޮތް އިންތިޚާބުން އެމްޑީޕީއަށް ރަނގަޅު ކާމިޔާބެއް ލިބޭނެކަމަށް ޤަބޫލު ކުރައްވާކަމަށެވެ. އަދި އެ ކާމިޔާބާ އެކުގައި ރައްޔިތުން އެދޭ ކަހަލަ ވެރިކަމެއް ރައްޔިތުންނަށް ކޮށްދެވޭނެ ކަމަށް ހަލީމް ވިދާޅުވި އެވެ. އަދި އުއްމީދަކީ މިއިންތިޚާބާއެކު ކޯލިޝަން ސަރުކާރު ނިމުމަކަށް އައުންކަމަށް ހަލީމް ވިދާޅުވި އެވެ.
އިރާދަކުރެއްވިއްޔާ އަޅުގަނޑުމެން ކޯލިޝަން ސަރުކާރު ނިންމުމަށްޓަކައި މި ކުރާ މަސައްކަތަކީ އަޅުގަނޑުމެންނަށް މި ފަހަރު ލޯކަލް އިންތިޚާބު އަޅުގަނޑުމެންނަށް ރަނގަޅަށް ލިބިއްޖެއްޔާ، އަޅުގަނޑުމެން އިރާދަކުރެއްވިއްޔާ އެންމެ ދުވަހަކު ވެސް ޤާސިމް އބްރާހީމާ އެކީގައި ، މައުމޫން ޢަބްދުލްޤައްޔޫމާ އެކީގައި، ޢިމްރާން ޢަބްދުاللهއާ އެއްކޮށް އަޅުގަނޑުމެން އުޅޭކަށް ނެތިން. އަޅުގަނޑުމެންނަށް އެ މީހުންނާއެކު ސަރުކާރު ހިންގޭނެ ކަމަކަށެއް ނުފެނޭ. މިއަދު ވެސް މި ދަނީ އެ ބޭފުޅުންގެ ވަޒީރުންތަ އް ތިބި ތަންތަނުން އަޅުގަނޑުމެންނަށް ފުދޭވަރަކަށް މަސައްކަތްނުކުރެވި.ބިލެތްދޫ ދާއިރާގެ މެމްބަރ އަހުމަދު ހަލީމް
އަހުމަދު ހަލީމް އިތުރަށް ވިދާޅުވީ ރައްޔިތުންގެ އެންމެ ބޮޑު ކަންބޮޑުވުން ހުރީ މަސްވެރިންނާ ދޭތެރޭގައި ކަމަށެވެ. މިއަދު ވެސް ފިޝަރީޒް މިނިސްޓަރަށް މަސްވެރިންނާ ދޭތެރޭގައި ވެސް ކުރެވުނު ކަމެއްނެތް ކަމަށް ހަލީމް ވިދާޅުވި އެވެ.
އިރާދަކުރެއްވިއްޔާ ވަރަށް އަވަހަށް އަޅުގަނޑުމެން އެ ކަމަނާއާ ދޭތެރޭގައި ވެސް ފިޔަވަޅުއަޅައި، އަދި ޚާއްޞަކޮށް އެޕްރީލު 4 ވަނަ ދުވަހަކީ އެމް.ޑީޕީގެ ރައްޔިތުންނަށް އުފާވެރި ދުވަހަކަށް ވާނެ. ކޯލި ޝަންގައި މޫނު އަޅާނެކަމުގެ ޔަޤީންކަން އިރާދަކުރެއްވިއްޔާ ރައްޔިތުންނަށް މި ފުރުޞަތުގައި ދެން.ބިލެތްދޫ ދާއިރާގެ މެމްބަރ އަހުމަދު ހަލީމް
ކޯލިޝަން ރޫޅާލާނެ ފަދަ މޭރުމަކުން އެމްޑީޕީގެ ޕާލަމަންޓްރީ ގްރޫޕްގެ މެމްބަރުން ވާހަކަދެއްކެވި ނަމަވެސް ރައީސް އިބްރާހީމް މުހައްމަދު ޞާލިހު ތަކުރާރުކޮށް ވިދާޅުވަމުން ގެންދަވަނީ ކޯލިޝަން ސަރުކާރު ދަމަހައްޓަވާނެ ކަމަށެވެ.
