އަހަރެން އަޖޭއާ އެއްކޮށް ފިލްމެއް ކުޅެން ނޫނެކޭ ނުބުނާނަން: ތައްބޫ

މަޝްހޫރު އެކްޓަރ އަޖޭ ދޭވްގަންއާ އެއްކޮށް ފިލްމެއް ކުޅެން ނޫނެކޭ ނުބުނާނެ ކަމަށް ތައްބޫ ބުނެފިއެވެ.

ތައްބޫ ބުނީ އޭނާ އާއި އަޖޭއަކީ ކުޑައިރުއްސުރެ ވަރަށް ގާތް ދެ ރަޙުމަތްތެރިން ކަމަށާއި މިއީ އަޖޭއާ އެއްކޮށް ފިލްމެއްގައި މަސައްކަތް ކުރުމަށް ލިބޭ އެންމެ ބޮޑު ފައިދާ ކަމަށެވެ. ތައްބޫ ވަނީ އަޖޭ އޭނާ އަށް ޑައިރެކްޓަރ ނުވަތަ ޕްރޮޑިއުސަރެއްގެ ރޯލް ހުށަހަޅައިފި ނަމަ އެކަން ކުރަން ވެސް ތައްޔާރަށް ހުރި ކަމަށް ބުނެފައެވެ.

އަޖޭ އާއި ތައްބޫ ވަނީ "ތަޝަކް"، "ހަގީގަތު"، "ގޯލްމާލް އެގެއިން" ފަދަ ފިލްމްތަކުގައި އެކީ ހަރަކާތްތެރިވެފައެވެ. އަހަރުތަކަކަށް ފަހު ތައްބޫ އާއި އަޖޭ އެކުގައި ފެނިގެންދާ "ގޯލްމާލް އެގެއިން" ހުކުރު ދުވަހު ވަނީ ސިނަމާތަކުގައި އަޅުވާފައެވެެ.

މި ދެ ތަރިން އިތުރު ފިލްމަކަށް ތައްޔާރުވަމުން އަންނަ ކަމަށް ތައްބޫ ވަނީ ބުނެފައެވެ. އެ ފިލްމް ޑައިރެކްޓްކުރާނީ "ޕިޔާރު ކާ ޕަންޗްނާމާ" އިން މަޝްހޫރުކަން ހޯދި ލަވް ރަންޖަންއެވެ.

ތައްބޫއަށް ވަނީ "ނެޝެނަލް ފިލްމް އެވޯޑް ފޯ ބެސްޓް އެކްޓްރަސް" ގެ އެވޯޑް ދެ ފަހަރަށް ލިބިފައެވެ. އަދި "ފިލްމް ފެއަރ އެވޯޑްސް" ހަ ފަހަރަށް އޭނާ ވަނީ ހާސިލްކޮށްފައެވެ.

ތާބޫ އެންމެ ފުރަތަމަ ފިލްމެއްގައި ހަރަކާތްތެރިވެފައި ވަނީ 1980 ވަނަ އަހަރުގައެވެ.