ޔަމަނަށް ވައިގެ މަގުން ދިން ހަމަލާތަކެއްގައި 31 މީހަކު މަރާލައިފި

ހޮނިހިރު ދުވަހު ޔަމަންގެ އުތުރު ޕްރޮވިންސަށް ވައިގެ މަގުން ދިން ހަމަލާތަކެއްގައި މަދުވެގެން އެގައުމުގެ 31 މީހުން މަރުވެފައިވާކަމަށް އދ. އިން ބުނެފި އެވެ.

ޔަމަނުގައި އުޅޭ ހަނގުރާމަވެރި ޖަމާޢަތެއްކަމަށްވާ ހޫޘީން ބުނާގޮތުގައި މިހަމަލާތައް ދީފައިވަނީ ސައުދީ އަރަބިއްޔާއިން ނެވެ. އެއީ ހުކުރު ދުވަހު ސައުދީ އަރަބިއްޔާގެ ހަނގުރާމަމަތީ ބޯޓެއް ވައްޓާލުމާއި ގުޅިގެންނެވެ. ސައުދީ އަރަބިއްޔާގެ ދައުލަތުގެ މީޑިޔާއިން ބުނާގޮތުގައި މިހަމަލާތައް ދީފައިވަނީ ކޮންގޮތަކަށްތޯ ސައުދީ އަރަބިއްޔާއިން އަންނަނީ ބަލަމުންނެވެ. އެއީ ސައުދީން މަސައްކަތް ކޮށްފައިވަނީ އެސަރަހައްދުގައި ހަނގުރާމަ ކުރަމުންދިޔަ ޔަމަން ސަރުކާރަށް އެހީތެރިވެދިނުމުގެ ގޮތުން ކަމަށްވާތީކަމަށް ސައުދީން ބުނެއެވެ.

އަދި މިހަމަލާތައް ދީފައިވަނީ އެސަރަހައްދުގައި ހޫޘީން ދެމުންގެންދިޔަ ހަމަލާތަކުން ދިފާޢުވުމުގެ ގޮތުންކަމަށްވެސް ސައުދީން ވަނީ ބުނެފަ އެވެ. އދ އިން ޔަމަން އަށް ކަނޑައަޅުއްވާފައި ހުންނަވާ މަންދޫބު ވިދާޅުވެފައިވަނީ މިހަމަލާތަކުގައި ޔަމަންގެ އާންމުންގެ 31 މީހަކު މަރުވެފައިވާއިރު 12 މީހަކަށް އެކިވަރުގެ އަނިޔާތައް ވެފައިވާކަމަށެވެ.

މިހަމަލާތަކާއި ގުޅިގެން ހޫޘީން ވަނީ މިހަމަލާތަކުގައި ގެއްލުންލިބުނު އިމާރާތްތަކާއި މަރުވެ އަދި ޒަޚަމްވެފައިވާ މީހުން ކަމަށްބުނެ ވީޑިއޯ އެއް އާންމުކޮށްފަ އެވެ.

ޔަމަންގައި ހަނގުރާމަ ހިނގަމުންދާތާ ފަސް އަހަރަށް ވުރެ ގިނަ ދުވަސްވެފައިވާއިރު މިހަނގުރާމައިގައި ޔަމަންގެ އެތައް ހާސްބަޔެއްގެ ފުރާނަ ގެއްލެމުންދާތީ އދ ން ވަނީ ކަންބޮޑުވުން ފާޅުކޮށްފަ އެވެ.