ކުޅިވަރު - ސަޑިއޯ މާނޭ

އަނިޔާއިން ރަނގަޅުވެ މާނޭ އެނބުރި ސްކޮޑަށް

  • މާނޭއަށް އަނިޔާވީ މިދިޔަ ޖެނުއަރީ މަހުގެ 23 ވަނަ ދުވަހު

އިސްމާޢީލް ޝާހް
ismaelschurh

ކ. މާލެ 14 ފެބުރުއަރީ 2020 | ހުކުރު 21:24 1,736

ލިވަޕޫލްގެ ފޯވާޑް ސަޑިއޯ މާނޭ - ގެޓީ އިމޭޖާސް

ފަލަމަސްގަނޑަށް ލިބުނު އަނިޔާއިން ރަނގަޅުވެ ސެނެގޯލްގެ ފޯވާޑް އެނބުރި ލިވަޕޫލްގެ ސްކޮޑުގައި ހިމެނިއްޖެ އެވެ.

މާނޭއަށް އަނިޔާވީ މިދިޔަ ޖެނުއަރީ މަހުގެ 23 ވަނަ ދުވަހު އިނގިރޭސި ޕްރިމިއާ ލީގުގައި ރަށުން ބޭރުގައި ވުލްވްސް އަތުން 2-1 އިން މޮޅުވި މެޗުގައެވެ. އެ މެޗުގެ ފުރަތަމަ ހާފުގައި މާނޭ އަށް އަނިޔާވެ ވަނީ ބަދަލުކޮށްފައެވެ.

މާނޭގެ ފަލަމަސްގަނޑަށް ލިބުނު އަނިޔާ ސީރިއަސް ނޫން ކަމަށް ލިވަޕޫލުން މީގެ ކުރިން ވަނީ ބުނެފައެވެ. އެކަމަކު އޭނާއަށް ވަނީ ލީގުގައި ވެސްޓް ހޭމް އާއި ސައުތެމްޓަން އަދި އިނގިރޭސި އެފްއޭ ކަޕްގެ ހަތަރުވަނަ ބުރުގެ ރީޕްލޭ މެޗުގައި ޝްރޫސްބަރީއާ ދެކޮޅަށް ލިވަޕޫލުން ކުޅުނު މެޗުތައް ގެއްލިފައެވެ.

އެ އަނިޔާއިން މާނޭ މިހާރު ރަނގަޅުވެފައިވާއިރު، ފިނި މޫސުމުގެ ޗުއްޓީއަށްފަހު ލިވަޕޫލުން ބޭއްވި ފަރިތަކުރުންތަކުގައި އޭނާ ވަނީ ބައިވެރިވާން ފަށާފައެވެ.

ލިވަޕޫލްގެ ކޯޗު ޔާގެން ކްލޮޕް ބުނީ ލީގުގައި ހޮނިހިރު ދުވަހުގެރޭ ނޯވިޗް ސިޓީއާ ދެކޮޅަށް ލިވަޕޫލް ކުޅޭ މެޗުގައި މާނޭއަށް ކުޅެވޭނެ ކަމަށެވެ.

މި ސީޒަނުގައި ގިނަ ރެކޯޑްތަކެއް ގާއިމްކުރަމުން އަންނަ ލިވަޕޫލް އިނގިރޭސި ޕްރިމިއާ ލީގުގެ އެއްވަނައިގައި އޮތީ 22 ޕޮއިންޓުގެ ލީޑަކާއެކު އެވެ. ލީގުގެ މެޗަކުން މިހާތަނަށް ބަލިނުވެ އޮތް ލިވަޕޫލް އެއްވަނައިގައި އޮތީ 25 މެޗުން 73 ޕޮއިންޓާއެކު އެވެ. ދެވަނައިގައި އޮތް މެންޗެސްޓާ ސިޓީއަށް 25 މެޗުން ލިބިފައިވަނީ 51 ޕޮއިންޓެވެ. ލިވަޕޫލަށް ލީގު ކާމިޔާބުކުރަން ދެން ބޭނުންވަނީ 18 ޕޮއިންޓެވެ.

ލީގުގައި ލިވަޕޫލް އާއި ނޯވިޗް ސިޓީ ބައްދަލުކުރާ މެޗު ފަށާނީ ހޮނިހިރު ދުވަހުގެރޭ ރާއްޖެ ގަޑިން 22:30 ގައެވެ.

އެންމެ ފަހުން އަޕްޑޭޓް ކުރީ: 5 ދުވަަސް ކުރިން | ރިވިއު ކުރީ: ހުސައިން ފަރިޔާޒް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.

ކޮމެންޓް