ކޮރޯނާވައިރަސް ޖެހިގެން މަރުވި މީހުންގެ އަދަދު 1,665ށް، ވައިރަސްގެ އަސަރުކޮށްފައިވާ މީހުންގެ އަދަދު 68,500 ށް
ކޮރޯނާވައިރަސް އަލަށް ޖެހިގެން ހޮނިހިރު ދުވަހު 2009 މީހުން ރިޕޯޓް ކޮށްފައިވޭ
ކޮރޯނާވައިރަސް އިން ރައްކާތެރިވުމަށް ރައްކާތެރިވުމުގެ ފިޔަވަޅުތައް އަންނަނީ އަޅަމުން
ޗައިނާގައި ހަލުވިކަމާއެކު ފެތުރެމުންދާ ކޮރޯނާވައިރަސް ޖެހިގެން މަރުވި މީހުންގެ އަދަދު 1665 ށް އަރާފައިވާކަމަށް އެޤައުމުން ބުނެފި އެވެ.
މިއީ އޭގެ ކުރީ ދުވަހާ އަޅާބަލާއިރު 142 މީހުންގެ އިތުރުވުމެކެވެ. ޗައިނާގެ ނެޝަނަލް ހެލްތު ކޮމިޝަނުން އާދިއްތަ ދުވަހު ޢާންމުކޮށްފައިވާ މަޢުލޫމާތުތަކުގައި ވަނީ އެޤައުމުން ކޮރޯނާވައިރަސް އަލަށް ޖެހިގެން ހޮނިހިރު ދުވަހު 2009 މީހުން ރިޕޯޓުކޮށްފައިވާ ކަމަށެވެ. އެއާއެކު މިވައިރަސް ޖެހުނު މީހުންގެ އަދަދު ވަނީ 68,500 ށް އަރާފަ އެވެ.
މިހާތަނަށް އާއިރު މިވައިރަސް ޖެހިގެން ފަރުވާ ދިން މީހުންގެ ތެރެއިން 9,500 މީހުން ވަނީ ރަނގަޅު ވެގެން ދޫކޮށްލާފަ އެވެ.
ހޮނިހިރު ދުވަހު ވަނީ ފްރާންސްގައި ފަރުވާދެމުން ދަނިކޮށް ޗައިނާގެ ރައްޔިތަކު މަރުވެފަ އެވެ. މިއީ ޔޫރަޕުގެ ޤައުމެއްގައި މިވައިރަސް ޖެހުނު މީހަކު މަރުވި ފުރަތަމަ ފަހަރެވެ. މިހާތަނަށް އާއިރު މިވައިރަސްގެ އަސަރު ދުނިޔޭގެ 25 ޤައުމަކުން ވަނީ ފެނިފަ އެވެ.
