ނަތާޝާއާ އެންގޭޖްވިކަމަށް ބުނާ ވާހަކަތައް ވަރުން ދޮގުކޮށްފި

ބޮލީވުޑުގެ އެކްޓަރު ވަރުން ދަވަން އޭނާގެ ދުވަސްވީ ލޯބިވެރިޔާ ނަޝާތާ ދަލާލްއާ އެންގޭޖްކޮށްފައިވާކަމަށް ބުނެ މީޑިއާތަކުގައި ދެކެވެމުންދާ ވާހަކަތައް ވަރުން ދޮގުކޮށްފިއެވެ.

ބޮލީވުޑްގެ މުނިފޫހި ފިލުވުމުގެ ދާއިރާއާ ގުޅޭ ޚަބަރުތައް ގެނެސްދޭ ނޫހެއްގައި ވަރުން ދަވަން އޭނާގެ އާއިލާއާއެކު ލޯބިވެރިޔާ ނަތާޝާ ގެއަށް ގޮސްފައިވާ ކަމަށާއި، ކައިވެންޏަށް ހުށައަޅާފައިވާކަމަށް ބުނެ ޚަބަރު ފަތުރާފައިވާއިރު، އެކަމާ ގުޅޭގޮތުން ވަރުން ކުރި ޓްވީޓެއްގައި ވަނީ އެކަން ދޮގުކޮށްފައެވެ.

އެގޮތުން ވަރުންގެ ޓްވީޓުގައި ބުނީ، ނަތަޝާގެ ގެއަށް ދިޔައީ އުފަންދުވަހުގެ ޕާޓީއެއް ފާހަގަ ކުރުމަށް ކަމަށާއި، އެކަމާ ގުޅޭގޮތުން ދޮގު ޚަބަރު ފެތުރެން ބޭނުން ނުވާ ކަމަށެވެ.

އަހަރުތަކެއް ވަންދެން ވަރުން އާއި ނަތާޝާގެ ގުޅުން ސިއްރުކޮށްގެން އުޅުމަށްފަހު ފަހަކަށް އައިސް އެކިއެކި ޙަފުލާ ތަކުން ވަރުން އާއި ނަތާޝާ އެކުގައި ފެނިގެން ދާން ފެށުމުން އެކަމާއި ގުޅޭގޮތުން "ކޮފީ ވިތު ކަރަން" ގައި ކަރަންޖޯހަރު ކުރި ސުވާލަކަށް ޖަވާބުދެމުން ވަރުން ވަނީ އެ ދެމީހުން ރައްޓެހިވެގެން އުޅޭކަން ހާމަކޮށްފައެވެ.

އެ ޝޯވްގައި ކަރަން ވަނީ އޭނާ އާއި ނަތާޝާ ރައްޓެހިވެގެން އުޅޭ ކަމަށާއި، ކޮންމެވެސް ދުވަހަކުން ކައިވެނި ކުރާނެ ކަމަށް ބުނެފައެވެ.

ބޮލީވުޑްގެ އެންމެ މަޝްހޫރު އެއް ފިލްމުކަމަށް ވާ "ސްޓޫޑެންޓް އޮފްދަ އިޔަރ" އިން އާންމުންގެ މެދުގައި ބޮޑު މަގުބޫލުކަމެއް ހޯދި ވަރުން ދަވަން އޭނާގެ ލޯބިވެރިޔާ ނަތާޝާއާއި ކައިވެނި ކުރަން އުޅޭ ކަމުގެ ވާހަކަތައް ދޭތެރެއިން ފެންމަތިވާއިރު، ވަރުންއާއި އެނާގެ ލޯބިވެރިޔާ ނަތާޝާ ކައިވެނިކުރާނެ ކަމަށް ބެލެވެނީ އެޕްރީލް މަހުގެ ފަހުކޮޅު ނުވަތަ މެއި މަހުގެ ކުރީކޮޅު ކަމަށާއި، އެކަމަށް ދެ ފަރާތުގެ އާއިލާ އިން މިހާރު ތައްޔާރީތައް ވަމުން އަންނަ ކަމަށްވެސް ބައެއް ނޫސްތަކުން މީގެ ކުރިން ރިޕޯޓްކޮށްފައިވެއެވެ.

ވަރުންގެ އާއިލާއާއި ނަތާޝާ އާއި ގާތް ގުޅުމެއް އޮންނަ ކަމަށާއި ވަރުންގެ އާއިލާއަށް ނަތާޝާ ވަރަށް ކަމުދާކަމަށް ރިޕޯޓުތައް ބުނެއެވެ. މި އާއިލާއެކުގައި ދާދިފަހުން އައު އަހަރު ފާހަގަ ކުރުމަށް ސްވިސްގެ ރިސޯޓަށް ވަރުންގެ ޢާއިލާ ދިޔައިރު ނަތާޝާވެސް ވަނީ މި ދަތުރުގައި ބައިވެރިވެފައެވެ.